1 Nitsani metseriyaritsie 'ari xeitewiyari wiyari 'Aritakexiketsi ti'aitakaku, ti'aitame winu ne'uhanitɨaku, mɨkɨ meripaitɨ nenutuixiekame mɨkanetsixexeiyakaikɨ, 2 mɨpaɨ kanetiniuta'iwawiya:

―¿Titayarikuta petinutuixie? Wa'atɨ matsi pepɨkatikuye, xɨari tixaɨtɨ pɨta kukwiniya pɨmatiyuriene.

Ne waɨkawa nepekamatɨya 3 mɨpaɨ nekatinita'eiya:

―Ti'aitame waɨkawa tukari pekepitɨarieka. ¿Titayarikuta nekatinutuixieka, panatsi kiekaritsie ne'ukiyarima memakateukie naitɨ kaheka'unarie meta 'ituparite naitɨ kahetata'i?

4 Ti'aitame mɨpaɨ kanetiniuta'iwawiya:

―¿Kekuta netiyurieni 'ahetsiemieme?

Ne nepitawawiri Kakaɨyari muyuawitsie makawe mɨnetsiparewienikɨ, 5 mɨpaɨ nekatinita'eiya:

―Ti'aitame xɨka metsinakeni, xɨka waɨkawa nematsiparewieka, nematsiwawirie Kura kwieyaritsie pemɨnetsi'anunɨ'anikɨ para kiekari nemanukuketɨanikɨ ne'ukiyarima mematihetsie.

6 Ti'aitame mɨpaɨ kanetiniuta'iwawiya, 'uka mɨti'aitame 'auriena 'utikaiku:

―¿Kekuta pereuyetere? ¿Kepauka kuta pepakunuani?

Kepauka yanemɨtitaxatɨa ti'aitame yakatiniutanaki'erieni nemɨyemiekɨ. 7 Tawarita mɨpaɨ netinitahɨawe:

―Ti'aitame 'ahepaɨtsita xɨka 'aixɨa 'aneni, xapa keniwaranunɨ'airi kuwexinaruritsixi tau makayuyuipike hepatsie memɨtama wahetsɨa haa 'Eupɨrate manuyekatsie, para heitserie nemuyanikɨ Kura kwieyaritsie nemeta'anikɨ, 8 ximɨxi nematsiwawirie huku mɨ'ɨwiya 'Atsahapi mɨpaɨ pemɨtitahɨawekɨ huku kɨyeyari mɨnetsiminikɨ, tukita 'itupari nemeuwɨtɨaxɨanikɨ, meta kiekari kuraruyari hetsiemieme meta kiita hakewa nemayekani hetsiemieme.

Ti'aitame yakatiniutanaki'erieni kenemɨrewawiriwakai, Kakaɨyari mɨnetsiparewiekaikɨ. 9 Kepauka nemeta'a kuwexinaruritsixi tau makayuyuipike hepatsie 'Eupɨrate 'anutaɨye kiekatari wahetsɨa, xapa neniwarehuritɨani ti'aitame hetsɨa mieme. Metatsiere ti'aitame mɨpaɨ tiniuta'aitakaitɨni kename kuyaximama kawayutsixi wahetsie memutei meta memɨtewa'aitɨa menetsi'anuteɨtakekai. 10 Peru Tsamɨwarati huruni tewiyari meta Tuwiyaxi 'amuni tewiyari ti'uximayatame, pɨkawarunakixɨ mɨpaɨ mete'u'enanaka kename xewitɨ nuakai 'ixaheritsixi wahetsie tanuanike.

11 Merikɨte haika tukari 'anukamiekaku Kerutsareme nenuaka, 12 tɨkarikɨ nekaniwayeyani hipame teɨteri newarawitɨtɨ, peru xeimetɨma 'atsinepɨkarahɨawekai Kakaɨyari kemɨnetiku'iyaritɨwakai Kerutsareme hetsie kenemɨtiyurienikekai. Xeime xeikɨa mura tepahanakai tatsɨari ne nemanakatei. 13 Mɨkɨ tɨkaritsie nepuwayetɨa Mayeweri kitenieyaritsie nekaneuyehani, haixa Yawi Mayu'eriya mɨtitewa matiniere hepatsie meta Xatsi kitenieyari manuwietsie hepatsie. Kerutsareme kuraruyari nekaniuxeiya mu'uni meta 'itupariyarite naitɨ mɨxɨxɨwi. 14 Nekaneyanita Haixata kitenieyari hepatsie meta haa mayema Ti'aitame hetsiemieme, peru huye nepɨka'ukaxei ne'anakaitɨ muwa nemeutahanikekai. 15 Hikɨ 'uyɨwikaku 'akuxi 'aki'utɨma nekaneutayune kuraru ne'uxeiyarɨmetɨ. 'Imatɨrieka nekanakunuani Mayeweri kitenieyaritsie nekaneutahani.

16 Kuwexinaruritsixi 'atsimepɨkatehetima hakewa nemanutɨa meta kenemɨrekuyuri, 'ana 'akuxi nixeime huriyu tewiyari mɨpaɨ nepɨkatitahɨawiwekai: mawari wewiwame tɨma, 'ukirawetsixi meta, nitɨma kuwexinaruritsixi meta kemɨ'ane memɨteta'uximayatakekai. 17 'Ayumieme mɨpaɨ nepɨtiwarutahɨawixɨ:

―Xeme xemunenierixɨ xepɨhɨkɨ ketemu'itɨarie. Kerutsareme pu'uni, 'itupariyari pɨxɨxɨwi taikɨ. Hikɨmɨtɨka, xekeneuyuwaɨriya. Kerutsareme kuraruyari 'aixɨa tepuyurieni para hipatɨri tawarita memɨkatatsinanaimakakɨ.

18 Hikɨ nekatiniwarutaxatɨani Kakaɨyari kemɨnetiparewiekai, yanekaniutayɨni ti'aitame kemainekai. Mɨyamete'u'enanaka mɨpaɨ mekaniutiyuani:

―Hikɨmɨtɨka tekatenita'uximayatakuni.

Kememutiyua yamekateniuyurieni.

19 Kepauka yamemɨtehetima Tsamɨwarati huruni tewiyari, Tuwiyaxi 'amuni tewiyari ti'aitame parewiwameya meta Ketseni 'arawe tewiyari waɨkawa mekataninanaimakaitɨni metatsixani'erietɨ mɨpaɨ metateniku'iwawiyakaitɨni:

―Neuxei, ¿kexeteyurie? ¿Kamɨtsɨ ti'aitame kemɨkatinake xeteyurie?

20 Ne mɨpaɨ netiniwaruta'eiya:

―Kakaɨyari muyuawitsie makawe kataniparewimɨkɨ. Tame te'i'uximayatsiriwamete, tepikatsutɨani kiekari 'aixɨa temukuyurienikɨ. Xeme 'ena xepɨka'itsɨkate, xepɨkayɨwawe 'ena xemuyeniukanikɨ, Kerutsaremetsie kemɨtiɨyɨ xepɨkate'akumate.