24
Tamamata heimana 'atanauka
1 'Axateyuruwamete kememɨteyurie meta tita memɨtehexeiya pepɨkatihiwe'erieka,
meta pemuwanɨkakɨ pepɨkakuwauneni,
2 mɨkɨ meteyukananaimatɨ xeikɨa mekaniu'uwani,
meta hipame 'uximatɨarika memuwapitɨanikɨ xeikɨa mekatenikuxatani.
Xeitewiyari
3 Waɨkawa rakumaitɨ pɨyɨwe kii mutsutɨani,
kepemɨtiuyematekɨ kii tenarieya peputsutɨani.
4 'Aixɨa perakumaitɨ 'akiita pepɨtitahɨniya,
witsimɨti'anenekɨ meta waɨkawa mɨraye'atɨkakɨ.
Xeitewiyari heimana xewi
5 Tewi mɨtimaiwe waɨkawa kanitɨrɨkaɨyeni,
meta kemɨ'ane meu'ena matsi waɨkawa tɨrɨkaɨyetɨ payeixime.
6 Kepauka pemɨ'atamieni kaneuyeweka pemɨ'atimaixɨanikɨ,
meta pemɨra'a'iwanikɨ yumɨireme wa'ɨxatsi keneu'eni.
Xeitewiyari heimana huta
7 Xewitɨ tewi 'axamutiyuriene yutemawietɨ hatsuaku timaiwetɨ pɨka'ayani,
meta teɨteri wahɨxie 'aixɨa mɨtayɨni pɨkayɨwe.
Xeitewiyari heimana haika
8 Kemɨ'ane 'axatiyurimɨtɨ muyuha'aritɨa,
mɨkɨ 'axatiyuruwame katiniterɨwariemɨkɨ.
9 'Axamɨtiyuriene yutemawietɨ kemɨtiku'eriwa 'axamɨti'ane kanihɨkɨtɨni,
teɨteri memɨteyukatawe'erie mekaniwaxani'erieka.
Xeitewiyari heimana nauka
10 Kepauka pemu'uximatɨarietsie pemɨkayuwaɨriya,
'ekɨ pepumatsiɨkɨ pemɨkatɨrɨkaɨyekɨ.
Xeitewiyari heimana 'auxɨwi
11 Keniwarutawikweitsitɨa kemɨ'ane memɨkwini yuheyemekɨ,
keniwarukunuitɨa kemɨ'ane memɨte'uka'eniwa mekwiximetɨ.
12 Tsepa mɨpaɨ pemutaine, «Ne 'atsinepɨkatimaikai»,
Kakaɨyari hɨrixɨa pɨtimaikai 'a'iyari kemɨtiyukɨhɨawekai.
Meta 'atukari mɨ'ɨwiya yapɨtimate,
mɨkɨ tewi 'akatinapiniyariemɨkɨ kemɨtiu'uximayataxɨ.
Xeitewiyari heimana 'ataxewi
13 Xiete kenanu'i, 'ekɨ temaikɨ nemɨmatsinaki'erie, mɨkɨ 'aixɨa kana'aneni,
yemekɨ witsikatinakakani 'anenitsie xietexi waxieteyari.
14 Mɨpaɨta katinakakani xɨka waɨkawa petimaiweni 'a'iyaritsie,
heitseriemekɨ xɨka yapetikamieni Kakaɨyari pɨmatsiparewieka,
tita pemɨtitakwewie mɨkɨ hatsuaku pɨkaka'unarieni.
Xeitewiyari heimana 'atahuta
15 Heitseriemekɨ yamɨtikamie kie pepɨkahupaneni 'axatiyuruwame hepaɨ,
meta kiitana pepɨkatinanaimaka.
16 Tewi heitseriemekɨ yamɨtikamie tsepa 'atahutamexɨa mekawe,
mɨkɨ kananukukemɨkɨ,
matsi 'axateyuruwamete mekanekaxɨrɨweni,
matsi hatsuaku tawari mepɨka'anuku'uni.
Xeitewiyari heimana 'atahaika
17 Kemɨ'ane metsi'aye'unie kepauka mekawenitsie pepɨka'atemawieka,
meta pepɨka'atemawieka 'a'iyaritsie mɨkɨ mɨtiuka'eniwakɨ.
18 Yawé mɨkɨ pɨka'inakire 'ekɨ kepemɨtiku'eriwa,
hikɨ mɨkɨ hepaɨtsita Yawé kemɨtiha'akai pɨtihayewa.
Xeitewiyari heimana 'atanauka
19 'Axateyuruwamete wahepaɨtsita pepɨka'uyeha'arɨweni,
meta pepɨka'awaɨriyani pemuwa'ɨkenikɨ yamemɨkatekahu,
20 matsi 'axatiyuruwame tixaɨtɨ pɨkatitakwewie,
kemɨ'ane yamɨkatikamie kɨxemeya kanitɨmɨkɨ.
Xeitewiyari heimana tamamata
21 Temaikɨ, Yawé kenayemakaxeni meta yaketinekamieni ti'aitame hetsiemieme,
Yawé memu'uxie wahamatɨa pepɨka'axewiriyani,
22 yapauka xekatenika'eniexɨakuni,
'atsipɨkatimatsiɨkɨ tita 'umuramie.
Tawarita kememutiyua temaiwawemete
23 'Ikɨ kanihɨkɨtɨnita tawarita kememutiyua temaiwawemete:
'Aixɨa pɨka'ane hipame xeikɨa waparewietɨ kepauka 'iwaurika muwewienitsie.
24 'Axamɨtiuyuri xɨka hetsiena karahɨiyani kename 'atsikatiuyuri,
'ana yunaitɨ nuiwarite hetsienamieme 'axameputiyuaneni mɨkɨ 'itsɨkame hepaɨtsita meta mekaniti'uxiwe'erikuni.
25 Kemɨ'ane heitseriemekɨ mɨti'aita mɨkɨ 'aixɨa pɨtixeiyarieni,
'axatiyuruwame hetsie mɨrahɨakɨ 'ayumieme pɨnaki'eriwa.
26 Kemɨ'ane 'aixɨa mɨtikuxata yuri mutaine,
mɨkɨ witsikani'aneni 'itsiya hepaɨ.
27 'Awaxa meri keneukuha'arita,
meta 'aixɨa ketinakuyuri pemaku'etsatsie,
mɨpaɨ meri petiyurieme 'arikeketa 'akii pepɨtawewieni.
28 Peti'itawatɨ 'ahepaɨ tewi hepaɨtsita pepɨkatikuxatani 'itsɨkame hɨxie,
pepɨkatiku'itawani 'atenikɨ.
29 Mɨpaɨ pepɨkahaineni: «Kemɨnetsi'uyuri mɨkɨ,
neta yaxeikɨa nekatinekapitɨamɨkɨ».
30 Mɨyu'ɨraxie mati'etsatsie nekaniuyeyani,
meta 'atsimɨkatimate kaxie ma'iteɨritsie 'aurie nekaniuyeyani.
31 Xuya xeikɨa naitsarie kananaye'ukaitɨni,
meta tupiriya 'etsiya xeikɨa kananukanakaitɨni,
tetexi kuraruyari petaxɨriyatɨkatei xeikɨa.
32 Kenemɨrenierixɨ ne'iyaritsie nepika'ɨnaxɨ,
netixeiyatɨ mɨpaɨ nepɨretima:
33 'etsiwa peheukukutsɨtɨ,
meta 'etsiwa pe'uka'uxipiwetɨ, meta 'atapa pe'awietɨ,
34 tixaɨtɨ pekarexeiyatɨ pepayani tiyumemiwame 'ahetsɨa munuani hepaɨ pɨtiyɨni,
meta pereuyehɨatɨ tinawayame 'ixipara 'akwetɨ 'ahetsɨa munuani hepaɨ pumatiyurieni.