22
Teyuitɨwamete wa'ukiyari. Kemanɨyɨne «Maxa 'uka muxei kahekɨarirɨmekaku» mɨpaɨ ketiukwikarieni. Rawiri nɨawarieya.
1 Nekakaɨyari 'aku, nekakaɨyari 'aku,
¿titayari penetiuku'eiri?
Teewa pepuwe kepenetiuwikweitsitɨani,
'ateewa paitɨ neniuki, mɨkaha'eniɨriɨkɨtsie neputatsuaka.
2 Nekakaɨyari, tukarikɨ nemetsihahiwiwa 'ekɨta pepɨkanetsiheku'eiya,
tɨkarikɨta yaxeikɨa nemetikɨhɨawetɨ nepɨka'uxipie.
3 'Ekɨ matsi pepɨpatsie, 'ekɨ pepɨti'aitame,
'ekɨ 'ixaheritsixi pepɨwakwikari.
4 Ta'ukiyarima 'ahetsie mepɨtewiyakai,
'ahetsie yuri mepɨte'eriekai, 'ekɨta pepɨwaruxɨnaxɨ,
5 mepɨmetsi'utahiwi, 'ekɨta pepɨwarutawikweitsitɨa,
'ahetsie mepɨte'uwiyaxɨ, 'ekɨta pepɨkawarexɨri.
6 Ne matsi nepɨkatewi, kwitsi nepɨhɨkɨ,
teɨteri waɨkawa mepɨnetsiyuriya,
yunaitɨ teɨteri mepɨnetsixani'erie.
7 Yunaitɨ memɨnetsixeiya, meputinawe,
mepɨnetsi'utate'a, yumu'u me'utitsiketɨ:
8 «'Ikɨ Yawé hetsie yuri katini'erieka,
kamɨtsɨ Yawé ke'itawikweitsitɨani.
Metsɨ mɨkɨ hetsie xeikɨa kaniyukɨhɨaweni,
mɨkɨ matsi ke'ixɨna».
9 Matsi 'ekɨ nemaama hetsie pepɨnetsiyenuiwitɨa,
nemaama hetsie pepɨnetsi'ukute,
'ahetsie neyɨkɨhɨaweme pepɨnetsi 'ayeitɨa.
10 Nekatinuiwawekaku 'akuxi
'ekɨ pepɨnetsi'ɨwiyakai,
nemaama hetsie neyekaiku paitɨ,
'ekɨ pepɨnekakaɨyari.
11 Hawaikɨ, pepɨkanetsi'uku'e'eiriwani,
karikɨ 'uximatɨarika 'ahurawa kaniuyeikani,
xewitɨ pumawe mɨnetsiparewienikɨ.
12 Memɨnetsi'aye'unie yuwaɨkawatɨ ne'aurie mepa'utɨka,
mekaniti'uka metɨrɨkawitɨ turutsixi Watsani kiekatari wahepaɨ.
13 Nehetsiemieme meputikwaxawa,
mayetsi memuyuti haxɨatɨwa hepaɨ wai metatsanake.
14 Haa hepaɨ netukari pɨtayeuriwe,
ne 'umete naitɨ pɨxɨxɨni.
Ne 'iyari xɨrɨka hepaɨ 'anetɨ patɨa,
netaɨta witsɨanitɨ puhane.
15 Netɨrɨkariya haxu hepaɨ puwa,
neneni pukuwewerike.
Mɨkite watsata pepɨnetsi'ukateukixɨ.
16 Tsɨikɨri tixaɨtɨ memɨte'anukuweiya hepaɨ mepɨnetsi'anutinama,
'axateyuruwamete mekaneniuweiyani,
nemamatetsie mekaneneukeixɨani meta ne'ɨkatetsie.
17 Naime ne'umete nemuti'inɨata nepɨyɨwe,
teɨteri mekani'axeni menetsixeiyake
wa'iyari 'aixɨa mɨ'anekɨ.
18 Ne'ixurikite mepɨyutahuritɨa
meta mekaniyuta'iwa ne'ixɨrikikɨ.
19 Yawé, peru 'ekɨ 'ateewa pepɨkaheyeikani,
pemɨnetɨrɨkariyakɨ, kwitɨwa kenaye'a pemɨnetsiparewienikɨ.
20 Netukari keneutawikweitsitɨa 'ixiparakɨ ne'umierienikɨ,
netukari witsimɨ'ane, tsɨikɨri memɨtɨrɨkawi wahetsɨa.
21 Mayetsi wateta kenenewayehani,
tuurutsixi menetsi'utsikɨpakɨ keneneutawikweitsitɨa.
22 Ne'iwama nepɨtiwataxatɨani kepemɨtiuka'iyari,
'ahetsɨa miemete memayuxeɨrie watsata ne'uwetɨ nepɨmetsitanɨawa.
23 Yawé xekenenɨawani kemɨ'ane xemeyemakaxe.
Mariweme xekenayeitɨaka, Kakuwu niwemama.
Xekenayexeiyani, 'ixaheri nuiwarimama.
24 Mɨkɨ mɨkatiuyukaxani'eriekɨ meta tixaɨtɨ mɨkarexeiya
kemɨtiuka'eniwa mɨka'ixeiya xeikɨa,
hɨxiena pɨkayuti'awiwieta,
matsi kani'enieka, kepauka mɨkɨ maniuka.
25 'Ekɨ yapepɨnetikuyuitɨwa kenemɨtiukwika yuwaɨkawame wahɨxie,
kemɨ'ane memɨmetsi'ayemakaxe wahetsie, nepeye'atɨani kenemutayɨ.
26 Tixaɨtɨ memɨkateheuxeiya mepɨtekwani, mɨkɨ mepɨtihuxani,
Yawé mepɨtanɨawa kemɨ'ane memikuwautɨwe,
wa'iyari ke'ayeyurini yuheyemekɨ.
27 Yawé mekanaye'erikuni, hetsɨana mekani'axɨakuni
yunaitɨ kwie manuye'atɨkatsie paitɨ memɨtama,
hɨxiena mekanikatunuma'uikuni
yunaitɨ kwiepa memɨtama wanuiwarima.
28 Karikɨ Yawé katini'aitametɨni,
yunaime nuiwarite katiniwa'aitɨaka.
29 Yunaitɨ kwiepa waɨkawa memɨtehexeiya mekaniyutitemamawikuni meta hɨxiena mekanikahɨxima'uikuni,
hɨxiena mekanikatunuma'uikuni yunaitɨ memukwi,
yunaitɨ tukari memɨyupitɨani memɨkayɨwawe.
30 Teɨteri 'imatɨrieka miemete mekaneyexeiyakakuni,
kemɨ'ane memu'uwani 'uxa'atɨni warie Tati'aitɨwame mekanikuxaxatɨariwakuni.
31 Teɨteri memɨkatinunuiwawe 'akuxi
mepɨtetaxatɨarieni Kakaɨyari heitseriekamekɨ kemɨtiuyuri.