65
Teyuitɨwamete wa'ukiyari. Rawiri nɨawarieya. Kwikari.
1 'Ekɨ, Kakaɨyari 'aku Tsiyuni mieme,
Nɨawari pɨ'ahetsiemieme.
'Ekɨ matsi peuyewetse ketemɨteyɨhɨritɨa temɨmete'aye'atɨiriwani,
2 'ekɨtsɨ nenewieri pekani'enieka.
Yunaitɨ teɨteri 'ahetsɨa mepɨye'axe,
3 'axamemɨte'u'iyarikɨ.
'Axaketemɨteyurie mɨkɨ pɨtatsihatixɨrɨwa,
'ekɨ matsi pepɨtareuyehɨwirie.
4 'Aixɨa ke'itɨarieka 'iya kemɨ'ane 'ekɨ pemanayexei,
'iya kemɨ'ane 'ahetsɨa pemɨ'atɨa 'atakwa mukanikɨ.
'Akie timieme 'aixɨa mɨti'anekɨ tekehuxaka,
kepemɨtatiumi 'atuki mɨpatsieta timiemekɨ.
5 'Ekɨ, Kakaɨyari 'aku tatsiwikweitsitɨwame,
pepɨtatsiku'eiya mariwemekɨ heitseriemekɨ,
'ekɨ pepɨtakwewiya naitsarie kwie manu'axe paitɨ
meta haramara manu'axe paitɨ.
6 'Ekɨ, 'atɨrɨkariyakɨ, hɨri peputiwewi,
kepemɨtitɨrɨkaɨye pepɨtiuyuri.
7 'Ekɨ matsi haramara ha'akaku pepinɨtɨa,
hamewarieya kemɨtiuyuanekai,
meta teɨteri wahiwari.
8 Yunaitɨ naitsarie kwiepa memɨtama
mepɨmama mariwemekɨ kepemɨtiyuriene,
tau manatineika meta makayuyuipike
'ekɨ kwikari witsi'anɨyɨneme pepɨwapitɨa.
9 'Ekɨ peti'ɨwiyatɨ kwiepa pepɨtiweriya,
waɨkawamekɨ pepɨtiweriya.
Kakaɨyari 'akiteyatsie haa pɨhɨpɨne,
tɨriku teɨteri memexeiyanikɨ.
Mɨpaɨ kwie 'aixɨa pekaniyurieka.
10 Xuruku hakɨ pepɨhatuiya, haxu pepɨtipeniya pepekuweririta,
kwie pepɨyumenariya wiyerikɨ
meta tita mɨtitineika 'aixɨa pepɨtiyurie.
11 'Ekɨ xeiwitari xeitaxari pepikemaritɨa waɨkawa petixuaweritɨatɨ,
kaxetate pɨtihɨpɨrike waɨkawa mɨtixuawekɨ.
12 'Ɨxa pɨtsitsiɨrawi makuwakitsie mieme,
yemurite temawierika kamixateyari panakatɨkɨ.
13 Mukuweweritsie tewaxi kiekari hepaɨ mepɨteyuxexeiya,
mayeweweritsie tɨriku pɨhɨkɨa,
meputikwika meputihiwa temawierikakɨ.