56
Teyuitɨwamete wa'ukiyari. Kwikarieya xekeneuweiyani «Tuaxatsie kukuru 'ateewa muyeka». Rawiri 'ikɨ nɨawari meka'utɨa, kepauka piritsiteutsixi pɨretsu memeyeitɨa Kahati kiekariyaritsie.
1 Kenenenenimayaka, xɨa'ui Kakaɨyari,
teɨteri mepuxuawe menetsi'uweiyatɨ.
Tukarikɨ mepɨnetsimietɨwe memɨnetsi'aye'unie,
2 tukarikɨ mekaneniuweiyani menetsimiekutɨ,
mekaniyumɨireni meyuti'ɨretɨ memɨnetsimietɨwe.
3 Kepauka nemeuma,
'ahetsie xeikɨa nepɨtiwiya.
4 Kakaɨyari hetsie nepɨtiwiya, niukieya nepɨnɨawa,
Kakaɨyari hetsie nepɨtiwiya, nepɨkaheuma.
Ketitayari kuta tewi netimakaka 'atsimɨkanetsi'uyuriwe.
5 Tukarikɨ neniuki mekanititunani,
kememɨnetenanaimani xeikɨa, mɨpaɨ mekateniku'eriwani.
6 Mekanenihupieka xeikɨa,
kwi mekaniyɨaka menetsimiekutɨ
kwi xeikɨa mekanenixeiyani kenemɨtiyuriene.
7 Nekakaɨyari, 'ahaxɨakɨ mɨkɨ teɨteri keniwarunanaima.
Nitɨma memuyuta'una pepɨkawapitɨaka.
8 'Ekɨ pepi'inɨata kenemɨtiyuku'unane,
puteyutsie ne'ukai pepɨkatua.
¿Kamɨtsɨ pekareye'utɨa?
9 Kepauka ne parewiya nemɨmetsitawawirieni,
memɨnetsi'aye'unie mekanitanautsaxɨakuni.
Ne mɨpaɨ nekatinimaika: Kakaɨyari nehamatɨa puyeika.
10 Kakaɨyari hetsie nepɨtiwiya, niukieya nepɨnɨawa,
Yawé hetsie nepɨtiwiya, niukieyatsie nepɨnetemawie,
11 Kakaɨyari hetsie nepɨtiwiya, ne nepɨkaheuma.
¿Ketitarikuta tewi netimakaka 'atsimɨkatiuyuriwe?
12 Kakaɨyari, ne 'ahetsiemieme nepɨnetipiniri,
ne kenemɨtiyutemawie nepumatitimawirieni.
13 'Ekɨ Kakaɨyari, nemekawautsetsie pepɨnetsi'ɨxɨnaxɨ,
teukiyapa pepɨnetsi'ayeha,
yuheyemekɨ 'ahɨxie nemɨmienikɨ
tukarikɨ hekɨariyatsie.