24
1 »Xɨka Naimekɨmɨtɨrɨkaɨye hɨxie kemɨtiyɨni naitɨ tihekɨaka,
¿titayari memimate 'atsimekate'ixeiyawawe heitseriemekɨ kemɨtiyuriene?
2 Hipatɨ mekanixuaweni hakewa wakwie meuka'atɨka 'aixɨa mekate'ixeiyatɨ,
meta tewaxi 'inawarite mekateniwamitɨweni,
3 nutuite wapuxurima mekaniwanawairietɨweni,
wiuraxi watuurutsixi kwietsanamete mekaniwatanawairiwani memɨtehapitɨkakɨ,
4 memɨteheuyehɨwa huyeta mekaniwataweweiyani,
tixaɨtɨ memɨkateheuxeiya waɨriyarika mekaniwapitɨaka memuyuti'awietakɨ xeikɨa.
5 Puxuri yeutari makumawetsie memu'uwani wahepaɨ,
tixaɨ memɨkateheuxeiya mekaniyumexɨitɨaka yu'ikwai memɨtehexeiyanikɨ,
meta mɨkɨtɨtɨ kwie makumawe yuniwema pɨtiwamikwa.
6 Kayuwaxata mɨaxa muyukuhayeikawa mekaniteɨxɨtɨweni,
meta 'axamemɨte'u'iyari waharawerita kaxie mekanititeɨxɨni.
7 Yu'ixuriki memɨkahexeiyakɨ, yɨwikɨta meka'ukemaritɨ mekaniukatariyarɨwani,
mepɨkaheixeiya 'ɨkari xeri hetsiemieme.
8 Wiyeri hɨritsie miemekɨ mepɨtihawire,
yuhetsie nunuwame memɨkahexeiyakɨ, terɨta mekaneuyuta'unani.
9 Nutui putsitsinawaiyarie yumaamatsie,
tixaɨtɨ mɨkarexeiya pukuname mɨrapinekɨ.
10 Yu'ixuriki memɨkahexeiyakɨ, meka'ukemaritɨ 'amekaniu'uwani,
tɨriku me'ɨtɨximetɨtɨ, haakakɨ mekanikwiximeni.
11 Hɨriwa takariyari tɨxɨmetsie mepɨpɨna,
kaxie mekanitiketsinani 'atixawametsie, matsi harimɨyakɨ mekanikwiximeni.
12 Kiekaritsie memɨkwixime wahiwari kani'eniɨriɨkɨni,
memɨwitekietɨka wahiwari parewiya kana'iwawani,
matsi Kakaɨyari tɨma 'atsipɨkaretimamate.
13 »Hipatɨ hekɨariya mepaye'unie,
mɨpaɨ mepɨkate'u'uwa
yuhuye mepɨkahetimaiwawe.
14 Kakahekɨariwekaku 'akuxi, tiyumemiwame panukukeka,
tixaɨtɨ mɨkarexeiya meta mɨreuyehɨwa pukumemiwa,
kepaukata mɨkɨyɨre tinawayame kanayuyeitɨwani.
15 Hipame wa'ɨitama muwakumaɨwa hɨxiteya yɨriya kanitakwewieka,
mɨpaɨ yuhetsiemieme pɨtiyɨkɨhɨawe: “Xewitɨ pɨkanetsixeiya”,
yɨhɨxie kaneuyuku'awietani.
16 Yɨwikɨta, tinawayame xeime kiita peuhake,
matsi tukarikɨ yukiita peuyunama,
hekɨariyatsie timiemekɨ tixaɨtɨkɨ pɨkatiyɨkɨhɨawe.
17 Mɨkɨ yunaime wahetsiemieme, hekɨariya yɨriya 'emayetsuye pɨhɨkɨ,
yɨriya mumariwe pɨta mepɨnaki'erie».
Tsupaxi kemɨranuyeniu
18 «'Axamemɨte'u'iyari kwaimuxari haa heima muyeka hepaɨ mekani'aneneni,
wakwie 'axakani'itɨarieka,
mepɨkateta'uximayatari kaxie harawerita.
19 Xɨri meta kwie muwaki hepaɨ
'ɨwi hayari yapauka kemɨti'itse,
mɨpaɨta 'axateyuruwamete mɨki teukiyapa mepɨteheukahapawa.
20 Wamaamatɨtɨ pɨwaratɨmai,
kwitsiterixi mepɨwakwa'a,
xewitɨ tawariri pɨkawaraye'erieni,
mepawitewa kɨyexi hepaɨ.
21 'Uka mɨkaniwewe mepɨnanaima, 'uka tɨɨri mɨkawarexeiya,
hatsuaku wiuraxi wahetsie timieme 'aixɨa mɨti'ane mepɨkatewautɨwe.
22 Matsi Kakaɨyari, yɨtɨrɨkariyakɨ, waɨkawa memeuka'u puwarehapana,
kepauka Kakaɨyari manukukeni wahepaɨtsita, xewitɨ 'ayeyuritɨ pɨkayuhayewa.
23 Kakaɨyari kaniwapitɨaka 'aixɨa 'iyari memu'uwanikɨ,
matsi wataxeiyatɨ pɨkatihayewa.
24 Yapaɨmexɨa 'aixɨa mepɨtexeiyarieni,
matsi yapaukata pɨtiukumamawere,
tixaɨtɨ mepɨkatehayeitɨariwa, tupiriya memakututuwe hepaɨ,
tɨriku takari kemɨtikaxitewa hepaɨ.
25 ¿Kemɨ'ane neniuki ta'inɨatame kename yakɨ nehaine pɨtayɨni,
meta kemɨ'ane neniuki tixaɨtɨ pɨkarayeitɨani?»