1 Merikɨte 'Aruni niwemama mɨpaɨ mekatenaka'utɨarieni Muitsexi hamatɨa, kepauka Yawé Muitsexi hamatɨa mɨtiutixa Tsinahi hɨriyaritsie.

2 Mɨpaɨ mekatenaka'utɨarieni kememɨtetetewakai 'Aruni niwemama: Narawi matɨarimieme, 'Awihu, 'Eriyatsaxi meta 'Itamaxi 'imatɨreme. 3 Mɨkɨ 'Aruni tɨɨriyamama memanayexeiyarie memɨpatsie mekanihɨkɨtɨni, mawari wewiwamete te'uximayatamete memakɨnekɨ. 4 Narawi 'Awihu matɨari mekaniukwini Yawé hɨxie, kepauka makumawetsie Tsinahi mɨrakutewa memu'uwakai, mawari taiyariyari mekaniwaruwewirieni yakɨxeikɨa mɨhɨkɨ. Matsi Narawi 'Awihu hamatɨa tɨɨri memɨkawarayexeikɨ, 'Eriyatsaxi 'Itamaxi hamatɨa xeikɨa mekanimawari wewiwametetɨkaitɨni yupaapa tukarieya hepaɨtsita, 'Aruni hetsiemieme.

5 Yawé Muitsexi mɨpaɨ katiniutahaɨwe: 6 «Rewi xiɨyarimama keniwawitɨmie 'Aruni hɨxie keniwati'uitɨa. Rewitsixi mekaniparewikuni mɨra'uximayatsie. 7 'Aruni kemɨtiyurienekai yamekateniyuriekakuni hetsiena mieme meta yunaitɨ mana kiekatari, mewahɨritɨatɨ memɨte'uximayakakɨ mɨkɨ 'ixuriki tukiyarita. 8 Naime muwa mɨtiyepine 'ixuriki tukiyarita mekateni'ɨwiyakakuni, muwa mete'uximayatɨ 'ixaheritsixi, yamemɨteyuriekakɨ memɨte'uximayakakɨ meyɨhɨritatɨ 'ixuriki tukiyarita. 9 'Aruni, rewitsixi pekaniwahɨritɨamɨkɨ mɨtiwata'aitɨanikɨ meta waniwema. Mɨkɨ xeikɨa mekanihɨkɨtɨkakuni nehetsiemieme memɨte'uximayaka 'ixaheritsixi watsata. 10 'Aruni niwemama mawari wewiwametekɨ xeikɨa mekaniwaranayexeiyakuni. Kemɨ'ane kamawari wewiwametɨtɨ 'ixuriki tukiyarita mɨye'ani mɨkɨ kanimieriemɨkɨ kareuyehɨwiyarietɨ».

11 Yawé Muitsexi mɨpaɨ katiniutahɨawe: 12 «Ne 'Ixaheritsixi wanuiwaritsie rewitsixi nekaniwaranuyexeiya, matɨari nunuiwakate wahepaɨ. Rewitsixi nehetsɨa miemete mekanihɨkɨtɨni, 13 matsi matɨari nunuiwakate nehetsɨa miemete memɨhɨkɨkɨ. Kepauka 'Ekipitu matɨari nunuiwakate nemɨwarutayuniyaxɨtsie, 'ana nekaniwarupata nehetsɨa memɨmiemetetɨnikɨ matɨari nunuiwakate 'ixaheritsixi teɨteriyari, teɨteri meta tewaxi. 'Ayumieme hikɨ nehetsɨa mekanimiemetetɨni. Ne Yawé nekanihɨkɨtɨni».

14 Merikɨtsɨ Yawé Muitsexi mɨpaɨ katiniutahɨawe Tsinahi makumawetsie paitɨ: 15 «Rewi xiɨyarimama meta nuiwarimama kememɨyupapaɨme keniwaraka'utɨa, yunaime 'ukitsi xeimetseri memexeiyatɨka mana meutiyune».

16 Hikɨ Muitsexi kanitsutɨani waraka'utɨwatɨ, Yawé kemɨrehɨawekai yakatinikayani.

'Ikɨ mekanihɨkɨtɨni rewitsixi wanuiwarima, memaka'utsie kememɨte'ununuiwaxɨ.

21 Keritsuni hetsie memɨyenunuiwakai Riwini mekanihɨkɨtɨni Tsimi hamatɨa. 'Ikɨ kerutsunitsixi memɨwaraweiyakai mekanihɨkɨtɨni. 22 Yunaime 'ukitsi xeimetseri memexeiyatɨka mana meutiyune, 'atahuta miriyari heimana 'auxɨwi tsienituyari (7.500) 'ukitsi meyupaɨmetɨ mekanakɨne. 23 Keritsuni nuiwarimama memɨhɨkɨ tau manukayuyuipike 'aurie mekanikutekaitɨni tuki manuwe hetɨa. 24 Keritsuni nuiwarimama wa'ukiyari 'Eriyatsati kanihɨkɨtɨkaitɨni Raheri nu'aya. 25 'Ixurikite tukiyari hetsiemieme, Keritsuni nuiwarimama mekanihɨritɨariekaitɨni tuki manukanakaikɨ mɨreutahakitɨretsie, nawi manukawere 'ixurikite heima, 26 'ixuriki kuraruyari takwa maka meta 'ixuriki meuwu kuraru kiteniyaritsie meta mawari taiyame warita makatei, yaxeikɨata tinaime kɨmana mɨrakuwɨwɨre memɨtekumaɨwakai.

27 Kuhati hetsie mepɨyekɨ 'Amirani nuiwarimama, 'Itsaxi nuiwarimama, Hewuruni nuiwarimama meta 'Utsiheri nuiwarimama. 'Ikɨ Kuhati nuiwarimama mepɨhɨkɨtɨkai, 28 memɨte'uximayakai tukita. Yunaime 'ukitsi xeimetseri memexeiyatɨka mana meutiyune, 'atahaika miriyari heimana 'ataxewi tsienituyari (8.600) mekaniyupaɨmekaitɨni 'ukitsi. 29 Kuhati memaweiyakai tuki manuwe tserieta mekanititekaitɨni. 30 Kuhatitsixi kememɨyupaɨmekai 'Eritsapani wa'ukiyari kanihɨkɨtɨkaitɨni 'Utsiheri nu'aya. 31 Mɨkɨ mekanihɨritɨariekaitɨni tukita kakuni, mexa, kɨxeme, mawari taiyameta, tukita mɨrayepine xakɨrɨte, watsute, 'itɨte mɨkɨ mepɨtekumaɨwa meta 'ixuriki waɨkawa muyepatsieta meuwɨkai, yaxeikɨa naime tita mɨreuyewekai memɨte'uximayakakɨ.

32 Rewitsixi wa'ukiyari yemekɨ 'Eriyatsaxi kanihɨkɨtɨkaitɨni 'Aruni nu'aya mawari wewiwame, mɨkɨ mɨhɨritɨariekaikɨ tuki muyepatsieta mɨtiwa'aitɨakakɨ mɨwa'ukiyaritɨkaikɨ.

33 Merari hetsɨa miemete Makiri hamatɨa Mutsihí mekanihɨkɨtɨni. 'Ikɨ mekanihɨkɨtɨni Meraritsixi nuiwarimama. 34 Yunaime 'ukitsi xeimetseri memexeiyatɨka mana meutiyune, 'ataxewime miriyari heimana huta tsienituyari (6.200) meyupaɨmetɨ mekanakɨne 'ukitsi. 35 Meraritsixi wa'ukiyari Tsurieri kanihɨkɨtɨkaitɨni 'Awikahiri nu'aya. Merari nuiwarimama tuki manuwe 'utata mekanikutekaitɨni. 36 Mɨkɨ mekanihɨritɨariekaitɨni memɨtetimɨwanikɨ, tatsɨari tukitsie mɨranuyehipite, mexa hetsiena ma'uni, meta muka'utɨka meta tinaitɨ muwa mɨtiyepine mɨtiyukumaɨwa. 37 Yaxeikɨa kɨyexi muka'utɨka mekani'ɨwiyakaitɨni meta tekɨapai maheitɨkatei naime makuwutɨkatei kaunariyari.

38 Muitsexi 'Aruni hamatɨa meta waniwema yunaitɨ 'ixuriki tukiyari hɨxie mekanititekaitɨni, tatsɨari tau manatineika 'aurie, 'ixuriki tukiyari memɨhɨritɨariekaikɨ 'ixaheritsixi wahetsiemieme memɨwayetuayanikɨ. Peru kemɨ'ane kamawari wewiwametɨtɨ mana 'ahurawa mɨye'ani, mɨkɨ mekanitakwikwiwakaitɨni.

39 Muitsexi 'Aruni hamatɨa rewitsixi mekaniwaruka'utɨani Yawé kemɨtiwaruta'aitɨakai tiwarutaxatɨaka. Yunaitɨ rewitsixi xeimetseri memexeiyatɨka huteikɨ mautiyune mekanaka'utsieni, kememɨyupapaɨmekai mekaniuti'ani xeitewiyari heimana huta miriyari (22.000) meyupaɨmetɨ mekanakɨne 'ukitsi.

40 Merikɨtsɨ Yawé Muitsexi mɨpaɨ katiniutahɨawe: «Keniwaruka'utɨa yunaime 'ixaheritsixi matɨari miemete 'ukitsi xeimetseri memexeiyatɨka mana meutiyune kememɨtetetewa pewaraka'utɨwatɨ. 41 Yunaitɨ rewitsixi nehetsiemieme mepakɨne 'ixaheritsixi matɨari miemete wahetsiemieme, metatsiere rewitsixi watewama, 'ixaheritsixi watewama matɨari miemete wahetsiemieme. Ne Yawé nekanihɨkɨtɨni».

42 Muitsexi 'ixaheritsixi kaniwaruka'utɨani matɨari miemete, Yawé kemɨtita'aitɨakai. 43 Yunaitɨ me'inɨaritɨ 'ukitsi xeimetseri memexeiyatɨka mana meutiyune, mexɨakate memaka'utsiwakai kememɨtetetewa xeitewiyari heimana huta miriyari heimana huta tsienituyari heimana haika tewiyari heimana tamamata heimana haika (22.273) mekaniuyutipaɨmere 'ukitsi.

44 Hikɨ Yawé Muitsexi mɨpaɨ katiniutahɨawe: 45 «Yunaitɨ rewitsixi nehetsiemieme mepakɨne 'ixaheritsixi matɨari miemete wahetsiemieme, metatsiere rewitsixi watewama, 'ixaheritsixi watewama matɨari miemete wahetsiemieme. Rewitsixi nehetsiemieme mepakɨne. Ne Yawé nekanihɨkɨtɨni.

46 »Para pemɨwatawikweitsitɨanikɨ huta tsienituyari heimana haika tewiyari heimana tamamata heimana haika (273) mexɨakate 'ixaheritsixi, rewitsixi memɨkayuwaɨkawakɨ, 47 pekaniyetuamɨkɨ 'auxɨwime tumini pɨrata raheteme yuxexuime wahetsiemieme, tukita mieme tumini kemɨrahete, tamamata heimana xewi kɨramuyari pɨrahete. 48 Mɨkɨ tumini yunaime pekaniwayetuiriemɨkɨ 'Aruni meta niwemama, 'ixaheritsixi kepemɨtiwarutawikweitsitɨa memuti'inɨatsietsie memɨyumɨirekaikɨ».

49 Hikɨ Muitsexi mɨkɨ tumini kananu'ɨni 'ixaheritsixi wahetsiemieme, rewitsixi memɨkayuwaɨkawakaikɨ. 50 Kaniuku'ɨni, xeimiriyari heimana haika tsienituyari heimana haika tewiyari heimana 'auxɨwi (1.365) tumini pɨratayari, kemɨti'inɨatakai tumini tukita mieme. 51 Hikɨ kaniyetuani mɨkɨ tumini 'Aruni hetsɨa meta niwemama wahetsɨa, yemekɨ Yawé kemɨtita'aitɨa.