97
1 Yawé pɨti'aitame.
Kwie keyutemawieka.
Xekeneyutemamawieka kwie haramaratsie xemɨyetei.
2 Haiwitɨri 'anenetɨ yɨyɨwitɨ 'auriena kanatetɨkani,
heitserie katinikuxatani yu'uwenitsie 'akaitɨ.
3 Tai hɨxiena 'anuyekaitɨ kaniumieni,
memeye'unie mɨwatitaiya.
4 Mimierikayakɨ kwiepa kanakuhekɨkɨareni,
'ixeiyatɨ kwie kaniwatayuaneni.
5 Yawé hɨxie, kwie naime mukutsiyari,
hɨrite pɨtixɨrɨwe katira hepaɨ.
6 Muyuawi pikuxata heitserie kemɨrexeiya,
yunaitɨ teɨteri mepixeiya kemɨtimariwe.
7 Meke'utewiyatsitɨarieni yunaitɨ kakaɨyarixi memɨwarayexeiya,
kemɨ'ane memɨyuti'ɨre memɨkakakaɨyarixi wahekɨ.
Yunaitɨ kakaɨyarixi hɨxiena xekeneukahɨxima'uti.
8 Yawé, heitserie kepemɨtiyurienekɨ,
Tsiyuni mɨkɨ pɨti'enie mɨkɨkɨ puyutemawie,
meta Kura kiekariyarite puyutemamawie.
9 'Ekɨ Yawé 'Apemutewi pemɨhɨkɨkɨ,
kwiepa naitsarie pemɨti'aita.
'Ekɨ matsi memɨkakakaɨyarixi wayeta yemekɨ pepɨkawe.
10 Yawé pɨwanaki'erie kemɨ'ane 'axamɨti'ane memɨxani'erie,
'aixɨa memɨteyurie mɨkɨ watukari pɨ'ɨwiya,
kepauka Kakaɨyari memɨka'ayexeiya memuwa'uximatɨa wahetsie kaninuaka.
11 Heitserie memexeiya hekɨariya wahetsie pɨ'axe,
meta temawierika pɨ'axe kemɨ'ane yu'iyaritsie 'aixɨa memɨteyɨkɨhɨawe wahetsie.
12 Xekeneyutemamawieka Yawé hetsie, xeme teɨteri heitserie xemexeiya,
meta 'aixɨa xekenaitɨkani hetsiena mieme kemɨtipatsie.