40
(Nɨa 40:13-17 – Nɨa 70:1-5)
Teyuitɨwamete wa'ukiyari. Rawiri nɨawarieya.
1 Yawé netakwewietɨ nekanayani nekawaɨripietɨ,
mɨkɨ pɨnetsi'uxei, nehiwari kaniu'enieni.
2 Mɨkɨ teukiyata kanenatihana,
haxuta paitɨ meta yeuta paitɨ nemɨkawamarietsie,
tetetsie kanenakeni,
kwiepa 'aixɨa 'anekɨa kaneniukayeni.
3 Kwikari hekwame kaneniupitɨani nemitakwikanikɨ,
nɨawari 'aixɨa haineme takakaɨyari hetsiemieme.
Mɨpaɨ mete'uneniereka yumɨiretɨ mekaniutimamani,
Yawé hetsie metewiyatɨ mekanakɨne.
4 'Aixɨa pɨ'itɨarie tewi Yawé hetsie mɨtiwiya,
memɨkayuri kakaɨyarixi
memɨwarayexeiya wahetsɨa parewiya mɨkaha'iwawa.
5 Yawé nekakaɨyari, pɨwaɨkawa
mamariwaweme kepemɨtiuyuri.
Pɨkayɨwe temiti'inɨata
ke'aixɨa pemɨtiuka'iyari tahetsiemieme.
Xɨka ne'itaxata,
pɨwaɨkawa matsi kenemɨkarayexatawe.
6 'Ekɨ pɨkametsinake tinaitɨ mawari,
'ekɨ matsi neheu'ename pepɨnetsi'ayeitɨa,
'ekɨ pepɨkahe'iwawa mawari taiyarikayari
meta mawarika 'axamɨtiuyuri hetsiemieme.
7 'Ayumieme mɨpaɨ neputayɨ: «Ne 'ena pepɨnetsihexeiya,
niuki xapatsie kemaine nehetsiemieme.
8 Nekakaɨyari, pɨnetsinake kemɨmetinake mɨpaɨ nemɨtiyurienenikɨ,
'a'inɨari niukiyari ne'iyaritsie nepexeiya».
9 Yuwaɨkawatɨ meyuxeɨriekaku,
nepɨtiutahekɨataxɨ heitserie kemɨmetinake.
Yawé, 'ekɨ pepɨtimate, neteni
yuheyemekɨ nemɨka'anutanamakɨ.
10 Keheitserie mɨmetinake nepɨka'i'awieta ne'iyaritsie,
matsi nepikuxatane ke'aixɨa pemɨtikamie meta kepemɨratawikwetsitɨani.
Yumɨiretɨ meyuxeɨriekaku nepɨka'enukanama,
'anaki'eriya mɨmariwe meta tita yurikɨ mɨraine.
11 Yawé, kenenenenimayaka,
'anaki'eriyakɨ kenene'awietani meta yuri pemainekɨ.
12 Waɨkawa 'axamɨti'anene pɨneranutinama,
pɨtimɨire nemɨtiuti'inɨata nepɨkayɨwe.
Pɨnetsi'anuku'axixɨ ke'axanemɨtiuyuri,
'ari nepɨkaheuniere.
Nekɨpate reuyeta kanipaɨmeni,
ne'iyari kaneuyuyehɨpani.
13 Yawé, xeiya kenaye'a pemɨnetsixɨnakɨ.
Yawé, kwitɨwa kenaye'a keneneuparewi.
14 Mekeheuyuyexɨrieni meke'uyutitetewiya,
yunaitɨ kemɨ'ane memɨnetsimieku,
mekeheuyuta'unaxɨani me'a'iwarieme,
yunaitɨ kehate memɨtekuwautɨwe 'axamenetsiyurikutɨ,
15 kememɨte'a'iwarieni memɨnetsinanaima
meneniereme meke'utimamani.
16 Kemɨ'ane memɨmetsikuwaɨtɨwe
meke'uyukatemamawieni 'ahetsie,
kemɨ'ane 'awikweitsitɨarika memɨnaki'erie, mɨpaɨ yuheyemekɨ meke'utiyuaneni:
«Pɨmariwe yemekɨ Yawé».
17 Neta, tixaɨtɨ nemɨkarexeiya meta nereuyehɨatɨ,
Ti'aitame kenetsi'uxeiya.
'Ekɨ netsiwikweitsitɨwame pepɨhɨkɨ, netsixɨname,
'apepɨkareutewini, nekakaɨyari 'aku.