27
Rawiri nɨawarieya.
1 Yawé nehekɨariwiwame kanihɨkɨtɨni meta netsiwikweitsitɨwame,
¿kemɨ'ane nepumakaxeni?
Yawé netukari mɨ'ɨwiya kanihɨkɨtɨni,
¿kemɨ'ane 'aku pɨnetsi'utimariutawe?
2 Kepauka 'axateyuruwamete nehepa memahu
menetsika'unake,
kepauka memɨnetsi'aye'unie neneɨkixiwima memɨnetsimietɨwe,
mɨkɨ pɨta mekanetiwitseweni mekanekaxɨrɨweni.
3 Tsepa kuyaxi memɨnetsi'anutina,
ne'iyari pɨkatimani,
tsepa nehetsiemieme kuyaxa matɨa,
nematsi nepɨrawiyani.
4 Xeime xeikɨa Yawé nepɨtiwawirie,
ne mɨkɨ xeikɨa nepuweiya:
Yawé kiita nemayekanikɨ
naime tukarikɨ kenemɨreutere ne'ayeyuritɨ
nemixeiyanikɨ witsikemɨ'ane Yawé
meta tukitana nemɨhekwariyarienikɨ.
5 Metsɨ kepauka 'uximatɨarika tukariyari maye'ani
mɨkɨ kaneni'awietakamɨkɨ yukiita,
tukieya nehetsie kaninuakamɨkɨ,
'ateewa kanenakakemɨkɨ, 'ai heima paitɨ.
6 Nerayu'iwame kanenayeitɨamɨkɨ
memɨnetsi'aye'unie ne'aurie memahane wahɨxie,
tukitana kwikari nekanitimawiriemɨkɨ
meta nɨawari Yawé hetsiemieme nekanitikwikamɨkɨ.
7 Nehiwari keneu'eni, Yawé, kepauka nemetsihahɨawe,
keneneutinenimayata keneneuta'eiya.
8 Ne'iyari mɨpaɨ kanetinahɨaweni: «Nierikaya keneutiwawa».
Neta, Yawé, 'anierika nekaniwauneni.
9 Pepɨkayu'awietaneni nehetsiemieme,
'ikɨ ti'a'uximayatsiriwame pepɨkahehɨpani pe'ihekatɨ,
'ekɨ netsiparewiwame pekanihɨkɨtɨni,
nexaɨtame pepɨkanetsikuhayeikawani meta pepɨkanetsi'uku'e'eiriwani,
Kakaɨyari netsiwikweitsitɨwame.
10 Tsepanetɨ nepaapa meta nemaama memɨnete'uku'eiri,
Yawé pɨnetsitituni.
11 Yawé, 'ahuyeta keneneuwitɨximeni,
huye mɨheitserie 'utɨma keneneuwitɨximeni,
hipatɨ memɨnetsihupiekɨ.
12 Pepɨkanetsiyetuayani memɨnetsi'aye'unie nehetsie memɨye'axɨanikɨ,
nehepaɨtsita menetsi'itatɨ mekananuku'uni
menetsinanaimakutɨ xeikɨa mekanenanutate'ani.
13 Perutsɨ xeimekɨ yanepɨtimate:
Yawé naki'eriyaya 'akuxi nepɨxeiyani
'ena kwiepa memu'uwa wahamatɨa.
14 Yawé kenetakwewieka,
kene'awaɨriyani, tɨrɨkariya kenexeiyani,
Yawé kenetakwewieka.