5
Teyuitɨwamete wa'ukiyari. 'Ikɨ pirikɨxakɨ ke'utakwikarieni. Rawiri nɨawarieya.
1 Yawé, neniuki keneu'eni,
kenemɨtiutatsuaka.
2 Kenemaine, neti'aitɨwame meta nekakaɨyari kenene'enieka,
'ekɨ xeikɨa nepɨmatsiwawirie.
3 Yawé, ximeri paitɨ pepɨnetsi'enie,
ximeri paitɨ nepɨmatiwawirie,
kepauka pepɨnetsita'eiya nepɨta'ikwewa.
4 'Ekɨ Kakaɨyari pepɨkahɨkɨ 'axamɨti'anekɨ muyutemawie,
'ahamatɨa mepɨkayɨwawe memuyuxewiriyani 'axamemɨte'u'iyari.
5 'Ahɨxie memɨti'uni mepɨkayɨwawe mamariwawemete memɨyu'erie,
pekaniwaxani'erieka 'axamemɨteyurie.
6 Memɨte'itawa pepɨwaka'una
Yawé, pepɨwa'uxie teyukwamanamete meta memɨteyumemiwa.
7 Peru ne, nepɨyɨwe 'akiita
nemeutahani 'anaki'eriya mɨmariwekɨ,
'atuki mɨpatsieta nepɨyɨwe
nemɨkatunumakeni.
8 Yawé, yuwaɨkawatɨ memɨnetsi'aye'uniekɨ,
'aixɨa mɨti'anetsie keneneuwitɨximeni,
'ahuyeta keneneparewieka.
9 Kememutiyuane yurikɨ mepɨkatekuxata,
yutaɨta 'axati'aneme mepɨtehexeiya,
wateta mɨki teukiyapa pɨhɨkɨ reutenitɨ,
yunenikɨ mepɨteyu'itaiya.
10 Keniwaranutaxɨri, Kakaɨyari,
kememɨteyukɨhɨawekɨ mɨkɨkɨ mekeheyukaxɨrieni.
Pepɨkawanaki'erieka yuwaɨkawa memuwarukwikɨ,
mematsi'aye'unietɨ memakɨkɨ.
11 Peru 'ahetsɨa memuyu'awieta mekeyutemamawieka,
meke'utikwikani kwikari 'aixɨa manuyɨtɨka.
Waɨkawa keniwa'ɨwiyani memuyuwaɨriya,
yunaitɨ memɨmatsinaki'erie.
12 'Ekɨ Yawé 'aixɨa pepɨwayurie yamemɨtekahu,
kuya muyukunarɨma pehɨkɨtɨtɨ pepɨwareutinama mɨpaɨ mɨmatinakekɨ.