32
'Erihu kemɨranuyeha titaxatake
1 Kepauka Kuwi hamikumama memuyuhaika memɨtehetima kename mɨkɨ heitserie mexeiya yu'eriekai, 'anari mepɨka'ita'ei. 2 Matsi 'Erihú Warakeri nu'aya Wutsi kiekame, Xamɨ nuiwarieya hetsie mumiemetɨkai, waɨkawa Kuwi hepaɨtsita kaniuyeha'ani, Kakaɨyari heitserie kahexeiyame mayeitɨakɨ, mɨkɨ pɨta yɨkɨmana heitserie hexeiyame mayuyeitɨakɨ. 3 Yaxeikɨata hamikumama memuyuhaika wahepaɨtsita kaniuyeha'ani memɨka'ɨyɨwekaxɨakɨ Kuwi memɨta'eiyakɨ meta hetsiena memɨte'ɨhɨakɨ. 4 Merikɨte 'Erihú kaniwatakwewiekaitɨni Kuwi 'akuxi katitaxatɨawetɨ, mɨkɨ waɨkawa wiyari memexeiyatɨkateikɨ, 5 matsi kepauka mɨwaruxei memuyuhaika meka'utiniukame, waɨkawa kaniuyeha'ani. 6 Hikɨ kaniutaniuni 'Erihú Warakeri nu'aya Wutsi kiekame:
Matɨari 'Erihu kemutayɨ
«Ne yemekɨ nepɨtemaikɨ, xemeta xepu'ukirawetsixi,
'ayumieme waɨkawa nepumakai
kenemɨtiku'eriwa yanemɨtayɨnikɨ.
7 Mɨpaɨ nepɨtiunehɨawixɨ: “'Ukirawetsixi meri meke'utiniuni kememɨte'uyemate,
'ukirawetsixi meri kememɨtemaiwawe meke'itahekɨata”.
8 Matsi tewi meitimaitɨyeikanikɨ mupitɨa
'iyari hetsiena mɨyeka kanihɨkɨtɨni,
Naimekɨmɨtɨrɨkaɨye 'iiya 'ipitɨakaku.
9 'Ukirawetsixi xeikɨa memɨtemaiwawe mepɨkahɨkɨ,
meta 'ayumaitɨ xeikɨa pɨkaretimani tita mɨtiheitserie.
10 »'Ayumieme waɨkawamekɨ nepɨxewawirie, xemɨnetsi'enienikɨ,
netatsiere 'etsiwa nepɨrexeiya nemɨtixetaxatɨanikɨ.
11 Mexi xetekuxatakai, kayuwatɨ nepɨtikatei nexekwewietɨ
meta nexe'enietɨ 'aixɨa kexemɨtekuxatakaikɨ,
mexixi niuki xewautɨwekai,
12 yemekɨ waɨkawamekɨ nepi'eni.
Matsi 'akuxi xepɨkayɨwawe yaxemɨtehetimanikɨ kename Kuwi yuri ka'utaine,
xewitɨ pɨka'ita'eiyawe mɨkɨ kemɨtikuxatakɨ.
13 Mɨpaɨ xepɨkahaitɨkani: “Tameri mɨtimaiwenikɨ mɨ'ayumieme tepukaxei,
Kakaɨyari ke'ita'eiya, matsi teɨteri pɨkatixaɨ”.
14 Kuwi nehepaɨtsita 'atsipɨkahaine,
meta ne xehepaɨ nepɨkatita'eiya.
15 »Kuwi, 'ahamikuma mepuyuxamurie,
mepɨkayɨwawe memuti'anikɨ, niuki pɨwareuyehɨwa.
16 ¿Neta kayuwatɨ netiyerɨni,
mɨkɨ memɨkamatsi'uta'eikɨ?
17 Netatsiere nepɨrexeiya yanemɨtayɨnikɨ,
meta nematsiɨkɨme nepayeitɨani kenemɨtiuyematekɨ.
18 Niukikɨ nepɨka'ixɨa,
'iyari nehetsie mɨyeka waɨriyarika pɨnetsipitɨa nemɨtaniunikɨ.
19 Winu pɨteyutsie mɨyema hepaɨ nekani'aneni,
winu nawi kɨxauriyari mɨhekwatsie yematɨ mɨtatsanirɨme hepaɨ.
20 Peuyewetse nemɨtaniuni meta nemɨnenɨtɨanikɨ,
neteni nepanutayepieni yanemɨtita'anikɨ.
21 Ne xeime hetsiemieme nepɨkataniuni,
meta xeime witsinepɨkatitahɨawe.
22 Ne xeime witsinepɨkareutaxatɨawe,
xɨka mɨpaɨ netiutiyurieni, kemɨ'ane mɨnetsi'utawewi pɨnetikwinitɨani.