30
Kwikari yukie mieme. Rawiri nɨawarieya.
1 Yawé, 'aixɨa nepaineni 'ahetsiemieme, pemɨnetsi'anukuketɨakɨ,
memɨnetsi'aye'unie pemɨkawarupitɨakɨ memɨnetsi'atsenikɨ.
2 Yawé nekakaɨyari, parewiya nemetsi'utawawiri
'ekɨta 'aixɨa nereu'eriekame pepɨnetsi'ayeitɨa.
3 Yawé, 'ekɨ teukiyapa pepɨnetsihatiha,
tawarita pepɨnetsi'anutanieritɨa mɨkite watsata.
4 Yawé xekenenɨawani, xeme 'aixɨa xemɨte'u'uwa hetsiena mieme,
kemɨtipatsie xekenenɨawani.
5 Haxɨaya 'etsiwa xeikɨa katineutetereni,
peru yuhemekɨ pɨtiuyukanaki'erie.
Xɨka tɨkarikɨ tsuari xuaweni,
ximerita temawierika puxuaweni.
6 Kepauka 'aixɨa nemɨtinemaikai, mɨpaɨ neniutayɨni:
«Hatsuaku nepɨkahatihɨiyani».
7 Yawé, 'ekɨ 'aixɨa pemɨtiuka'iyarikɨ,
'ateewa paitɨ pepɨnetsi'uti'awietaxɨ,
hikɨta pepuyuti'awietaxɨ,
neta nehɨxiyatɨ nepuyuhayewaxɨ.
8 Yawé, 'aixɨa pemɨtiuka'iyari, 'ekɨ nemetsihahiwiwa,
'ekɨ yemekɨ waɨkawa nemetsiwawirie.
9 ¿Tita pera'iwa xɨka ne ne'umɨni,
ne xɨka ne'ukateukieni?
¿Kamɨtsɨ tumuanari metitanɨawa,
yatɨni 'aniuki yuri maine tikuxataneni?
10 Neuxei, Yawé, kenenenenimayaka,
'Ekɨ kenehɨkɨtɨni netsiparewiwame, Yawé.
11 Nehiwerika matsi neiya pepayeitɨa,
hiwerika kamixayari pepɨnetsi'anutihɨniri,
'ixɨararipa miemekɨ pepɨnetsi'utikemaritɨa,
12 nemetsitanɨawakɨ, 'ahetsiemieme 'aixɨa nemainenikɨ,
ne kayuwatɨ nemɨka'umakakɨ.
Yawé nekakaɨyari, ne yuheyemekɨ pamɨpariyutsi nepɨmatsipitɨaka.