85
Teyuitɨwamete wa'ukiyari. Kure niwemama wanɨawari.
1 Yawé, 'aixɨa pepɨtiuka'iyari 'ikɨ kwie mɨti'apiini hepaɨtsita
Kakuwu pemuhekwariyaxɨkɨ,
2 Pepɨtiwareuyehɨwiri 'ateɨterima 'axamemɨte'uyurikɨ,
pepɨrayukatua naime 'axamemɨte'uyurikɨ,
3 pepukahaxɨapi,
pepɨtiuhayewaxɨ 'ahaxɨa pe'utaiyaka.
4 Tawarita matsi 'aixɨa ketaneuyuri, Kakaɨyari tatsiwikweitsitɨwame,
ketineuhayewa 'axakepemɨtatiku'eriya.
5 ¿Kamɨtsɨ petiha'aka 'aheyemekɨ tahepaɨtsita?
¿Peha'atɨ 'aheyemekɨ perayani?
6 ¿Tawarita tukari hekwame pekatatiyetuirieni,
'ateɨterima 'ahetsiemieme memɨyutemawiekakɨ?
7 Yawé, ketaneuxeitsitɨa 'anaki'eriya mɨkaxɨwe,
ketaneyetuiri 'awikweitsitɨarika.
8 Nepi'enieni Yawé Kakaɨyari kemaine:
mɨkɨ yuteɨterima kayuwatɨ memexeiyanikɨ pɨwapitɨani wahetsiemieme meta kemɨ'ane hetsiena mieme 'aixɨa memɨtekahu,
tawarita 'atsimemɨkatemate wahepaɨ mepɨkayɨaka.
9 'Ahurawa puyeika watawikweitsitɨanike kemɨ'ane memimakaxe,
kemɨtimariwe mɨmatsiɨkɨnikɨ 'ena kwiepa.
10 Naki'eriya meta tita yuri mɨraine puyukaxeiya,
kayuwatɨ mɨ'ayumie meta mɨtiheitserie hamatɨa mepuyuti'itseni.
11 'Ena kwiepa pɨtineni tita mɨtiyuri,
muyuawitsieta 'aixɨa mɨti'ane puyuhekɨare.
12 Yawé 'aixɨa pɨtatsiyurieni,
takwie 'ikwaxi waɨkawa pɨtitixuaweriya.
13 Tita mɨtiheitserie hɨxiena panuyeyerɨni
mɨkɨ pɨwatahuyetɨani.