59
Teyuitɨwamete wa'ukiyari. Kwikarieya xekeneuweiyani «Pepɨka'ika'unani». Rawiri 'utɨarikaya, kepauka Tsahuri mɨtiuta'ai Rawiri kiiya mɨhɨriekakɨ meta mɨmierienikɨ.
1 Xɨa'ui, Kakaɨyari, keneneutawikweitsitɨa memɨnetsi'aye'unie wahetsɨa,
nehetsie kenenuaka nemɨmierienekɨ.
2 'Axateyuruwamete wahetsɨa keneneutawikweitsitɨa,
meta memɨteyumemiwa wahetsɨa.
3 Keniwaruxeiya kememɨnetehupietɨwe.
Yawé, teɨteri 'axamete'u'iyaritɨ mekanenimiekuni
tsepa ne 'axanekatiyuriene.
4 Mekaniyumexɨitɨaka me'aye'axɨanike
tsepa ne 'axanekawayuriene.
Xeiya kenaye'a keneneuparewi.
Keneneuxeiya hikɨ kenemɨ'ane.
5 'Ekɨ, Yawé, Kakaɨyari pepɨhɨkɨ Naimekɨmɨtɨrɨkaɨye.
'Ixaheri Kakaɨyarieya pepɨhɨkɨ.
Xeiya kenanukukeka keniwaru'uximatɨa yunaime nuiwarite,
pepɨkawanenimayaka mɨkɨ memɨteyukananaima.
6 Tɨkarikɨ mekani'axeni,
tsɨikɨri wahepaɨ mete'uyuhaxɨatɨwatɨ
kiekari warita mekaneuhupatɨkani.
7 Mekanatakwaimuxatɨkani yutenie,
'ixipara yuteta mekanatinenetɨwani,
mɨpaɨ me'utiyuatɨ: «Kemɨ'ane kuta pɨtatsi'enie».
8 'Ekɨ matsi, Yawé, xɨa'ui pepaine wahetsiemieme,
pepanawe nuiwarite wahetsiemieme.
9 'Ekɨ, netɨrɨkariya pekanihɨkɨtɨni, 'ahetsɨa nepeutaniere,
'ekɨtsɨ, Kakaɨyari, nehetsie nunuwame pekanihɨkɨtɨni.
10 'Ekɨ Kakaɨyari pekanihɨkɨtɨni pemɨnetsinaki'erie,
pe'anuyekaitɨ pekaniyemieni
nehɨxie pemɨwareka'unakɨ memɨnetsi'aye'unie.
11 Peru pepɨkawarekukukuyani,
neteɨterima memɨkatehatɨtɨmaiyanikɨ.
Keniwaranutarɨwaitɨaxɨa kepemɨtitɨrɨkaɨye, haweri keniwaruyuri.
Tati'aitɨwame, 'ekɨ tahetsie nunuwame pekanihɨkɨtɨni.
12 Yutetakɨ 'axamemutiyuanekɨ,
yuniukikɨ 'axamemɨteyuriekɨ,
kememɨteyutimariwekata winiyaritsie meke'ukaxɨrieni.
Memɨteyukakwatsekɨ 'itarikakɨ memutiniukakɨ,
13 keniwarutixɨtsitɨa 'ahaxɨakɨ,
yemekɨ keniwarutixɨtsitɨa memɨka'u'uwanikɨ.
'Ana yumɨiretɨ mɨpaɨ mepɨtehetimani kename 'aku 'ixaheritsixi wahetsie Kakaɨyari ti'aita,
metatsiere kwie manu'axe paitɨ.
14 Mɨkɨtsɨ tɨkarikɨ mekani'axeni,
tsɨikɨri wahepaɨ mete'uyuhaxɨatɨwatɨ
kiekari warita mekaneuhupatɨkani.
15 Mana mekaniu'uwani tsepa hakewa 'ikwai meheuwautɨkaitɨ,
xɨka mekahuxaka mekaniutitsuanani.
16 Ne matsi 'atɨrɨkariya nepɨnɨawani,
ximerita 'anaki'eriya nepɨnɨawani,
'ekɨ nehetsie nunuwame pemɨhɨkɨkɨ,
kepauka nemu'uximatɨarie 'ahetsɨa nepɨneti'awiwieta.
17 'Ekɨ netɨrɨkariya pekanihɨkɨtɨni, nɨawari nepɨtikwika 'ahetsiemieme,
'ekɨtsɨ, Kakaɨyari, nehetsie nunuwame pekanihɨkɨtɨni.
'Ekɨ Kakaɨyari pekanihɨkɨtɨni pemɨnetsinaki'erie.