7
Rawiri yuhiwerietɨ Yawé kemɨtiutahɨawixɨ Kutsi Wenikamini tewiyari hepaɨtsita.
1 Keneneutawikweitsitɨa, Yawé nekakaɨyari, 'ahetsɨa nemɨneti'awiwietakɨ.
Nehetsie keneutanua yunaime memɨnetsi'uweiya wahepaɨtsita.
2 Xɨka mɨpaɨ pekatiuyurieni, mekanenitakwaikuni mayetsi wahepaɨ,
mekanenitatsanakuni, xewitu nehetsie pɨkatanuani.
3 Yawé nekakaɨyari, ¿kekuta netiuyuri?,
¿ketitakɨ 'axanetiuyuri?
4 Xɨka nehamiku 'axane'uyurieni,
xɨka netikuhɨwirieni kemɨ'ane mɨnetikwinitɨa,
5 kamɨtsɨ mɨnetsi'aye'unie kenetsi'anukuweiya kenetsi'anuku'axe,
kwiepa kenetsi'ukahɨani
meta tsepari tixaɨtɨ mɨkanerayeitɨa.
6 Yawé, keneuyeha'a,
memɨnetsi'aye'unie kememɨteha'a wahepaɨtsita.
Kakaɨyari, 'aixɨa ketineuyuri kenenaye'eri.
7 'A'aurie teɨteri mekeyukuxeɨrieni,
pemɨtita'aitakɨ mɨkɨ watsata 'ameutitewatsie.
8 'Ekɨ, Yawé, teɨteri wa'itsɨkame pepɨhɨkɨ.
Nehetsieta yaketineuyuri heitseriemekɨ kenemɨtiuyeikakɨ,
yakenetinakapitɨa kenemɨtiuyurikɨ.
9 Kakaɨyari heitserie pemexeiya, 'ekɨ pemɨtimate wa'iyari kemɨtiku'eriwa,
ketineukumaweriya 'axateyuruwamete ke'axamemɨteyurie
keneparewieka heitserie mexeiya.
10 Kakaɨyari nehetsie nunuwame pekanihɨkɨtɨni,
'aixɨa memɨteyukɨhɨawe pekaniwawikweitsitɨaka.
11 Kakaɨyari 'itsɨkame 'aixɨa mɨtiuka'iyari kanihɨkɨtɨni,
Kakaɨyari kaniwahekani 'axamemɨteyurie tukarikɨ.
12 Xɨka 'axamɨtiuka'iyari katiuhayewa,
Kakaɨyari yu'ixipara kanikuha'aritɨamɨkɨ meta yutupi,
13 'ari mɨɨya kaniukuha'aritɨani,
meta 'ɨrɨ tai mexeiya kaniukuha'arita.
14 Xekeneuxeiya 'axamɨtiuka'iyari:
'Axamɨti'anekɨ kanitihukatamɨkɨ, 'itarika kanitiniwemɨkɨ.
15 'Aheukatewame kaniuti'ine,
muwata kaneukawemɨkɨ.
16 Ke'axamɨtiyuriene yɨkɨmana katiniyukwinitɨamɨkɨ,
mu'uyatsie kanikawemɨkɨ kemɨtiukananaima.
17 Yawé nepɨnɨawani 'aixɨa mɨtiuka'iyarikɨ.
Yawé 'amutewi nepɨtemawieritɨani kwikarikɨ.