19
1 Matsi 'aixɨa pɨ'ane tixaɨtɨ karexeiyatɨ peru 'aixɨa tikamietɨ,
keyuri kayuwaɨriyatɨ teɨteri muwaparewienikɨ meta 'axatiniukitɨ.
2 'Aixɨa pɨka'ane pekareutamaiwetɨ xɨka petiutsutɨani,
kemɨ'ane muyutimexɨitɨani mɨkɨ puyutewinɨani.
3 Tewi mɨka'uka'iyarikɨ 'ayumieme yuhuye peuyehɨpa,
meta Yawé hetsiemieme puyeha'awe.
4 Kemɨ'ane mɨxiku hamikumama mekaniyumɨireni,
matsi kemɨ'ane tixaɨtɨ mɨkarexeiya hamikuya piku'eiri.
5 Kemɨ'ane 'uniereme muyuxata tiku'itawatɨ mɨkɨ katinika'enitsitɨariemɨkɨ,
yaxeikɨata kemɨ'ane mɨti'itawa pɨkareuyehɨwiyarieni.
6 Xikutsixi waɨkawa hamikutsixi mekaniwareuxeiyani,
yunaitɨ teɨteri mekaniwatemawikuni 'etsiwa 'imikierikɨ.
7 Kemɨ'ane tixaɨtɨ mɨkarexeiya 'iwamama mekanixani'erieka,
matsiri hamikumamatɨtɨ mepɨkahenuku'erieni.
Tsepanetɨ mɨwakuwaune memiparewienikɨ,
hawaikɨ pɨkawarekaxeiya.
8 Kemɨ'ane timaitɨ 'amuyeika mɨkɨ yukɨmana yu'iyaritsie kaniyunaki'erieka,
kemɨ'ane yuhetsie mɨtimaiwe 'aixɨa pɨtiyeyani.
9 Kemɨ'ane 'uniereme muyuxata tiku'itawatɨ mɨkɨ katinika'enitsitɨariemɨkɨ,
kemɨ'aneta mɨti'itawa mɨkɨ kanika'unariemɨkɨ.
10 Mɨkayuwaɨriya hipame muwaparewienikɨ 'aixɨa pɨka'ane witsimɨtiuye'anetsie mayekanikɨ,
meta 'aixɨa pɨka'ane waɨriyarika mɨti'uximaya te'aitamete memanuyetei mɨtiwata'aitɨanikɨ.
11 Mɨtimaiwe heitseriemekɨ yakatinikamieni katiniyukanenimayaka,
matsi witsimɨtiuka'iyari kaninenimayaka kemɨ'ane 'axamiyuri.
12 Maye mahiwa hepaɨ kani'aneni ti'aitame haxɨaya,
kepauka mɨkɨ muyutemawie 'ɨxa mɨhatuiyarie hepaɨ kani'aneni.
13 Temaikɨ 'axamɨtiuka'iyari yupaapa kanihiweritɨaka,
'uka muwikie mayu'eriya haa mɨkatsuke hepaɨ yɨkɨna katini'uximatɨaka.
14 Kii meta tumini rapaapa katinaku'eiririemɨkɨ,
'uka mɨtimaiwe Yawé 'imikierieya kɨnaya hetsiemieme kanihɨkɨtɨni.
15 Kemɨ'ane mɨyɨ'ɨraxie kwinimieme katinikuneni xeikɨa,
meta kaniyehaakamɨneni.
16 Kemɨ'ane 'inɨari niukiyaritsie yamɨtikamie mɨkɨ yuhetsiemieme kaneye'atɨaka,
matsi kemɨ'ane mitixani'erieni kanimɨmɨkɨ.
17 Tixaɨtɨ mɨkarexeiya xɨka tumini pe'umini Yawé pekaniniɨtɨaka.
Mɨkɨ Yawé pumerakapitɨani 'aixɨa kepemɨtiuyurikɨ.
18 'Aniwe keneheitseritɨaka mexixi 'akuxi yu'ɨxatsitɨarinɨa,
matsi pepɨka'iparewieka mɨmɨnikɨ peka'ita'ɨxatsitɨayu.
19 Kemɨ'ane mayu'eriya waɨkawa katinika'eniexɨamɨkɨ 'uximatɨarikakɨ,
kemɨ'ane minɨtɨamɨkɨ matsi waɨkawa piyehaxɨatɨani.
20 Kemɨ'ane 'ɨxatsi mɨ'enie kaniyuwaɨriyani 'aixɨa mɨtitahɨawarienikɨ,
matsi waɨkawa timaiwetɨ kanayeimɨkɨ.
21 Tewi waɨkawa puyu'iyaritɨa yu'iyaritsie yamɨtiyurienikɨ,
matsi 'imatɨrieka Yawé kemɨtinake yapɨtiyɨni.
22 Yunaitɨ teɨteri mekanitakwewieka kemɨ'ane wa'enietɨ muwatanaki'erienikɨ,
matsi 'aixɨa pɨ'ane tixaɨtɨ mɨkarexeiyani keyuri ti'itawatɨ.
23 Yawé 'ayemakatɨ xɨka 'uyeikani tukari kaniukaxeiyamɨkɨ,
hamatɨana 'akaniuyeikamɨkɨ 'aixɨa 'iyari meta katiuka'eniwatɨ.
24 Mɨyu'ɨraxie xakɨtsie xeikɨa kaneukamemeni,
matsi 'akuxi kaneiyehɨaka mɨramikiwanikɨ yuteta paitɨ.
25 Kemɨ'ane mɨtiyukatawe'erie ke'ukuweiyaxɨani, 'ana 'atsimɨkatimate kemɨreuyewetse yamɨtiyurienikɨ niereme yapɨretimani,
kemɨ'ane mɨtiuyemate keneutaheitseritɨa 'ana tiuyemaitɨa kanayeimɨkɨ.
26 Kemɨ'ane yupaapa mɨtinawatsiriwa meta yumaama takwa paitɨ manuyehɨpa,
mɨkɨ temaikɨ mɨka'uka'iyari meta mɨka'uyukatewiya kanihɨkɨtɨni.
27 Temaikɨ, xɨka ne'ɨkitsika peka'u'enieni,
'ɨxatsi 'aixɨa mɨ'ane pekaniku'eirimɨkɨ.
28 Kemɨ'ane 'uniereme yuxatatɨ mɨtiku'itawa mɨkɨ tita mɨtiheitserie kaninanaimaka,
'axatiyuruwame teta kanayeneikani tita 'axamɨti'ane xeikɨa.
29 'Iwaɨyɨ kaniha'aritsieka mɨtiuyukatawe'erie hetsiemieme,
mɨkayuwaɨriya teɨteri muwaparewienikɨ kanikuweiyaxɨamɨkɨ.