10
Teɨteri yamekaniutiyuani yamemɨtekakɨnekɨ 'inɨari niukiyaritsie
1 'Ikɨ mekanihɨkɨtɨni memitseyuma:
Nehemiyaxi Hakariyaxi nu'aya kuwexinaruri mɨhɨkɨ,
Tserekiyaxi,
2 Tserahiyaxi, 'Atsariyaxi, Keremiyaxi,
3 Patsuxi, 'Amariyaxi, Marikiyaxi,
4 Katuxi, Tsewaniyaxi, Maruki,
5 Karini, Meremuti, 'Awiriyaxi,
6 Tanieri, Kinetuni, Waruki,
7 Metsurani, 'Awiyaxi, Mikamini,
8 Mahatsiyaxi, Wirikai meta Tsemahiyaxi.
'Ikɨ mawari wewiwamete mekanihɨkɨtɨkaitɨni.
9 Rewitsixi teɨteriyari:
Ketsuha 'Atsaniyaxi nu'aya, Winuhi, Henarari xiɨyarimama, Karimieri,
10 meta wa'iwama Tsewaniyaxi, Huriyaxi, Kerita, Perahiyaxi, Kanahani,
11 Mikahiyaxi, Xekuwi, Katsawiyaxi,
12 Tsakuxi, Tserewiyaxi, Tsewaniyaxi,
13 Huriyaxi, Wanihi meta Weninu.
14 Memanuyetei mana kiekatari:
Parutsi, Pakati, Muhawi, 'Erami, Tsatuhu, Wanihi,
15 Wunihi, 'Atsikari, Wewahi,
16 'Aruniyaxi, Wihiwahi, 'Arini,
17 'Atexi, 'Etsekiyaxi, 'Atsuxi,
18 Huriyaxi, Wetsahi, Katsumi,
19 Karipi, 'Anatuti, Newahi,
20 Makipiyaxi, Metsurani, Hetsixi,
21 Metsetsaweri, Tsaruki, Karuha,
22 Peratiyaxi, Kanahani, 'Anahiyaxi,
23 'Utseyaxi, Kananiyaxi, Katsuwi,
24 Haruketsi, Pirika, Tsuweki,
25 Xekuni, Katsawina, Matsehiyaxi,
26 'Ahiyaxi, Kanahani, 'Anahani,
27 Maruki, Karini meta Wanaha.
28 Meta hipatɨta teɨteri ―mawari wewiwamete, rewitsixi, kitenie tehɨwemete, kwikamete, tukita memɨte'uximaya, meta yunaitɨ kemɨ'ane memɨwaruku'eiriekai hipame teɨteri kwiepa memɨtama 'inɨari niukiyari memaye'atɨanikɨ, wa'ɨitama, waniwema 'ukitsi 'ukari meta yunaitɨ kemɨ'ane memɨ'enawawekai― 29 yu'iwama mekaniwarutinɨni memanuyetei, yurikɨ meyuhɨritɨatɨ yamekaniutiyuani kename yametekakɨne, yamemɨte'u'uwanikɨ 'inɨari niukiyari Kakaɨyari Muitsexi tiyu'uximayatsiriwame mɨyetuiri kemaine, meta yamemɨtekakɨnekɨ naime Yawé 'aitsikateyatsie. 30 Metatsiere yatekaniutiyuani taniwema temɨkawawikitɨatɨwenikɨ memɨka'ixaheritsixi 'ikɨ kwieyaritsie memu'uwa wahamatɨa meta memɨkawikietɨwenikɨ waniwema taniwema wahamatɨa. 31 Metatsiere yatekaniutiyuani xɨka teɨteri xaɨtsie kiekatari xawatikɨ me'u'axɨani metetuatɨ piinite tewaxi yatɨni tsepa kepauka 'ixɨarari hatinekaku, tame tixaɨtɨ tepɨkatenaneni. Yaxeikɨatatsiere tepɨte'uxa 'atahutarieka wiyaritsie tepɨkaka'eni, meta memɨtehapitɨka tepɨtewareuyehɨwirieni.
32 Mɨpaɨta tekateniuxata, tepiyetuayani nauka kɨramuyari raheteme pɨrata xeiwiyari 'anuyeyeikakaku, takakaɨyari tukita tita mɨreuyewetse hetsiemieme mayanikɨ: 33 paa Kakaɨyari hɨxie mamanarɨwa, mɨtiutimawarɨwani, meta mawari taiyariyari tukarikɨ yamɨtiutiwewiwa hetsiemieme, mawari xawati mieme, mawari metseri mɨhekwanitsie mieme meta 'ixɨarari mɨpatsietɨka mutiwewiwanitsie mieme, 'imikieri mɨpatsietɨka hetsiemieme, meta mawari 'ixaheritsixi ke'axamemɨte'uyuri memɨ'itiyanikɨ hetsiemieme, meta naime tita memɨteheuyehɨwa takakaɨyari tukita.
34 Kɨyexi temɨyetuayani hetsiemieme, teyunaitɨ 'inɨarikɨ tekaniuyuta'iwa, kemɨ'ane wahetsie mɨtinakekekai, mawari wewiwamete, rewitsixi meta teyunaitɨ teɨteri, mɨpaɨ temɨtemaikakɨ kemɨ'ane memi'atɨwani kepauka tukaritsie, xeiwiyari 'aye'axekaku, Yawé tukieyata mieme takakaɨyari, mɨtakakɨ mawarieya matiwewiwa, 'inɨari niukiyaritsie kemaine. 35 Yaxeikɨata yatekaniutiyuani Yawé tukieyata temɨteyetuayanikɨ xeiwiyari 'anuyeyeikakaku tawaxata mɨtikaxuawere matɨari timieme meta ta'iteɨritetsie timieme 'ikwaxi, 36 metatsiere muwa temɨwayetuayanikɨ taniwema matɨari miemete meta tatewama mexɨakate, wakaitsixi meta muxatsi, mawari wewiwamete wahetsɨa Kakaɨyari tukieyata memɨte'uximaya, kemɨreuku'uxa 'inɨari niukiyaritsie.
37 Metatsiere mɨpaɨ tekateniuxata temɨteyetuayanikɨ Kakaɨyari tukieyata timieme mɨtiwati'utsiwatsie, muwa tepiyetuani harina 'aixɨa mɨ'ane, meta hipame 'imikieri, ta'iteɨri 'ikwaxiyari, kaxie winuyari mɨhekwa meta hatseiti, mawari wewiwamete wahetsie timieme takakaɨyari tukita memɨte'uximaya. Metatsiere yatekateniuxata temiyetuanikɨ tamamatatsie mieme xeime tita temɨte'uka'etsa rewitsixi wahetsiemieme mɨrayanikɨ, mɨkɨtsɨ mekanihɨkɨtɨni naime 'ikɨ memɨte'uyetɨtɨkɨka 38 Xewitɨ mawari wewiwame 'Aruni xiɨyarieyatɨtɨ rewitsixi wahamatɨa kaniyemieni kepauka tamamatatsie mieme xeime hetsie timieme memɨtetɨyu. Rewitsixi tamamata hetsiemieme xeime tawarita mana hepaɨna paɨmeme mepɨte'anakapineni memiyetuayanikɨ Kakaɨyari tukieyata mɨtiuyepinetsie. 39 'Ixaheritsixi meta rewitsixi mekaniyetuayakuni 'imikieri, tɨriku, kaxie winuyari meta hatseiti mɨtipatsietɨka mɨtiuyepinetsie meta mawari wewiwamete memɨwayeyaxike wa'aurie, kitenie tehɨwemete meta kwikamete, kepauka memɨte'uximaya.
Mɨpaɨ tekateniuxata takakaɨyari tukieya mɨpaɨ temɨte'ɨwiyanikɨ.