51
Rawiri nɨawarieya, kepauka tixaxatame Natani meikuxei Rawiri Wetitsawe hamatɨa 'axamete'uyurieku.
1 Kakaɨyari, kenenenenimayaka,
mɨmariwekɨ 'anaki'eriya,
mɨwaɨkawakɨ kepemɨtiuyukanenimaya,
ke'axanemɨtiuyuri kenetinanuyeitɨiri.
2 Keneneutahauxina naime 'axamɨti'anekɨ
kenanuyeitɨa nexurikime.
3 Ke'axanemɨtiuyuri nepɨtimate,
mɨpaɨ xeikɨa nepɨtiku'eriwa.
4 'Ahepaɨtsita 'axanepɨtiuyuri, 'ahepaɨtsita xeikɨa,
'ahɨxie 'axanepɨtiuyuri,
'ayumieme 'ekɨ heitserie pepexeiya,
ke'aixɨa pemɨtiyuriene, 'aixɨa pɨ'ane.
5 Ne mɨpaɨ nepɨtimate nemutinuiwaxɨtsietɨtɨ 'axanepɨtiuka'iyari,
'axanetiyuruwametɨtɨ nemaama hetsie nepɨyenuiwaxɨ.
6 Ne mɨpaɨ nepɨtimate 'ekɨ tita yuri mɨraine pepɨnaki'erie,
'ekɨ ha'awiekamekɨ pepɨnetiuta'ɨkitɨa nemɨtimaiwenikɨ.
7 'Aixɨa keneneuyuri hitsupu xawarikɨ penetsikuwayatɨ, 'aixɨa ne'anetɨ nekanayeimɨkɨ,
keneneuhauxina, witsinetituxatɨ nekanayeimɨkɨ 'ɨwi kemɨkatituxa.
8 Keneneupitɨa temawierika,
temawierika keneupitɨa 'ikɨ 'umete pemika'unaxɨ.
9 'Ahɨxie tita 'axanemɨtiuyuri kenatɨmaiya
meta naime 'axamɨti'ane kenanuyeitɨa.
10 Kakaɨyari, nehetsie keneunetɨa 'iyari mɨ'itiya,
'iyari nehetsie mɨyeka keneuhekwatɨa.
11 Pepɨkanetsikupatani 'ahetsɨa nemuyeikanikɨ,
'a'iyari mɨtiyupata pepɨkanetsikunawairiwani.
12 'Awikweitsitɨarika temawierikayari tawarita keneneupitɨa,
'iyari yatikamietɨ kenetsikuyuitɨwani.
13 Mɨpaɨ ne'anetɨ 'axateyuruwamete 'ahuye nepɨwaxeitsitɨaka,
'axateyuruwamete 'ahetsɨa mepɨ'axɨani.
14 Nekakaɨyari, netsiwikweitsitɨwame,
keneneutawikweitsitɨa xuriya nemɨtayeurikɨ,
'ana ne nepɨmetsinɨawani 'aixɨa pemɨtiyurienekɨ.
15 Neti'aitɨwame, neteni keneupitɨa,
nemɨmetsinɨawanikɨ.
16 Mawari 'ekɨ pɨkametsinake
meta mawari taiyariyari,
xɨka metsinakenike ne nepɨmetsixatɨakakeyu.
17 Mawari mɨmetsinake
'iyari muyuhiwerie pɨhɨkɨ,
'ekɨ Kakaɨyari, pepɨka'ixani'erie
'iyari mɨtiuka'eniwa meta 'axamɨti'ane mɨtiuhayewaxɨ.
18 Kemɨmetinake, Tsiyuni 'aixɨa mɨtiukaxexeiyanikɨ yaketineuyuri,
Kerutsareme tetsariyaya kuraruyari keneutawewi.
19 Hikɨ 'ana mawari 'aixɨa mɨ'anene pɨmetsinakire,
naitɨ mawari taiyariyari,
meta 'amawari taiyametsie mepɨtimawarieni tsikerutsixi.