1 Xuweni nuiwarieya meta Kahari tewaxi mepuwarexeiyakai yemekɨ waɨkawa, mekaniuneniere Katsexi kwieyaritsie meta Karaha, mana 'aixɨa mɨraku'anekaikɨ tewaxi wahetsiemieme. 2 'Ayumieme Muitsexi mɨpaɨ mekateniutahɨawe meta mawari wewiwame 'Eriyatsaxi meta yunaime 'ukirawetsixi 'ixaheritsixi:

3 —'Ataruti kwieyari meta Riwuni, Katsexi, Nimira, Hetsiwuni, 'Eraré, Tsewani, Newu metatsiere Wehuni, 4 Yawé tatsiparewiekaku mana tepɨtehayu'iwaxɨ 'ixaheritsixi wahetsiemieme mayanikɨ, 'ayumieme 'aixɨa pɨ'ane 'ikɨ 'ateɨterima watewama wahetsiemieme. 5 Xɨka yapera'eriwani ketaneupitɨa mɨkɨ takwie temayeitɨanikɨ. Tame pepɨkatatsi 'anuwitɨkɨni hapa Kurutani hatuxameyaritsie 'anutaɨye paitɨ.

6 Hikɨ Muitsexi mɨpaɨ katiniwarutahɨawe Xuweni nuiwarimama meta Kahari:

—¿Kamɨtsɨ 'aixɨa ti'ane xe'iwama xeikɨa memuyukwitɨweni xemeta 'ena xetetiteni xeikɨa? 7 'Ixaheritsixi mɨpaɨ meputiyuane kwie Yawé mɨwayetuiritsie mepɨye'axɨani, xɨka mɨpaɨ xe'uyɨni mɨkɨ xekayuwaɨriyatɨ xepakɨne. 8 Mɨpaɨ mekaniɨyɨnitsiere xe'ukiyarima kepauka ne nemɨwarenɨ'a kwie memɨxeiyayukɨ Karetsi-Waxineya. 9 Mekanekɨne kwie mekanexeiya mayeweri 'Etsikuri, kepauka memu'axɨa, mekaniwarutiweranariya 'ixaheritsixi, Yawé kwie hakewa mɨwareyetuiri mana memɨkaye'axɨanikɨ. 10 Mɨkɨ tukaritsie Yawé waɨkawa kaniuyeha'ani yurikɨ mɨpaɨ kaniutayɨni: 11 “Yu'iyarikɨ xemɨkanetsi'u'enikɨ, nixewitɨtɨma xeitewiyari wiyari heimana mexeiya 'Ekipitu memɨyekɨ kwie kapɨxeiya 'Apɨrahami, 'Itsahaki meta Kakuwu nemɨwaruxatɨa. 12 Mekanixeiyakuni xeikɨa Karewi Kepune nu'aya Keni tewiyari, mɨkɨri Kutsuhexi Nuni nu'aya, mɨkɨ xeikɨa yu'iyarikɨ mekaneni'eniekaitɨni, hipatɨri hawaikɨ mekapixeiya”. 13 Yawé kaniuyeha'ani waɨkawa 'ixaheritsixi wahepaɨtsita, makumawetsie mekaniu'uwakaitɨni huta tewiyari wiyari, kepaukake memukwi mɨkɨ yunaitɨ 'axamemɨte'uyuriekai.

14 »Xemeta hikɨ 'axateyuruwamete, yaxeikɨa xekateniyurikuni xepaapama wahepaɨ Yawé haxɨaya tawarita xekaninɨitɨakuni 'ixaheritsixi wahetsiemieme. 15 Xɨka xeme xeka'uyuwaɨriya Yawé kemaine, mɨkɨta yaxeikɨa makumawetsie 'ikɨ teɨteri kaniwatixɨrimɨkɨ, xemetsɨ teɨteri xekaniwaka'unakuni».

16 Hutarieka mɨkɨ Muitsexi mɨpaɨ mekateniutahɨawe:

—Kuraru tepɨtiwewieni tatewama wahetsiemieme, meta kiekari tepɨtiwewieni taniwema wahetsiemieme. 17 Hikɨ ta'ɨrɨ teti'ɨme tepanuyeyaxe 'ixaheritsixi wahɨxie muwapaitɨ tepɨwareye'atɨani hakewa paitɨ memeyuhayewa. Taniwema peru 'aixɨa kiekaritsie meteheukutekaku wahetsie munuakakɨ mana kiekatari mewarukwinikɨ. 18 Takie kwitɨwa tepɨka'akunuaxɨani kepaukake 'ixaheritsixi yunaitɨ yukwie meme'axe. 19 Tame mɨkɨ wahamatɨa tixaɨtɨ tapiini tepɨkatehayeitɨani haa manuyehane Kurutani 'anutaɨye timieme, tame tahetsie timieme 'ena pɨta pɨtikupine haa manuyehane tau manatineika hepatsie.

20 Muitsexi mɨpaɨ katiniwarutahɨawe:

—Xɨka xeyuwaɨriyani mɨpaɨ xemuyɨni, yu'ɨrɨ xeketeneutipika hikɨmɨtɨka tekaniyukwiyuni. 21 Xekenanukɨni Kurutanitsie yu'ɨrɨ xete'upitɨ, Yawé xeparewiekaku xekeneuyutakuya kepaukake yunaime xemɨwara'iwa. 22 Kepauka Yawé kwie mɨtatsiyetuirienitsie, hikɨ 'ana xekanakunuaxɨakuni yukie, mɨpaɨ xeyɨme xekatenaye'atɨakuni Yawé hetsiemieme metatsiere 'ixaheritsixi wahetsiemieme. Yawé mɨxehetimakɨ 'ikɨ kwie xehetsiemieme payani.

23 »Peru xɨkata xeyuti'imani, mɨpaɨ xeketenemaika 'axaxekateniyurieka Yawé hetsiemieme. Peru xepɨkateheuyehɨwiyarieni 'axaxemɨte'uyurikɨ. 24 Xekeneutiwewi kiekari xeniwema wahetsiemieme, meta kuraru xetewama wahetsiemieme, meta xekatenaye'atɨakuni kexemutiyua».

25 Kahari nuiwarimama meta Xuweni nuiwarimama mɨpaɨ Muitsexi mekateniutahɨawe:

—Tame 'anɨ'arima yatekateniyurikuni Yawé kemɨti'aita. 26 'Ena Karaha kiekariyaritsie mekaniyuhayewakuni taniwema, tawakaitsixi meta tamuxatsi, 27 peru tame 'anɨ'arima tekananɨkɨnikuni Kurutanitsie ta'ɨrɨ te'u'ɨtɨ tekaniwatakwikuni Yawé memaye'unie, mɨkɨ kemɨti'aita.

28 Hikɨ Muitsexi mawari wewiwame 'Eriyatsaxi mɨpaɨ katiniutahɨawe, meta Kutsuhexi Nuni nu'aya metatsiere 'ixaheritsixi 'ukirawetsixi:

29 —Xɨka Kahari meta Xuweni wanuiwarima Kurutanitsie yu'ɨrɨ me'u'ɨtɨ me'anukɨne memuyukwiyukɨ kwie xemɨ'axekɨ, Yawé kemaine, xeme xekaniwayetuiriekuni 'ikɨ kwie Karaha kwieyari. 30 Xɨkata meka'anukɨne, mɨkɨ kwie mekani'axikuni xehamatɨa Kanani paitɨ.

31 Kahari meta Xuweni wanuiwarima mɨpaɨ mekaniutiyuani:

—Tame 'anɨ'arima yatepɨtekakɨne Yawé kemaine. 32 Mɨkɨ kemaime, tekananɨkɨnikuni ta'ɨrɨ te'u'ɨtɨ Kanani kwieyaritsie. Tapiini mɨrayani peru 'uwapɨta katinikupika Kurutani 'anataɨye.

33 Hikɨ Muitsexi kaniwayetuirieni Kahari meta Xuweni nuiwarimama, metatsiere Manatsexi Kutse nu'aya nuiwarimama hixɨapa memɨ'axe, ti'aitame Tsikuni kwieya 'amuxeutsixi tiwa'aitɨwame, ti'aitame 'Uhuki kwieya Watsani kiekariyaritsie ti'aitame. Niwayetuirieni kwie kemɨyeukai naime kiekari mana mukumanekai, tatsɨari kiekari naime mɨkɨ kwieyaritsie mɨmiemetɨkai.

34 Kahari nuiwarimama kiekari mekaniutiwewieni Riwuni, 'Ataruti, 'Aruhexi, 35 'Ataruti-Tsupani, Katsexi, Yukiweya, 36 Weti-Nimɨra metatsiere Weti-'Arani. Kiekari 'aixɨa mɨ'anene hepaɨ mekateniwewieni metatsiere kuraru mekaniutiwewieni muxatsi wahetsiemieme. 37 Metatsiere mekanitiwewieni kiekari Hetsiwuni, 'Eraré, Kiriyatahini, 38 Newu, Wahari-Mekuni metatsiere Tsiwima, mekanipataxɨani kemɨtitetewakai.

39 Makixi nuiwarimama Manatsexi nu'aya Karaha mekananɨkɨne mekane'iwa, mana memɨtitekai 'amuxeutsixi mekaniwarukwini. 40 Hikɨ 'ayumieme Muitsexi Makixi Kutse nu'aya Manatsexi nuiwarimama mɨkɨ Karaha kwieyari kaniwayetuirieni, mɨkɨ mana mekaniyuhayewa. 41 Meta Yahixi Manatsexi nu'aya hipame kiekari kaniwara'iwa, mɨkɨ Kawuti-Yahixi katiniuterɨwa. 42 Nuwa Kenati kana'iwa meta nuiwarimama 'auriena mamanetɨka, mɨkɨ kwieyari yuhepaɨ katiniuterɨwa.