115
(Nɨa 115:4-11 – Nɨa 135:15-20)
1 Yawé, 'aixɨa pɨ'ane 'ekɨ pemɨnɨawarieka,
'anaki'eriyakɨ meta yuri pemɨtikuxatakɨ,
tame matsi heitserie tepɨkahexeiya.
2 Hipatɨ teɨteri mɨpaɨ meputiyuaneni, metatsinanaimatɨ:
«¿Hakewa 'aku xekakaɨyari?»
3 Takakaɨyari muyuawitsie kaniuyeikani,
mɨkɨ yakatiniyurieneni kemɨtinake.
4 Peru mɨkɨ nuiwarite memɨwarayexeiya kakaɨyarixi huru meta pɨrata mekanihɨkɨtɨni,
teɨteri wawewiya.
5 Meputeni, peru mepɨkaniuwawe,
mepuhɨxi, peru mepukaheuneniere,
6 mepunaka, peru mepɨkaheu'enana,
meputsuri, peru mepɨkateheu'ɨkwe,
7 mepumama, peru mepɨkatemayɨawawe,
mepɨ'ɨka, peru mepɨka'ɨkɨniwawe,
mepɨkɨipi peru mepɨkayɨwawe memɨtehata'eiyakɨ.
8 Kemɨ'ane memɨwatiwewiwa, mɨkɨ wahepaɨ mepɨ'anene,
metatsiere yunaitɨ yuri memɨte'erie wahetsie.
9 Matsi 'ixaheritsixi, Yawé hetsie yuri xeketene'erieka,
mɨkɨ kanixeparewiwametɨni meta xehetsie nunuwame kanihɨkɨtɨni.
10 'Aruni xiɨyarimama, Yawé hetsie yuri xeketene'erieka,
mɨkɨ kanixeparewiwametɨni meta xehetsie nunuwame kanihɨkɨtɨni.
11 Kemɨ'ane Yawé xemayemakaxe, mɨkɨ hetsie yuri xeketene'erieka,
mɨkɨ kanixeparewiwametɨni meta xehetsie nunuwame kanihɨkɨtɨni.
12 Yawé pɨkatatsi'atɨmaiya meta 'aixɨa kataniyurieka:
'ixaheritsixi 'aixɨa kaniwayurieka,
meta 'Aruni xiɨyarimama 'aixɨa kaniwayurieka,
13 'aixɨa kaniwayurieka kemɨ'ane Yawé memayemakaxe,
'aixɨa kaniwayurieka 'amemɨtɨtɨ meta 'etsimemɨtɨtɨ.
14 Yawé kewamɨiriyani xetɨɨriyama
meta xeniwema watɨɨriyama.
15 Yawé hetsɨa timieme 'aixɨa mɨti'ane wahetsie ketinakeni,
muyuawi mutawewi meta kwie.
16 Muyuawi Yawé katinipiinieyatɨni,
peru teɨteri kwie kaniwayetuirieni.
17 Memukwiri mepɨkayɨwawe Yawé memɨnɨawani,
memukateukiekɨri.
18 Tame tekanihɨkɨtɨni Yawé temɨnɨawa
hikɨ meta yuheyemekɨ.
Yawé kenɨawarieka.