22
1 Matsi 'aixɨa pɨ'ane pemumatiwanikɨ 'aixɨa petiuka'iyaritɨ,
keyuri huru meta pɨrata waɨkawa pehexeiyatɨ xeikɨa.
2 Mɨxiku meta tixaɨtɨ mɨkarexeiya mɨkɨ yaxeikɨa mepɨ'anene,
mɨkɨ yuhutame Yawé kaniwarutiwewieni.
3 Kemɨ'ane mɨtimaiwe 'axamɨti'ane katinixeiyani mɨkɨ 'ateewa puyeyeika,
matsi mɨkatimaiwe mana kaniuyeyeikani 'ayumieme pɨtiuka'eniwa.
4 Tixaɨtɨ pekare'ayeitɨatɨ Yawé pe'ayemakatɨ mɨpaɨ pekatinipitɨariemɨkɨ,
waɨkawa pepɨrexeiyani 'aixɨa pepɨrahɨawarɨwani meta tukari pepupitɨarieka.
5 'Axateyuruwamete wahuyeta xuya puxuawe meta winiyari,
matsi kemɨ'ane yutukari mɨ'ɨwiya mana pɨka'uyeyani.
6 'Aniwe 'etsimuyumate kenekuxaxatɨwani huye 'aixɨa mɨ'ane,
kepauka 'ukiratsi mayani hatsuaku pɨka'iku'eirieni.
7 Tixaɨtɨ mɨkarexeiya xiku katini'uximayatsiriwametɨni,
waɨriyarika mekateniwa'uximayatsirieka memɨtewarapiniriekɨ.
8 Kemɨ'ane 'axa'anekamekɨ muka'etsa mɨkɨ 'axati'aneme katinika'itsanamɨkɨ,
Yawé ha'atɨ yu'itsɨkɨ kanika'unamɨkɨ.
9 Kemɨ'ane mɨtiyukanenimaya mɨkɨta Kakaɨyari 'aixɨa kaniyuriekamɨkɨ,
tixaɨtɨ memɨkatehexeiya mɨtiwamikwakɨ.
10 Keneuku'eiri kemɨ'ane mɨtiyukatawe'erie 'ana 'imieri pukumawere,
'ana kayuwatɨ pɨtamare tierika meta tewiyarika.
11 Kemɨ'ane yu'iyaritsie mɨti'itiya mɨtinaki'erie mɨkɨ kanipitɨarieka 'aixɨa mɨti'anekɨ mɨtaniunikɨ,
mɨkɨ ti'aitame kanihamikutani.
12 Yawé mɨtimaiwe pɨ'ɨwiya kemɨ'ane waɨkawa mɨtimate,
matsi kemɨ'aneta mɨti'itawa niukieya kani'uxiwe'erieka.
13 Muyu'ɨraxie mɨpaɨ kaniutaineni: «Maye takwa peyeika,
mana kaye'utɨa netsihetatsana».
14 'Uka hipatɨ memikumaɨwa tenieya mɨkɨ putsu 'emeukatewa hepaɨ kani'aneni,
mɨkɨta muwa kaneukahɨiyamɨkɨ kemɨ'ane hamatɨana muyutaxewire Yawé 'ihekakaku.
15 'Axamɨtiuyurienikɨ yutemawietɨ temaikɨ hetsie kaniyekani,
matsi kɨyekɨ kuweiwatɨ ti'ɨkitɨatɨarietɨ 'ana pɨretimani.
16 Xɨka tixaɨtɨ mɨkarexeiya petiunawatsirieni xiku pehayeimɨtɨ,
xɨka waɨkawa 'imikieri xiku petikumikwani,
matsi pɨta 'akɨmana tixaɨtɨ pekarexeiyatɨ pepa'ayeitɨwa.
Xeitewiyari heimana tamamata niukite memɨtemaiwawe kememutiyuane
(Temai 22:17—24:22)
17 Memɨtemaiwawe waniuki kene'enieka yemekɨ kememutiyuane,
'a'iyaritsie 'aixɨa ketineu'ahɨawi kenematikɨhɨawe ne'ɨkitɨarikatsie.
18 Matsi 'aixɨa kani'aneni pemeixeiyani 'ataɨta paitɨ ne'ɨkitsika,
meta pe'ikuxatatɨ witsi'anemekɨ.
19 Yawé hetsie yuri ketine'eririeka,
'ekɨ nekamatiniuta'ɨkitɨani 'ikɨ tukaritsie.
20 Ne nematsi'uti'utɨiri xeitewiyari heimana tamamata xatsikayari,
mana niuki kanayehuni temaiwawemete wa'ɨxatsi.
21 'Ikɨ niuki yuri maitɨka kametinita'ɨkiatɨamɨkɨ pe'ihiwe'eriekaku,
kɨmana 'aixɨa pemɨtiwata'eiyakɨ kemɨ'ane memetsita'iwawiya.
Xewi
22 Tixaɨtɨ mɨkarexeiya pepɨkananaimaka, mɨkɨ tixaɨtɨ mɨkarexeiyakɨ,
meta 'itsɨkate wahetsɨa pepɨkawaxanetani mɨkɨ parewiya mekaneuyehɨaka.
23 Yawé tixaɨtɨ mɨkarexeiya hetsie kanitanuamɨkɨ,
kemɨ'ane naime mɨtinawairieni mɨkɨta naime pɨtinawaiyarieni.
Huta
24 Teɨteri memɨteyukananaima pepɨkawahamikutaneni,
meta memayu'eririya wahamatɨa pepɨka'uyeikani,
25 nɨka ke'axamemɨteyurikɨ pewaruta'ɨke,
'ekɨta nɨka winiyaritsie wahepaɨ pe'ahɨani.
Haika
26 Mɨrapine hetsiemieme pepɨkare'akatuayani,
meta pepɨkarapika xeime hetsiemieme,
27 'ekɨ xɨka peka'iyemanani ketitakɨ pemɨrekapitɨani,
pekaninawaiyariemɨkɨ naime 'ahupume.
Nauka
28 Pepɨka'ikupatani kwie 'inɨariyari meripaitɨ mieme,
kememɨte'u'inɨaritaxɨ tatutsima meripaitɨ miemetexi.
'Auxɨwi
29 ¿Tewi xeime yemekɨ 'aixɨa mɨtiu'uximayata petixexeiya?
Mɨkɨ te'aitamete wahetsɨa pɨti'uximayaka,
teɨteri memɨkamatiwa wahetsɨa pɨkati'uximayaka.