102
Mɨtiuka'eniwa nenewierieya kanihɨkɨtɨni, mɨximetɨ, yutatuatɨ yuhiwerietɨ Yawé kemɨtiutahɨawixɨ.
1 Yawé, keneu'eni nenenewieri,
'ahetsɨa keye'ani ne'iwaurika hiwariyari.
2 Neuxei kwerietɨ keneneuxeiya
kepauka nemɨtiuka'eniwa.
Kwi keneneu'eni,
yapauka keneneuta'eiya kepauka nemetsihahɨawe.
3 Karikɨ kɨtsi hepaɨ netukari kanitiparikeni,
ne'umete kanenikukwaxiyani tɨɨ hepaɨ.
4 Ne'iyari pɨkayɨweri meta 'iteɨri hepaɨ pɨtawaxime,
metatsiere nepɨkareukwaimɨkɨ.
5 Waɨkawa karima nemuta'aiwakɨ
kaniyɨweni ne'umete muti'inɨata.
6 Nekaneunutuixieka nɨpe yuxaɨta makumawetsie muyeika hepaɨ nekatiniyumaika,
mikɨri hepaɨ nekatiniyumaika kiekari mu'uni tsata muyeika.
7 Nemeukuni nepɨkayɨweri,
wiki yuxaɨta kii heima makaka hepaɨ nepɨtiyumate.
8 Tsepa kepauka memɨnetsi'aye'unie yuniukikɨ mepɨnetekwinitɨa,
meta mekaneniutaterɨwani paitɨ kepauka 'axamemɨtiyuani.
9 Naxi xeikɨa kanine'ikwaitɨni,
nemɨti'ie hamatɨa ne'ukai nekananuye'eni.
10 Pe'uyeha'aka waɨkawa,
pepɨnetsi'anukuketɨa 'ariketa 'ateewa pepɨnetsiheukahɨani.
11 Netukari 'etɨri mɨyukupata hepaɨ pɨ'ane,
tupiriya hepaɨ nepɨtayɨnarirɨme.
12 Yawé, 'ekɨ 'aheyemekɨ pekatini'aitani,
yuheyemekɨ 'ekɨ 'apekatiniteriweni yunaime nuiwarite watsata.
13 Pekananukukemɨkɨ meta Tsiyuni pekanitinenimayatamɨkɨ,
'ari mɨkɨ tukari kanaye'aniri pemitinenimayatatsie.
Mɨkɨ tukari kemɨtiu'inɨaritsie kanaye'ani.
14 'Ahetsɨa miemete mate'uximayatsiriwamete mekanixɨamayaka kemɨtiuta'unekai,
'unimeyari mexeiyatɨ mepinaki'erie.
15 Yawé mekanimakaxekakuni nuiwarite kwiepa memɨtama,
te'aitamete kwiepa memɨte'aita yunaitɨ mekanimaikakuni kemɨtimariwe.
16 Karikɨ Yawé Tsiyuni tawarita kanihekwatɨamɨkɨ,
meta kemɨtitɨrɨkaɨye matsiɨkɨtɨ kanayeimɨkɨ.
17 Memɨyuhiwerie wanenewieri pe'enietɨ pekanayeimɨkɨ,
kememɨmetewawirieka tsiepɨre pepɨraye'atɨwani.
18 'Ikɨ keraka'utɨarieni 'iya memɨtinunuiwa wahetsiemieme,
meta kiekari memɨnetɨarieni Yawé 'aixɨa meketehahɨaweni.
19 Yawé kanakaniere yutuki mɨmariweta 'ayekaitɨ,
kwiepa naitsarie kanakuniere muyuawitsiepaitɨtɨ,
20 'ateewa memehapanie watsuari 'enienike
meta mɨwaxɨnakɨ 'ari memɨkwi'iwarɨme,
21 meta Tsiyunitsie Yawé mukuxaxatsiwanikɨ
meta Kerutsaremetsie mɨnɨawariekakɨ,
22 kepauka yunaitɨ teɨteri meta te'aitamete
memɨyukuxexeɨriwa Yawé metahɨaweke.
23 'Ane'umiekaku Kakaɨyari netɨrɨkariya kaniutixɨtɨani,
netukari 'etsikaniutipaɨmeriya.
24 'Ayumieme mɨpaɨ nekaniutayɨni:
«Nekakaɨyari, pepɨkanetsihewitɨkɨni, netukari hixɨapa,
'ekɨ 'aheyeme pepuyeika.
25 Tsɨtuapai 'ekɨ kwie pekaniunetɨani,
meta muyuawi kani'awewiyatɨni.
26 Mɨkɨ mekaneuyewekuni, 'ekɨ peru 'apepuyeika.
Naitɨ mɨkɨ katinitixɨmɨkɨ 'ixuriki hepaɨ.
Meta kemari hepaɨ pepipataxɨani,
huma pepeitawiwieni.
27 'Ekɨ peru yaxeikɨa mɨkɨ pepɨhɨkɨtɨni,
meta 'atukari hawaikɨ pɨkaheu'axe.
28 Mate'uximayatsiriwamete waniwema 'amepu'uwani,
meta wanuiwarima 'amepu'uwani 'ahɨxie».