4
'Eripaxi matɨari kemutayɨ
1 Hikɨ 'Eripaxi Temani kiekame Kuwi mɨpaɨ katiniuta'eiya:
2 «Xɨari pɨkamatsi'unakiwe
xɨka xewitɨ yɨkɨ matiutahɨawe,
ne nepɨkayɨwe nemɨtinewiekakɨ,
3 'Ekɨ yumɨireme teɨteri pepɨwarayehɨtɨwakai
meta pepɨwaparewiekai 'aixɨa petiwarahɨawetɨ memɨwerarani,
4 'Ekɨ 'aniukikɨ pepɨwaranukuhapanakai memekaxɨrɨwekai
meta watunute petɨrɨkariyatɨ memanuyewerarani yutunutetsie,
5 Matsi hikɨ kepemɨtiuka'eniwa pepɨkatinewie,
waɨkawa yɨkɨ peti'akɨhɨawetɨ pepɨ'akuhayeikawa meta peweranitɨ.
6 ¿Kari pepɨkayɨwenikeyu Kakaɨyari pe'ayemakatɨ yuri pemɨti'eriekakɨ
meta kepemɨtiuyeikakɨ kename 'axapekatiyurienetɨ 'apeka'uyeika?
7 »Keneutimaixɨa: ¿Kemɨ'ane 'axakatiyurienetɨ pukumawerixɨ?
¿Kepauka teɨteri 'aixɨa memɨte'u'iyari mepeuyewe?
8 Kenemɨretima mɨpaɨ pɨneti'ɨkitɨa
kemɨ'ane 'axamɨti'ane mɨtika'eni, mɨkɨ 'uximatɨarika kanika'itsanamɨkɨ.
9 Kakaɨyari 'iiyaya kaniwatakukuyani,
haxɨaya kaniwarakɨxɨxɨtsitɨwani.
10 Tsepanetɨ maye muyutahaxɨatɨwa meta niwemama kememɨte'i'ɨke,
naime yutamete mekaniwaye'uniyariexɨakuni,
11 maye kanimɨmɨkɨ 'ikwaiya mɨtiumawekɨ,
meta maye niwemama mekanitayeixɨakuni.
12 »'Awie niuki nehetsie kaniye'ani,
yuariyaya 'etsiwa xeikɨa nekaniu'enieni.
13 Tɨkarikɨ heinɨtsi nehetsie kaninuani kaneneuyehɨani,
kepauka teɨteri waɨkawa memeukukutsutsie,
14 marika waɨkawa nehexeiyatɨ nekaniyuhayewa,
naitɨ ne'umete kaniutiyɨyɨakakaitɨni.
15 Nehɨxietsie 'iyari 'ekayari kaneniuyuitɨani,
meta nekɨpate kaniutitsetseriya.
16 'Etɨriya nehɨxie kaniyuhayewa,
matsi pɨkayuxeiyanɨakai kemɨ'ane mɨhɨkɨtɨkai.
Kayuwatɨ katiniukeni,
meta niukieya nekaniu'enieni mɨpaɨ 'utaineme:
17 »“Xewitɨ matsi tewi kaniumaweni heitseriemekɨ yatikamietɨ Kakaɨyari hepaɨ.
Tewi pɨkayɨwe waɨkawa 'itiyatɨ mayanikɨ kemɨ'ane Mitawewi hepaɨ.
18 Matsi Kakaɨyari te'i'uximayatsiriwamete wahetsie yuri pɨkati'erie,
meta niuki tuayamete yuhetsɨa miemete, yakatiniwakɨhɨaweni kememɨkate'enu'eniwa,
19 matsiri teɨteri haxukɨ memɨwewiyatɨka kepauka yuri tiwaruta'eriri,
tumuanarikɨ mekaniwewiyatɨkani, mekanitipɨnarɨwani kakwaniwemekɨ kɨpi tikɨmeme hepaɨ.
20 Ximeri mepayeneniere peru taikai mepɨkwikwi'i
meta yuheyemekɨ mepukumamawere, nixewitɨ tɨma pɨkawaraye'eriwa.
21 Wakaunari kanaxitewani, hikɨ 'ixuriki kiiyari hepaɨ mekaniuka'unikeni.
Mekanitakukuweni metemaiwawetɨ mekahakɨniwawetɨ”.