118
1 Yawé pamɨpariyutsi xekenepitɨaka, mɨkɨ 'aixɨa katiniuka'iyarini,
kemɨtiuyukanaki'erie yuheyemekɨ kataninaki'erieka.
2 'Ixaheritsixi mɨpaɨ meke'utiyuaneni:
«Kakaɨyari pɨkatihayewa tatsinaki'erietɨ yuheyemekɨ».
3 'Aruni xiɨyarimama mɨpaɨ meke'utiyuaneni:
«Kakaɨyari pɨkatihayewa tatsinaki'erietɨ yuheyemekɨ».
4 Mɨpaɨ meke'utiyuaneni kemɨ'ane Yawé memayemakaxe:
«Kakaɨyari pɨkatihayewa tatsinaki'erietɨ yuheyemekɨ».
5 Waɨkawa netiuka'eniwatɨ Yawé nekaniutahɨawe,
hikɨ mɨkɨ kaneniuta'eiya 'aixɨa kaneniuyurieni nemɨkatiuka'eniwanikɨ.
6 Yawé nehamatɨa kaniuyeikani, ne nepɨkaheuma,
¿xewitɨ tewi 'atsimɨnetsi'uyurieni pɨkayɨwe?
7 Yawé nehamatɨa kaniuyeikani, mɨkɨ netsiparewiwame kanihɨkɨtɨni,
tsiparatsɨ nekaniwaxeiyamɨkɨ kwiepa mekuheime memɨnetsi'aye'unie.
8 Matsi 'aixɨa pɨ'ane Yawé hetsie muyu'awietanikɨ,
pɨkaheuyewetse tewi hetsie mɨtiwiyani.
9 Matsi 'aixɨa pɨ'ane Yawé hetsie muyu'awietani,
'aixɨa pɨka'ane teɨteri memɨmamariwawe wahetsie mɨtiwiyani.
10 Yunaitɨ nuiwarite menetsi'aye'unietɨ mekanaketɨkɨne,
peru Yawé netsi'uparewieku nekaniwara'iwa.
11 Naitsarie nuiwarite mekaneniuhupieni,
peru Yawé netsi'uparewieku nekaniwara'iwa.
12 Xietexi wahepaɨ nehetsie mepɨteheukayexɨa,
peru meputitai kɨximɨari mɨtitatawe hepaɨ.
Yawé netsi'uparewieku nekaniwara'iwa.
13 Menetsinanaimatɨ mepɨnetsihetaimaxɨ nemekawenikɨ,
peru Yawé kaneniuparewieni.
14 Yawé netɨrɨkariya kanihɨkɨtɨni meta nekwikari,
mɨkɨ netsiwikweitsitɨwame kanihɨkɨtɨni.
15 Heitseriemekɨ memu'uwa wakiita
puxuawe hiwarika temawierikayari metehayu'iwaka:
«Yawé yutɨrɨkariyakɨ mariweme pɨtiyuriene,
16 Yawé tɨrɨkariyaya pɨnɨawarie.
Yawé yutɨrɨkariyakɨ mariweme pɨtiyuriene».
17 Hawaikɨ nepɨkamɨni, nepayeniereni
Yawé mariwemekɨ kemɨtiyuriene nemikuxatanikɨ.
18 Yawé pɨnetsi'ukuwaxɨa tiyukukuinemekɨ,
peru nemɨmɨnikɨ pɨkanetsiyetua.
19 Xekeneteneuyepiri kitenie hakewa memeutahaketsie 'aixɨa 'anemekɨ memu'uwa,
ne nemeutahanikɨ pamɨpariyutsi Yawé nemɨpitɨanikɨ.
20 Mɨkɨ Yawé kitenieya kanihɨkɨtɨni,
muwa mekaneutahakeni teɨteri heitserie memexeiya.
21 Pemɨnetsi'uta'eikɨ pamɨpariyutsi nepɨmetsipitɨani,
'ekɨ netsiwikweitsitɨwame pemɨhɨkɨkɨ.
22 Kii wewiwamete tete memutixani'eri,
matsi mɨkɨ tete 'itsikina mieme kanayani.
23 Mɨkɨkɨ tepɨhɨxiya mariwemekɨ,
Yawé pɨta matsi katiniuyurieni.
24 'Ikɨ tukaritsie Yawé mɨpaɨ katiniuyurieni,
'aixɨa tepɨteku'eriwani tepuyutemamawieka hetsiena mieme.
25 Yawé, wikweitsitɨarika ketaneupitɨa,
Yawé, temɨtehayu'iwakɨ ketaneupitɨa.
26 'Aixɨa ke'itɨarieka kemɨ'ane 'umamie Yawé hetsɨa mieme hɨkɨtɨtɨ.
Yawé kiita paitɨ 'aixɨa tepɨte'ikɨhɨawe.
27 Yawé kanikakaɨyaritɨni meta katanihekɨariwiyani,
hikɨmɨ tepɨwatinɨni Kakaɨyari teɨterimama tuturi tepanupini
mawari taiyame 'awayatsie paitɨ tepikɨwɨtɨani.
28 'Ekɨ pepɨnekakaɨyari, 'ayumieme pamɨpariyutsi nepɨmetsipitɨa,
'ekɨ pepɨnekakaɨyari, 'ayumieme nepɨmetsinɨawa.
29 Yawé pamɨpariyutsi xekenepitɨaka, mɨkɨ 'aixɨa katiniuka'iyarini,
mɨkɨ yuheyemekɨ kataninaki'erieka.