1 Yawé Muitsexi mɨpaɨ katiniuta'aitɨani 2 'ixaheritsixi mɨpaɨ mɨtiwatahɨawekɨ: «Xɨka xewitɨ kemutayɨkɨ 'imikieriyari Yawé yetuiriemɨkɨ tewi kemɨraye'axekɨ, 3 yakatiniyutuamɨkɨ kepaɨmemekɨ mu'inɨaritsie:

»'Ukitsi xeitewiyari wiyari memexeiyatɨkatsie tsutɨtɨ haika tewiyari wiyari memexeiyatɨkatsie meye'atɨkaitɨ, mɨkɨ pɨtiyutuiyaka huta tewiyari heimana tamamata pɨrata tuminiyari, tukita keraye'akamekɨ memɨteyukutuaya hepaɨ.

4 »'Ukarawetsixi wahekɨ xeitewiyari heimana tamamata pɨrata tuminiyarikɨ.

5 »'Ukitsita 'auxɨwime wiyari memexeiyatɨkatsie tsutɨtɨ xeitewiyari wiyari memexeiyatɨkatsie meye'atɨkaitɨ, xeitewiyari tuminiyarikɨ mekateniyutuakakuni, yaxeikɨata tamamata tuminiyarikɨ pɨtiyutuiyaka 'ukarawetsixi mɨpaɨ paɨmeme wiyari memexeiyatɨka wahetsiemieme.

6 »'Ukitsi tɨɨrixi xeimetseri memexeiyatɨkatsie tsutɨtɨ 'auxɨwime wiyari memexeiyatɨkatsie meye'atɨkaitɨ, 'auxɨwime 'inɨariyarikɨ pɨtiyutuiyaka, meta haika 'inɨariyarikɨ katiniyutuiyakamɨkɨ 'ukari tɨɨrixi wahetsiemieme mɨpaɨ paɨmeme wiyari memexeiyatɨka.

7 »'Ukitsi 'ukirawetsixi haika tewiyari wiyari memɨhɨtɨka mautiyune tamamata heimana 'auxɨwime 'inɨariyarikɨ pɨtiyutuiyaka, meta tamamata 'inɨariyarikɨ 'ukarawetsixi mɨpaɨ paɨmeme wiyari memexeiyatɨka wahetsiemieme.

8 »Matsi kemɨ'ane kemutayɨkɨ 'imikieriyari mɨyetuani xɨka ka'i'axeni mɨtiyutuanikɨ kemɨraye'axe, mɨkɨ kaniyemieni mawari wewiwame hetsɨa mɨkɨ kananukahɨwiyariemɨkɨ, pɨtiyutuani xeikɨa kepaɨ mɨ'axeni.

9 »Matsi xɨka Yawé mawari mɨyetuiriyarieni tewa hɨkɨtɨni, mɨkɨ patsietɨ kaniyuhayewamɨkɨ Yawé mɨyetuiriyariekɨ. 10 Pɨkayɨweni mipatakɨ xeime 'aixɨa 'anemekɨ xeime 'axa'anemekɨ, meta 'axamɨ'anekɨ xeime 'aixɨa 'anemekɨ. Xɨka xe'ipata xeimekɨ, mɨkɨ yuhutatɨ mepatsietɨ mekaniyuhayewakuni.

11 »Matsi xɨka Yawé mawari mɨyetuiriyarieni tewa hɨkɨtɨni mɨka'itiya, mɨkɨ mawari wewiwame hetsɨa kananuhaniemɨkɨ, 12 mɨkɨ yapɨtayɨni kemɨraye'akani. Kemɨtika'inɨatsieni mawari wewiwame kemutiu'inɨaritaxɨ kanitanaki'eriwamɨkɨ, tsepa kemɨ'aneni. 13 Xɨka kutsiyarieya tiyutuamɨkɨ hutarieka minanenikɨ yutewa, mɨkɨ katiniyutuamɨkɨ 'auxɨwimeyaritsie mieme tawari xei'inɨariyari kaniyetuamɨkɨ tuminiyari mawari wewiwame kemɨtika'inɨatsirieni.

14 »Xɨka xewitɨ yukii Yawé yetuirieni, mawari wewiwame yakanitayɨmɨkɨ kemɨraye'aka. Mawari wewiwame kemɨtayɨni yapɨtika'inɨaritɨkani, tsepa kemɨtitita. 15 »Yukii Yawé mɨyetuiri mipatakɨ xɨka yukiikɨ tiyutuamɨkɨni, mɨkɨ 'auxɨwimeyaritsie mieme xei'inɨariyari tawari kaniyetuamɨkɨ mawari wewiwame kemɨti'inɨaritɨatsie, mɨkɨ kii 'ana piinieya kanayeimɨkɨ.

16 »Xɨka xewitɨ yukwie yetuani Yawé hetsiemieme, yakatini'inɨaritɨariemɨkɨ kepaɨmetɨ 'imɨariyari mɨtinakeni mana hetsiena mɨka'etsienikɨ, huta tewiyari heimana tamamata tuminiyari katinaye'akamɨkɨ, huta tsienituyari heimana xeitewiyari rituruyari tsewara 'imɨariyari tinaketɨ mɨka'etsieni xexuimetsie. 17 Xɨka yukwie yetuani mematatuiwa wiyariyaritsie 'aye'ayu, kemɨtika'inɨari mɨpaɨ pɨraye'aka. 18 Matsi xɨka 'arike 'iyetuirieni mematatuiwa wiyari 'anutiyayu, mawari wewiwame yakatinika'inɨaritamɨkɨ kepaɨmetɨ wiyari meuyewekani tawari mematatuiwa wiyari maye'anikɨ, mɨpaɨ paɨmemekɨ kananukaxɨriyariemɨkɨ.

19 »Kemɨ'ane yukwie mɨyetua Yawé hetsiemieme, xɨka yemekɨ 'inanaimɨkɨ hutarieka, 'auxɨwimeyaritsie mieme xei'inɨariyari tawari kaniyetuamɨkɨ mawari wewiwame kepaɨmeme mitaxatɨatsie, 'ana mɨkɨ tipiinieya kanayeimɨkɨ. 20 Matsi xɨkari ka'inaneni yatɨni xeime 'utuirieni pɨkayɨweniri tawari hetsiena mieme mayanikɨ. 21 Kepauka mematatuiwatsie mɨkɨ kwie mɨyetuiyanikekaitsie, mɨkɨ patsietɨ puyuhayewa Yawé hetsiemieme, mɨkɨ mawari wewiwame hetsiemieme payani.

22 »Xɨka xewitɨ kwie 'unaneni 'ahurawa 'iwaya kakwieyatɨkaku, meta Yawé hetsiemieme mayanikɨ 'iyetuani, 23 mawari wewiwame 'iti'inɨatame yakanitayɨmɨkɨ yamɨraye'akakɨ kepaɨmetɨ meuyewetse mematatuiwa wiyari maye'anikɨ. 'Ana kwitɨ yukwie mɨyetua kemɨraye'akani katiniyutuamɨkɨ, mɨkɨ Yawé hetsiemieme kanipatsieka. 24 Mematatuiwatsie wiyari, kwie meripaitɨ memɨkutsiyarimamatɨkai hekwamekɨta kutsiyarimama mepakɨne.

25 »Naitɨ pɨti'inɨatsieni pɨrata tukita keraye'akamekɨ memɨteyukutuaya, tamamata kɨramuyari xeituminiyari rahetetɨ.

26 »Matsi, xewitɨ tɨma pɨkayɨweni matɨari mieme yutewa mɨyetuanikɨ, yuwakaxi yatɨni yumuxa, matɨari miemetexi Yawé hetsɨa memumiemetekɨ. 27 Xɨka tewatsiekate memɨka'itiya mehɨkɨtɨni, pɨyɨweni mɨnanaiyanikɨ mawari wewiwame kemɨtiu'inɨaritaxɨ mɨpaɨ paɨmeme yetuame, matsi tawari 'auxɨwimeyaritsie mieme xei'inɨariyari kaniyetuamɨkɨ. Xɨka ka'inaneni mawari wewiwame kemɨti'inɨarita mɨpaɨ katinituiyamɨkɨ.

28 »Xewitɨ tɨma pɨkayɨweni yupiinitɨkai mɨtituanikɨ meta minanenikɨ, tsepa mɨtitewi, tewaxi yatɨni maku'etsakaitsie, xɨka pe'iyetuani Yawé hetsiemieme mɨrayanikɨ yuheyemekɨ. Naitɨ Yawé mɨtiyetuiriyarɨwa waɨkawa kanipatsieka Yawé hetsiemieme. 29 Xewitɨ tewi mɨyetuiya pɨkayɨweni mɨnanaiyanikɨ, matsi mɨkɨ kanimieriemɨkɨ.

30 »Tamamatatsie mieme xeime naitɨ kwiepa mɨtiutixuawerixɨ, tsepa tita memɨte'uka'e 'uriyari ya'ikwaxi kɨyetsiemieme, Yawé hetsɨa katinimiemetɨni, mɨkɨ katiniyetuiriyarieka. 31 Xɨka xewitɨ tamamatatsie mieme xeime yetuame 'inanaimɨkɨni, kemɨraye'aka kaninanaimɨkɨ matsi tawarita 'auxɨwimeyaritsie mieme xei'inɨariyari kaniyetuamɨkɨ. 32 Tamamatatsie mieme xeime wakaxi meta muxa, tamamatatsie xewitɨ 'inɨaritɨ mɨkɨ kanipatsieka Yawé hetsiemieme. 33 Tewaxi wahɨweme yɨkɨ pɨkatiwaxeiyani 'aixɨa memɨ'anene meta 'axamemɨ'anene, meta xeimekɨ pɨka'ipatani. Matsi xɨka xeimekɨ 'ipata yuhutatɨ mepatsietɨ mekanakɨnikuni meta pɨkayɨweniri minanenikɨ».

34 'Ikɨ 'aitsikate kanihɨkɨtɨni Yawé Muitsexi mɨyetuiri 'ixaheritsixi wahetsiemieme, Tsinahi yemuriyaritsie.