1 Merikɨtsɨ 'anapaitɨtɨ tawarita yumɨiretɨ teɨteri meyukuxeɨrieku, 'ikwai mekahexeiyakaku, Ketsutsi yu'aurie teyɨ'ɨkitɨwamete warutakwewieka, mɨpaɨ katiniwarutahɨawe:

2 —Ne 'ikɨ teɨteri nepɨwareunenimaya, haika tukariri mekaniyurieka nehetsɨa meta 'ikwai mepɨkahexeiya. 3 Meyehakakwitɨweme xɨka newareutanɨ'axɨani wakie, huyeta mepe'amɨxɨani, hipatɨ 'ateewa paitɨ mekanikiekataritɨni.

4 Hikɨ teyɨ'ɨkitɨwamete mɨpaɨ mekatenita'eiya:

—¿Hakewa tepeikaxeiya paa mɨyapaɨmeme 'ena makumawetsie temɨtewaminikɨ?

5 Ketsutsi mɨpaɨ katiniwaruta'iwawiya:

—¿Kepaɨmeme paa xepexeiya?

Mɨkɨ mɨpaɨ mekaniutiyuani:

—'Atahutame.

6 Hikɨ katiniuta'aita teɨteri memukuyaxixɨanikɨ kwiepa. Paa 'atahutame 'anu'ɨka, pamɨpariyutsi Kakaɨyari kaniupitɨani, hikɨ kanititara paa meta teyɨ'ɨkitɨwamete kaniwayetuirieni memɨwata'ɨitɨanikɨ teɨteri, hikɨ mɨkɨ mɨpaɨ mekatenikakɨne. 7 Yapaɨmemeta ketsɨte mekaniwarexeiyakaitɨni 'etsimemɨpepe. Pamɨpariyutsi 'ipitɨaka Kakaɨyari, meta katiniuta'aita ketsɨte memɨmikienikɨta. 8 Teɨteri mekateniukwani yemekɨ mekaniutihuxani. 'Arike teyɨ'ɨkitɨwamete mekanikuxeɨrieni tarimeyari muyuhayewaxɨ, 'atahuta tsikɨiwitiyari hɨpɨnetɨ patɨa. 9 Memɨte'ukwai 'etsiwatɨkaku nauka miriyari mekaniyupaɨmekaitɨni. Hikɨ warutateutɨaka, 10 teyɨ'ɨkitɨwamete wahamatɨa yunaitɨ kanuwatsie mekanikayaxe, Rarumanuta mɨrakutewatsie mekanekɨne.

11 Hikɨ paritseutsixi mekaniu'axɨani, mekanitsutɨani niuki mexɨatɨatɨ hamatɨana, me'iwawirietɨ 'inɨari memɨxeiyakɨ muyuawitsie mieme, me'i'inɨatakutɨ. 12 Mɨkɨ 'uka'ietɨyaka mɨpaɨ kaniutayɨni: «¿Titayari 'inɨari mamariwaweme meteku'iwawa hikɨ miemete? Yurikɨ mɨpaɨ nepɨtixekɨhɨawe, yemekɨ 'inɨari mepɨkapitɨarieni hikɨ miemete». 13 Waruku'eirieka hutarieka kanakayerɨni kanuwatsie, 'anutaɨye paitɨ kaneyani.

14 Merikɨtsɨ teyɨ'ɨkitɨwamete 'ikwai memanu'ɨnikekai mepɨtehatɨmai, xeime xeikɨa mepexeiyakai paa kanuwatsie.

15 Hikɨ Ketsutsi mɨpaɨ katiniwaraye'eritɨani:

—Yumarima 'aixɨa xekeneyukweriwayurieka tiyukuxanariyame hepaɨtsita paritseutsixi wahetsɨa mieme meta Herurexi hetsɨa mieme hepaɨtsita.

16 Mɨkɨ mɨpaɨ mekateniyutahɨawekaitɨni: «Paa temɨkaheye'ɨikɨ mɨya kanaineni».

17 Ketsutsi retimaika kememɨteyɨtahɨawekai, mɨpaɨ katiniwarutahɨawe:

—¿Titayari niuki xetexɨatɨa paa tepɨkahexeiya xeteyɨkɨhɨawetɨ? ¿Xekate'enana, xekatemaiwawe 'akuxi? ¿Xe'iyari 'akuxi titsetse'i? 18 ¿Xehahɨxitɨkaitɨtɨ xekateheuneniere, xe'unakatɨtɨ xekateheu'enana? ¿tixaɨtɨ xekateha'eriwa? 19 'Auxɨwime payari ne'utitaraku 'auxɨwime miriyari wahetsiemieme, ¿kepaɨmeme kiriwayari hɨpɨneme xepukuxeɨri muyuhayewaxɨ?

Mɨkɨ mɨpaɨ mekaniutiyuani:

—Tamamata heimana hutame.

20 Tawarita mɨpaɨ katiniwarutahɨawe:

—Meta kepauka 'atahuta payari nemutitaraxɨ nauka miriyari wahetsiemieme ne'utitaraku, ¿kepaɨmeme kiriwayari xepukuxeɨri muyuhayewaxɨ?

Mɨkɨ mɨpaɨ mekaniutiyuani:

—'Atahutame.

21 Hikɨ mɨpaɨ katiniwarutahɨawe:

—¿'Akuxi xekatehetimaiwawe?

22 Hikɨ mekaneta'axɨani Wetsaira paitɨ. Hikɨ mana teɨteri mekani'atɨirieni tewi kaheuniereme, waɨriyarika me'ipitɨatɨ mimayɨanikɨ. 23 Hikɨ mɨkaheunierekai mamayatsie tiwiereka, kiekari tetsita paitɨ kaneihana. He'aɨtsikamaxɨaka hɨxitana, hetsiena 'utimeka, mɨpaɨ katinita'iwawiya:

—¿Hikɨri petiniere?

24 Hikɨ 'anieretɨyaka mɨpaɨ kaniutayɨni:

—Teɨteri nepɨwaxeiya, meta 'iteɨri muku'uwani hepaɨ nepɨtiniere.

25 Hikɨ hutarieka hɨxitana neumeixɨani, tewi kananutaniere: 'aixɨa reunieretɨ kanayani, naime katiniuxeiya yemekɨ. 26 Hikɨ Ketsutsi kanitanɨ'ani kiena mɨpaɨ titahɨaweka:

—Kiekaritsie pepɨkaheumieni, xeime pepɨkaraxaxatɨwani.

27 Hikɨ Ketsutsi teyɨ'ɨkitɨwamete wahamatɨa yunaitɨ mekanekɨne, kiekarite 'etsimɨyeyeutsie mekaniu'uwakaitɨni Tsetsareya Piripu 'aurie. Hikɨ huyeta me'uhutɨ, mɨpaɨ katiniwaruta'iwawiya teyɨ'ɨkitɨwamete:

—¿Teɨteri keme'utiyuane kemɨ'ane nepɨhɨkɨ ne?

28 Mɨkɨ mɨpaɨ mekatenita'eiya:

—Hipatɨ mɨpaɨ mekaniutiyuaneni, Wani Ti'ɨyame kename pehɨkɨ, hipatɨta 'Eriyaxi kename pehɨkɨ, hipatɨta xewitɨ Kakaɨyari niukameya kename pehɨkɨ.

29 Hikɨ mɨpaɨta mɨkɨ katiniwaruta'iwawiya:

—¿Xemete kexe'utiyuane, kemɨ'ane nepɨhɨkɨ ne?

Pekuru mɨpaɨ katinita'eiya:

—'Ekɨ Kɨritsitu pekanihɨkɨtɨni.

30 Hikɨ kaniwaruhɨritɨani hepaɨtsitana nixeime memɨkatehaxaxatɨwanikɨ.

31 Hikɨ kanitsutɨani tiwa'ɨkitɨatɨ, mɨpaɨ 'utaitɨ:

—Kaneuyeweka 'akuxi ne Yuri Tewi kenemɨtitewa waɨkawa nemɨtikwinekɨ, ta'ukiyarima, mawari wewiwamete tewa'aitɨwamete, meta 'inɨarikɨ memɨte'ɨkitamete mekanenitixani'eriekuni. Kaneuyeweka nemɨmierienikɨ, meta hairieka tukaritsie nemanukukenikɨ.

32 Mɨpaɨ katiniwakɨhɨawekaitɨni hahekɨakamekɨ katiwaranukanamirietɨ. Hikɨ Pekuru yatewa heiwitɨka kanitsutɨani 'iku'imaiyatɨ. 33 Ketsutsi ta'aurie 'aweka, hipame waruxeiyaka teyɨ'ɨkitɨwamete, Pekuru kaniuta'imaiya mɨpaɨ 'utaitɨ:

—Xaɨtsie keneuye'a Kauyumarie. 'Ekɨ Kakaɨyari hepaɨ pepɨkare'iyari, teɨteri wahepaɨ xeikɨa pepɨre'iyari.

34 Hikɨ yu'aurie warutakwewieka teɨteri meta teyɨ'ɨkitɨwamete, mɨpaɨ katiniwarutahɨawe:

—Tewi xɨka yuwaɨriyani nehamatɨa muyeikanikɨ, ketihayewani kemɨtinake yuhetsiemieme tiyurienetɨ, keyuwaɨriyani tsepa kuruxitsie mɨmierie, meta nehetsie ketiwiyani. 35 Kemɨ'ane yutukari mɨwikweitsitɨamɨkɨ kanitatɨmaiyamɨkɨ, peru kemɨ'ane yutukari mɨtatɨmaiya nehetsiemieme, niuki 'aixɨa manuyɨne hetsiemieme, mɨkɨ kanitawikweitsitɨamɨkɨ. 36 Tixaɨtɨ pɨkarayeika xɨka tewi kwiepa timieme naime ra'iwa, yaxeikɨa yutukari kanitatɨmaiyamɨkɨ. 37 Nixewitɨ pɨkayɨwe mɨtiyutuani yutukari hetsiemieme. 38 Hikɨ miemete hipame wa'ɨitama memɨwakumaɨwa 'axamemɨteyuruwa watsata 'uyeikatɨ, kemɨ'ane mɨnetsitewiya mitewiya neniuki, neta Yuri Tewi kenemɨtitewa nekanitewiyakamɨkɨ 'iya kepauka nemunuani ne'ukiyari hepaɨ nemariwetɨ, netupiritsixima memɨpatsie Kakaɨyaritsie mieme wahamatɨa.