88
Teyuitɨwamete wa'ukiyari. Hemani 'ɨkitsikaya 'etsirahi tewiyari. Tikwikame kwikariyari. Kure niwemama wanɨawari.
1 Yawé, Kakaɨyari netsiwikweitsitɨwame,
tukarikɨ tɨkarikɨ nekanahiwani 'ahɨxie.
2 'Ahetsɨa paitɨ nenenewieri keheuye'ani,
kenemɨmatiwawirie kenene'enieka.
3 Nepɨhɨne 'uximatɨarikakɨ
'ari netukari mɨki teukiyapa kaneukaniereni.
4 'Ari nekani'inɨatsieka putsuta memeukaxɨriwa wahamatɨa,
kuya mɨkatɨrɨkaɨye nekanihɨkɨtɨni.
5 'Ari yateewa nekaniutekieka, mɨkite watsata,
mɨki hepaɨ nepɨtinexexeiya kwieta matika hepaɨ,
'iya kemɨ'ane 'ari pemɨkawara'eriwa,
memanakaxɨri 'amamatsie.
6 Putsu meukatewatsie pekaneneukahɨani,
waɨkawa muyemariwetsie meukatewatsie.
7 'Ahaxɨa kemɨrahete nehetsie pukawe,
pekanenehana 'ahamewarikɨ.
8 Pekaneniunawairieni yunaime nehamikuma
meta mɨkɨ wahɨxie nexani'eriwame pepɨnetsi'ayeitɨa.
Nekananutahɨiyaka meta nemuyuxɨna nepɨkayɨwe,
9 nehɨxite pɨkaheuneniere hiwerikakɨ.
Yawé, ne tukarikɨ nemetsihahɨawe,
'ahepa nekaneutamemeni.
10 ¿Kamɨtsɨ mɨkite watsata mariweme pemɨtiuyurieni petiyɨwe?
¿Kamɨtsɨ mɨkite me'anuku'ume pamɨpariyutsi memetsi'upitɨani tiyɨwe?
11 ¿Kamɨtsɨ mɨkite watsata 'anaki'eriya rekuxaxatsiwa,
meta ke'aixɨa pemɨtikamie meukatewatsie?
12 ¿Kamɨtsɨ yɨwipa timatiwa mariweme kepemɨtiyuriene,
yatɨni heitserie kepemɨrexeiya kwie matɨmaiyarietsie?
13 Yawé, ne waɨkawamekɨ nepɨmetsiwawirie keneneuparewi,
ximeri nepɨmetsi'utiwawa neyunenewietɨ.
14 ¿Yawé, titayari peneti'uxiwe'erie?
¿Titayari pekanetixeiyamɨkɨ?
15 Ne nepɨtiuka'eniwa temaikɨyari paitɨtɨ,
heiwa 'ari nepɨkukweriwayɨne.
Pekaneneyenɨ'airieni yemekɨ waɨkawa 'uximatɨarika
'ari tawarita nekapɨyɨwe.
16 'Ahaxɨa yemekɨ nehetsie kaniukawiwieni,
'a'iwaɨyɨ kanenitaxɨtɨaximeni.
17 Haramara hepaɨ ne'aurie mepɨhɨne tukarikɨ,
mekaneniukurarutɨiya yemekɨ.
18 Pekaneniunawairieni nehamikuma meta waɨkawa nemɨwanaki'erie,
hikɨ yɨriya hamatɨa xeikɨa tekaniyunaki'erieka.