1 Tsepatiyaxi Matani nu'aya, Kerariyaxi Patsuxi nu'aya, Kukari Tseremiyaxi nu'aya meta Patsuxi Marikiyaxi nu'aya, mɨpaɨ mekateniumarieni kename Keremiyaxi mɨpaɨ tiwakɨhɨawekai teɨteri: 2 «Yawé mɨpaɨ kanaineni: “Kemɨ'ane 'ikɨ kiekaritsie muyuhayewa kanimɨmɨkɨ haakakɨ, 'ixiparakɨ yatɨni kwiniyakɨ. Peru kemɨ'ane wawiruniyutsixi wahetsɨa muyuyetuani kaniuyeikamɨkɨ. Meme'iwapaɨ kaniyuyetuamɨkɨ, 'ana matsi kanitawikweimɨkɨ”. 3 Yawé mɨpaɨ kanaineni: “'Ikɨ kiekari Wawiruniyatsie ti'aitame kuyaximama mene'iwakuni meta xenitiwiyariekuni”».

4 Memanuyetei ti'aitame mɨpaɨ mekateniutahɨawe:

—'Ikɨ tewi tepɨmieni. Mɨpaɨ tikuxatatɨ puwamariuta kuyaxi meta teɨteri 'ikɨ kiekaritsie memuyuhayewatɨwe. 'Ikɨ tewi 'aixɨa mɨti'ane pɨkatikuwaune 'ena kiekatari wahetsiemieme, matsi 'axamemɨ'itɨarienikɨ xeikɨa.

5 Ti'aitame Tserekiyaxi mɨpaɨ kaniutayɨni:

—Nepɨxeyetuirie. Ne tsepa nemɨti'aitame xeme nexe'aye'unietɨ nepɨka'ayani.

6 Hikɨ mɨkɨ Keremiyaxi me'uwiyaka, kaunarikɨ me'iwiwitɨatɨ putsuta mekaneikahɨani kuyaxi watakwa, Marikiyaxi kaniputsuyatɨkaitɨni ti'aitame nu'aya. Peru mɨkɨ putsuta haa pɨka'uyemakai, haxu xeikɨa puyekatei mɨkɨta Keremiyaxi kaniukahanieni.

7 'Etiupe tewiyari 'Ewemereki, ti'uximayatame ti'aitame hetsiemieme, katiniutamarieni kename putsuta Keremiyaxi heukahɨiyakai. Hikɨ kepauka mɨrakuxaxatsiwa ti'aitame 'uyeikakaku Wenikamini 'itupariyari meuwietsie, 8 'Ewemereki paratsiyuta kaniwayeyani mɨpaɨ katinitahɨawe:

9 —Ti'aitame meta neti'aitɨwame, 'iku teɨteri 'axamepɨte'uyuri. Keremiyaxi putsuta mepeukahɨa, muwa haakakɨ kanimɨmɨkɨ, paa mumawekɨri 'ikɨ kiekaritsie.

10 Hikɨ ti'aitame 'etiupe tewiyari 'Ewemereki mɨpaɨ katiniuta'aitɨani:

—Yuhaikame 'ukitsi keniwareta'inieka Keremiyaxi xekenewatihani putsuta mexi kahemɨwe.

11 'Ewemereki mɨpaɨ katiniuyurieni, meta paratsiyuta neutahani 'ixurikite mɨrewati'utsiwatsie, meripaitɨ timieme rewayehurieka, putsuta Keremiyaxi tineukatuirieni kaunaritsie. 12 'Ewemereki Keremiyaxi mɨpaɨ katiniutahɨawe:

—'Axetɨa keneuta'itaxɨa 'ikɨ 'ixurikite 'axamɨti'anene, kaunari mɨkamerekwinitɨakakɨ.

Mɨpaɨ katinikayani Keremiyaxi. 13 'Ukitsi kaunari muwa meheukawiwieka mekanewatihana putsuta. Keremiyaxi kuyaxi watakwa kaniyuhayewa.

14 Tserekiyaxi ti'aitame katiniuta'aita Keremiyaxi manuwitɨkienikɨ Yawé tukita hairieka kitenieyaritsie, muwa mɨpaɨ katinitahɨawe:

—Tixaɨtɨkɨ nepɨmatita'iwawiya, ximɨxixi tixaɨtɨ pepɨkaneranukanamiriwani.

15 Keremiyaxi mɨpaɨ ti'aitame katiniuta'eiya:

—Xɨka nemetsi'utaxatɨani neti'aitɨwame, 'ekɨ pekanenita'aitamɨkɨ nemumierienikɨ. Xɨka nemetsi'uta'ɨxatsitɨani, pekapɨnetsi'enieni.

16 Peru Tserekiyaxi 'awie mɨpaɨ Keremiyaxi katiniutahɨawe:

—Yawé hɨxie mɨpaɨ nepɨmerahɨawe, tukari mɨtatsi'upitɨa, nepɨkamatsimieni meta nepɨkamatsiyetuani 'ikɨ memetsimieku wahetsɨa.

17 Keremiyaxi mɨpaɨ Tserekiyaxi katiniutahɨawe:

—Mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: “Xɨka 'ekɨ ti'aitame peyutatuani kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, pekanitawikweimɨkɨ meta 'ikɨ kiekari pɨkatataiyarieni, 'Ekɨ ti'aitame meta 'atɨɨriyama 'amekaniu'uwakuni. 18 Peru xɨka pekayuyetuani kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, karireutsixi 'ikɨ kiekari mekana'iwakuni, kanitataiyariemɨkɨ meta xeme xemuyuta'una xepɨkayɨwekaxɨani”.

19 Tserekiyaxi ti'aitame mɨpaɨ kaniutayɨni:

—Ne huriyutsixi nepɨwareumakaxe wawiruniyutsixi memɨwarutinɨi, titɨtɨ mɨkɨ wahetsɨa nemɨniyetuiya memɨnetsitinanaimanikɨ.

20 Keremiyaxi mɨpaɨ katinita'eiya:

—Ti'aitame Yawé niukieya keneu'enieka ne kenemetikuxaxatɨwa, 'ana wawiruniyutsixi wahetsɨa pepɨkayetuiyani. 'Ekɨ 'ana 'atsipepɨkaranuyeyani, 'atukari pepɨtawikweitsitɨani.

21 Peru xɨka heitseriemekɨ pekayuyetuani, Yawé mɨpaɨ kanetinahɨaweni: 22 Yunaitɨ 'ukarawetsixi Kura kwieyaritsie ti'aitame paratsiyuyata memuyuhayewatɨwe mekaniyetuiyakuni kuyaxi tewa'aitɨwamete Wawiruniya kwieyaritsie ti'aitame hetsɨa miemete wahetsɨa, mɨkɨta mɨpaɨ mekanitiyuakuni 'ahepaɨtsita:

23 »Yunaitɨ 'ukarawetsixi meta 'aniwema 'ukitsi mekaniyetuiyakuni wawiruniyutsixi wahetsɨa, 'ekɨta ti'aitame pepɨkayɨwekaxɨani pemɨ'ata'unakɨ, matsi Wawiruniyatsie ti'aitame hetsɨa pekaniyetuiyamɨkɨ meta kiekari kanayetaiyariemɨkɨ».

24 Tserekiyaxi Keremiyaxi mɨpaɨ katiniuta'eiya:

—'Ikɨ niukiyari hepaɨtsita xewitɨ pɨkatimaika, nɨkahɨrixɨa pe'umɨni. 25 Xɨka memanuyetei metehetimani kename ne 'ahamatɨa netiutaxa, xɨka me'u'axɨame mɨpaɨ memete'utahɨawe: “Ketatineutaxatɨa ti'aitame kehepaɨ pemɨtiutahɨawixɨ, meta mɨkɨ kehepaɨ metiutahɨawixɨ, tixaɨtɨ pepɨkataranukanamirieka, mexɨka pekatiutaxata tame tekamenimiekuni”, 26 'ekɨta mɨpaɨ pekatiniwatahɨawimɨkɨ: “Ti'aitame netawawirienike nepunua tawari mɨkanetsihenɨ'awanikɨ Kunatani kiita, muwa nehemɨnikɨ”.

27 Hikɨ mɨpaɨ katiniɨyɨni. Yunaitɨ memanuyetei mekaniu'axɨani Keremiyaxi meti'iwawiyake, peru mɨkɨ kaniwaruta'eiya kehepaɨ mɨtitahɨawekai ti'aitame. Hikɨ mekanihayewa, xewitɨ mɨka'u'enakaikɨ mɨkɨ kememɨte'uxatakai. 28 Keremiyaxi Kuyaxi watakwa kaniyuhayewakaitɨni kepaukake Kerutsareme muka'unarie.

Kerutsareme mɨpaɨ katiniuka'unarieni: