40
1 Yaxeikɨata Yawé Kuwi mɨpaɨ katiniutahuawe:
2 «¿Kemɨ'ane Naimekɨmɨtɨrɨkaɨye mɨniukima tiyɨwe mitaheitseritɨanikɨ?
Kakaɨyari ke'uta'eiya kemɨ'ane hetsiena mɨtiuhɨpa».
3 Hikɨ Kuwi mɨpaɨ katinita'eiya:
4 «Yanemɨmatita'eiyakɨ nepɨkayɨwe, tixaɨtɨ nepɨkatihɨkɨ,
Nemamakɨ netenie nepuwiere.
5 Heiwa yaneputayɨ, tawari yanepɨkatayɨni,
hutarieka neputaniu, tawariri waɨriyarika nepɨkayupitɨani».
6 Hikɨ Yawé Kuwi mɨpaɨ katiniuta'eiya 'eka tɨrɨkaɨyemetsie. Mɨpaɨ katinitahɨawe:
7 «Kene'akuha'aritɨaka nehetsɨa kenaye'a.
Ne nekamaniti'iwawiyamɨkɨ, 'ekɨta pekaneniku'eiyamɨkɨ.
8 »¿Kamɨtsɨ ne heitserie kenemɨrexeiya tixaɨtɨ pekarayeitɨani?
¿Nehetsie perahɨani 'ekɨ heitserie pehexeiyatɨ pemayanikɨ?
9 ¿'Amamá kuta nemamá hepaɨ titɨrɨkaɨye?
¿'Aniuki kuta neniuki hepaɨ tiutatɨrarɨka?
10 Xɨka'aku peyɨweni, keneuyukunama witsi'anemekɨ xawatɨmekɨ,
kenematsiɨkɨni 'aixɨa petiuka'iyaritɨ meta pemariwetɨ.
11 'Ahaxɨa mɨtiyumemiwa keneutatua,
memuyuti'ɨre pewaxeiyatɨ tixaɨtɨ mekatehɨmetɨme keniwarayeitɨa,
12 memuyuti'ɨre keniwaruxeiya tixaɨtɨ mekatehɨmetɨme keniwarayeitɨa,
'axamemɨte'u'iyari keniwarutipɨna hakewa tsepa meme'uwa.
13 Yunaime tumuanaripa keniwarukateuki,
keniwaruti'eimaka muwatixawatsie keniwareukaxɨri.
14 Ne, nehetsie yanepɨretimani,
'amamá tserieta wikweitsitɨarika muxuawekɨ.
15 »'Eripaniti keneuxeiya, nemitawewi 'ahepaɨ,
tupiriyakɨ xeikɨa mɨtiyumikwa tuurutsixi kwietsanamete wahepaɨ.
16 Kepaɨmetɨ tɨrɨkariyaya naiparieyatsie puxuawe.
Tɨrɨkariyaya 'ameukunenere hukayatsie kanixuaweni.
17 Kwaxieya kariuxa kɨyeyari hepaɨ pɨtiuyuane,
teuriteya tatayari pɨyutsatɨka.
18 'Umeteya purunitse tepɨayari hepaɨ pɨtitsetse'i,
watuteya tepɨa muka'utɨka hepaɨ pɨ'anene.
19 Ketita nemɨtiutiwewi mɨkɨ pumexɨakame,
ne xeikɨa, Nemitawewi, nepɨyɨwe hetsɨana nemɨye'anikɨ 'ixipara ne'akwetɨ.
20 Yemurite 'ikwaxi hetsienamieme katiniutixuawitɨwani,
mana mekaniutinanautsani yeutari.
21 Tuturi 'ayeyeutɨ meumanetɨka hapa mɨye'uwa hetɨa me'axetɨ mekaniuka'uxipiweni,
hakatsata mekaniuyuti'awiwietani haa mayematsie.
22 Tuturi 'ayeyeutɨ meumanetɨka yu'etɨpiwari kaniwapitɨaka,
hapuri hatetsita meuta'utɨka kaniti'eimani.
23 Tsepanetɨ haa muwayenena menutawaya waɨkawa tɨrɨkaɨyetɨ mɨkɨ pɨka'utimamawe,
kayuwatɨ kanayeyurini tsepanetɨ Kurutani hatuxameyari tsurieyatsie mɨreutawaya.
24 ¿Kemɨ'ane hɨxiena puyeyeiwe miwiyakɨ?
¿Kepaikɨ pɨyɨwe tsurieya muwiyakɨ yamɨkatiyurienikɨ?