33
1 Yawé xekenenɨawani yutemawierima xeme xehetsie mɨkarahɨiwa,
'aixɨa memɨtekahu kaniwahetsiemiemetɨni Yawé hetsiemieme memutikwikanikɨ.
2 Yawé xekenenɨawani kanari hayuanekaku,
xekeneutikwikani xaweri hayuanekaku.
3 Kwikari hekwame hɨxiena xekeneutakwika,
xeketeneyuitɨaka xeyutemamawietɨ,
meta temawierika hiwariyari xekenewewieka.
4 Yawé niukieya kaniheitserieka
'aixɨa katini'aneneni naime tita mɨtiutiwewi.
5 Yawé 'aixɨa mɨti'ane meta mɨtiheitserie katininaki'erieka,
naki'eriyaya kwiepa kanakɨnɨka.
6 Yawé niukieyakɨ muyuawi kaniuneni,
'iiyayakɨ xurawetsixi mekaniutixuawere.
7 Mɨkɨ haramaratsie haa panatihanɨwe xarita,
meta xariteta haramara 'ameukatewa kanikuxexeɨriwani.
8 Yunaitɨ kwiepa xemɨtama Yawé xekenayemakaka,
yunaitɨ teɨteri mana kiekatari xekenayexeiyani,
9 mɨkɨ 'utaniuku, naitɨ pɨtiune,
mɨkɨ tiuta'aitaku, naitɨ 'aixɨa pɨtiuyɨ.
10 Nuiwarite kwiepa memɨtama kememɨteyuriku Yawé pɨkawapitɨa memeye'atɨanikɨ,
ke'axamemɨteyuriku teɨteri pɨkawapitɨa.
11 Peru Yawé kemɨtiyurimɨkɨ, yapɨtikɨyɨne yuheyemekɨ,
kemɨtiku'eriwa peye'atɨwa.
12 'Iya nuiwari keyutemawieka Kakaɨyarieya Yawé mɨhɨkɨkɨ,
yuteɨterima mɨwaranayexei hetsiena mieme memɨhɨkɨtɨnikɨ.
13 Yawé muyuawitsie paitɨ pɨtaniere,
pɨwaxeiya yunaime teɨteri,
14 mɨkɨ pɨwataxeiya yu'uwenitsie paitɨ 'akaitɨ,
yunaime teɨteri kwiepa memɨtama.
15 Mɨkɨ pɨhɨkɨ yunaime 'iyari mɨwarutiwewiri,
kememɨteyurie naime pɨtimate.
16 Ti'aitame pɨkayutawikweitsitɨwa tsepanetɨ kuyaxi yuwaɨkawame mɨwarexeiya,
meta tiyumemiwame kwinimieme mɨtiyɨwe waɨkawa mɨtɨrɨkaɨyekɨ pɨkatawikweni.
17 Tixaɨtɨ pɨkatihɨkɨ kawayutsixi wahetsie teyukwitɨwetɨ temɨte'ayu'iwakɨ,
tsepa waɨkawa mɨtɨrɨkaɨye pɨkatiyuwikweitsitɨwa.
18 Matsi Yawé pɨwa'ɨwiya memeyemakaxe,
naki'eriyayatsie memɨtewiya,
19 kepauka memɨkwi'iwarɨmeni wahetsie kaninuaka,
kepauka haakaxa mayeikatsie, pɨkawapitɨa memɨkwinikɨ.
20 Yemekɨ 'aixɨa 'iyari Yawé hetsie tetewiyatɨ tepɨtetakwewie,
mɨkɨ tatsiparewiwame pɨhɨkɨ meta tahetsie nunuwame.
21 Ta'iyari puyutemawie hetsiena mieme,
mɨpatsietsie temɨtewiyakɨ.
22 Yawé, 'anaki'eriya mɨmariwe, tahamatɨa yaketiuyeikani,
yemekɨ ketemɨte'itakwewie 'ahetsiemieme.