30
'Ixaheri ke'aixɨa mɨ'itɨarieni
1 Yawé niukieya Keremiyaxi hetsɨa kaninuani: 2 «Yawé mɨpaɨ kanaineni, 'Ixaheri Kakaɨyarieya: “Xapatsie ketinaka'utɨa naime tita nemɨmatiutaxatɨa”. 3 Yawé mɨpaɨ kanaineni: “Karikɨ tukari kanaye'amɨkɨ, kepauka ne nemɨwarakunuitɨani memehapaniekai neteɨterima 'ixaheritsixi meta Kura teɨteriyari, nekaniwa'atɨamɨkɨ kwie wa'ukiyarima nemɨwayetuiritsie, hikɨ mana mekanitiyaxikuni”», Yawé mɨpaɨ kanaineni.
4 'Ikɨ Yawé niukieya kanihɨkɨtɨni Keremiyaxi kemɨtiutaxatɨa 'Ixaheri meta Kura kwieyari wahepaɨtsita: 5 «Yawé mɨpaɨ kanaineni:
»“Memumariutsie wahiwari tepɨ'enie,
kayuwatɨ pɨka'uma, matsi marika xeikɨa puxuawe.
6 Xekeneuti'iwau xekeneuyu'ɨwiya
'ukitsi kuta metetiniweya.
¿Titayaritsɨkamɨ yunaime 'ukitsi netiwaxeiya
yukwatsapaɨtsie me'akɨwɨkame,
'ukarawetsixi memɨtiniwexɨaxime wahepaɨ?
¿Titayari kwinimieme mete'anakamama
yunaitɨ?
7 Xɨa'ui. Mɨkɨ tukaritsie pumariwekareni,
tukari hatsuaku kemɨkatiyɨwe pɨtiyɨni.
Kakuwu hetsiemieme hiwerika pɨrayani,
peru mana ya'anekɨa payewikweitsitɨarieni”.
8 »Mɨpaɨ kanaineni Yawé Naimekɨmɨtɨrɨkaɨye: “'Iya tukaritsie,
yuku nekanitamuramɨkɨ neteɨterima yɨkɨipi heima memetɨkɨ,
kɨmana memɨwiwietɨka nekanititekimɨkɨ,
hatsuakuri teewatari tewa'uximayatsiriwamete mepɨkahakɨne.
9 Yawé, yukakaɨyari xeikɨa xepɨte'uximayatsirieka,
meta Rawiri, tixe'aitɨwame nepayeitɨani.
10 »”Pepɨkamaka, Kakuwu, neti'uximayatsiriwame, pepɨka'utimamaweni 'Ixaheri
—Yawé mɨpaɨ kanaineni—.
'Ekɨ Kakuwu, nekamenixɨnamɨkɨ mɨkɨ kwie 'ateewa mukuma hetsie,
meta 'anuiwarima memehapanie neniwa'atɨamɨkɨ.
'Aixɨa 'iyari pe'uyeikatɨ pekanayeimɨkɨ meta peka'uximatɨarietɨ,
Hatsuakuri xewitɨ pɨkamatsitimariuta.
11 Karikɨ ne 'ahamatɨa nekaniuyeikani nemetsitawikweitsitɨanikɨ
—Yawé mɨpaɨ kanaineni—.
Yunaime nuiwarite nekaniwaka'unamɨkɨ yuheyemekɨ
kemɨ'ane wahetsɨa nemetsiheutanɨ'akai.
Peru 'ekɨ naime nepɨkametsika'una,
matsi nepumatikwinitɨani kemɨtiheitseriekɨ xeikɨa,
peuyewetsetsiere nemumatikwinitɨakakɨ”.
12 »Yawé mɨpaɨ kanaineni:
»“Kenemumatikwinitɨa pɨkayu'uayemarinɨa, 'ahaiya 'uayeyari pɨkaxɨawe.
13 Xewitɨ pumawe 'ahetsie mɨtanuanikɨ kepemɨranuyemie,
ke'axapemɨtiuyurikɨ pumawe 'uayeyari
meta 'akwiniyakɨ 'aixɨa pemɨtika'erienikɨ.
14 Yunaitɨ memumatsinaki'eriekai mepumatsi'uku'eiri,
mepɨkamatsiha'eriwari.
Waɨkawa 'axapemɨtiuyurikɨ,
meta mɨmɨirekɨ ke'axapemɨtiuyuri,
nekamenanayewayani nekamenayemari'itɨwani,
xewitɨ mɨrayuye'unie kemɨrayurieni hepaɨ.
15 ¿Ketitayari pera'aiwa 'akukuiniyakɨ,
panatsi 'akukuiniya yu'uayemarinɨa?
Ke'axapemɨtiuyuri pɨtimɨire
meta waɨkawamekɨ 'axapemɨtiuyurikɨ,
'ayumieme mɨyanekametinipitɨaka.
16 »”Yunaitɨ kemɨ'ane memɨxetikwani mekanitikwaiyakuni,
yunaitɨ memɨxe'aye'unie 'ateewa mekananuhapaniekuni.
Yunaitɨ kemɨ'ane memɨxetenawatsirieni mekateninawatsiyariekuni,
yunaitɨ kemɨ'ane memɨtexenawairieni mekateninawaiyariekuni.
17 Peru ne nekamenimanetsikitɨamɨkɨ
meta kepemɨtiukwinitɨarie nekani'uayemamɨkɨ
—Yawé mɨpaɨ kanaineni—
pemehɨiya pemɨtiuterɨwaruwakaikɨ,
Tsiyuni tixaɨtɨ mɨkarexeiya, xewitɨ mɨkahe'eriwakɨ”.
18 »Yawé mɨpaɨ kanaineni:
»“Kakuwu xamaruyata tita mɨtiyepikai nekatinanuitɨamɨkɨ,
meta xekiite nekanitinenimayatamɨkɨ,
kiekari kaniyukamamɨkɨ maku'unarie hetsie,
meta paratsiyu kaniyukakemɨkɨ hakewa mewekai.
19 Xehetsie kwikari witsi'anɨyɨtɨ kaniyeyeimɨkɨ,
temawierika hiwariyari.
Xexiɨyarima nekaniwatamɨiriyamɨkɨ, yu'utɨa xepɨkakakɨne,
nexenaki'erietɨ nekanayeimɨkɨ, xepɨkatixani'eriwari.
20 Xeniwema 'ukitsi meripai kememɨ'anekai mɨpaɨ mekani'anekuni,
nehɨxie xekiekari kanikumakamɨkɨ,
peru kemɨ'ane memɨxe'aye'unie nekatiniwakwinitɨamɨkɨ.
21 Xetsata manuyeyerɨni kanayenemɨkɨ,
mɨkɨ xewitɨ xeti'aitɨwame kanayeimɨkɨ.
Ne'aurie hurawa 'uyeikame nekanayeitɨamɨkɨ, mɨkɨ nehamatɨa 'uyeikatɨ payani,
¿kemɨ'ane yutukari puyetuawe nehetsɨa maye'anikɨ?
—Yawé mɨpaɨ kanaineni—.
22 Xeme neteɨterima xepɨhɨkɨtɨni,
neta Xekakaɨyari nepɨhɨkɨtɨni”».
23 Yawé 'ekaya
kanayeyani ha'atɨ,
'eka waɨkawa tɨrɨkaɨyetɨ haikɨri tiyumemiwatɨ
kanayenɨ'arieni 'axamemɨte'u'iyari wahetsiemieme.
24 Yawé haxɨaya pɨkatihayewa
matsi kemutayɨ naitɨ pɨraye'ani
'iyarieya kemɨtiyɨkɨhɨawe.
Naime 'ikɨ hetsie xekatenetimaikuni
'imatɨrieka tukariyaritsie.