83
Kwikari. 'Atsahapi nɨawarieya.
1 Kakaɨyari 'aku, kayuwatɨ pepɨka'umaka,
Kakaɨyari 'aku, pemɨkaheu'ena pepɨkahɨkɨtɨni 'atsipekatiyurimɨtɨ.
2 Keniwaruxeiya memɨmetsi'aye'unie kememɨteyukwiku,
memɨmetsixani'erie mepɨmetsi'iwaku.
3 Metemaiwawetɨ 'ateɨterima wahepaɨtsita mepɨtekuxata,
'axamewayurienike pemɨwanaki'erie.
4 Mɨpaɨ mekaniutiyuaneni: «Hikɨmɨtɨka, wanuiwari tepauyehɨani.
'Ixaheri manɨyɨne pɨkaku'eriwaniri».
5 Yunaitɨ mekaniyutaxewireni,
tɨratu mekaniuwewieni 'ahepaɨtsita miemeyari metekuxatatɨ:
6 'Erumi teɨterimama memukutetɨka meta 'Itsimaheri,
Muhawi kiekatari meta Hakaxi teɨterimama,
7 Kewari, 'Amuni meta 'Amareki wateɨterima,
Piritsiteu kwieyari hetsie kiekatari meta Tiru kiekatari.
8 Meta 'Atsiriya kaniwarɨnɨni,
Ruti nuiwarimama kaniwaparewieka.
9 Mariyani kepemɨwaruyuri mɨpaɨta mɨkɨ keniwaruyuri,
kepemɨwaruyuri Tsitsara meta Kawini, Kitsuni 'akiyari manuyekatsie,
10 mɨkɨ 'Eniruxi mɨrakutwatsie memukwi
kwiepa memuyuhayewaxɨ kwitarai hepaɨ.
11 'Urewi meta Tsewi kepemɨwaruyuri
mɨpaɨta keniwaruyuri memanuyetei mana memɨtama,
memanuyetei te'aitamete yaxeikɨa keniwaruyuri
kepemɨwaruyuri hepaɨ Tsewa meta Tsarimuna,
12 Mɨpaɨ memaitɨkatei: «Tapiini tepayeitɨani
Kakaɨyari kwieya mu'ɨxaya».
13 Nekakaɨyari, 'ɨtsi haikɨritsie hepaɨ ketiniwaruxikɨriwitsitɨa,
xatsi 'eka mei'enitsitɨwa hepaɨ.
14 Tai kɨyexite kemɨtitixɨxɨtsitɨwa
meta tai hɨri kemɨtititaiya hepaɨ,
15 mɨpaɨ ketiniwaranukuweiya pewamariutatɨ,
waɨkawa keniwarutimariuta 'a'ekakɨ.
16 Yawé, keniwarutewiyatsitɨa,
memɨmetsitiwaunikɨ.
17 Yuheyemekɨ meke'utewiyatsitɨarieni,
meke'ukwini tixaɨtɨ mekatehayuyeitɨatɨ.
18 Meketehetimani 'ekɨ Yawé pemɨhɨkɨkɨ,
mɨpaɨ pemɨtitewa,
mɨpaɨ meketemaika 'ekɨ xeikɨa 'Amutewi pemɨhɨkɨkɨ
'ena kwiepa naitsarie.