135
(Nɨa 135:15-20 – Nɨa 115:4-11)
1 Yawé kenɨawarieka.
Yawé xekenenɨawani.
Yawé te'uximayatsiriwamete, xekenenɨawani.
2 Xeme Yawé tukita yaxemɨteye'uwa,
meta takakaɨyari tukieya takwayaritsie.
3 Yawé xekenenɨawani, karikɨ mɨkɨ 'aixɨa katiniuka'iyarini,
nɨawari hetsiena mieme xekeneutikwikani, mɨpaɨ katininakeni.
4 Yawé Kakuwu panayexei yuhetsiemieme mayeitɨanikɨ,
'ixaheritsixi teɨterimama memakɨnekɨ.
5 Ne mɨpaɨ nepɨtimate Yawé, tati'aitɨwame,
matsi pumariwe keyuri hipatɨ kakaɨyarixi.
6 Yawé naime yapɨtiyuriene kemɨtinake,
taheima muyuawitsie meta 'ena kwiepa,
haramaratsie meta naitsarie meukatetewatsie.
7 Kwie manu'axetsie paitɨ haiwitɨri panuku'enitsitɨwa,
mimierikari peyenɨ'awa wiyeritsata
metatsiere 'eka pewatiyepiwa muye'ɨnetsie.
8 'Ekipitutari waniwema mexɨakate kaniwarukwini,
teɨteri waniwema meta tewaxi waniwema.
9 'Ekipitu kwieyaritsie,
Kakaɨyari 'inɨari mamariwaweme kanenɨ'ani
Parahuni hetsie meta yunaime te'i'uximayatsiriwamete wahetsie.
10 Yumɨireme nuiwarite kaniwarukwini,
te'aitamete metɨrɨkawime kaniwarukwini.
11 Tsikuni, 'amuxeutsixi tiwa'aitɨwame,
ti'aitame 'Uhuki Watsani kwieyaritsie,
meta yunaime te'aitamete Kanani memɨtamakai.
12 Mɨkɨ wakwie kaniyetuani,
'ixaheritsixi wakwie mayanikɨ yuheyemekɨ.
13 Yawé, 'ekɨ yuheyemekɨ 'apekaniuyeikani,
'aheyemekɨ 'aheyemekɨ 'apepuweni.
14 Yurikɨ Yawé yuteɨterima wahetsie kanitanuamɨkɨ,
meta te'i'uximayatsiriwamete kaniwatinenimayatamɨkɨ.
15 Nuiwarite wakakaɨyarixima huru pɨrata mekanihɨkɨtɨni,
tewi wewiyaya mepɨhɨkɨ.
16 Meputeni, peru mepɨkaniuwawe,
mepɨhɨxi, peru mepɨkaheuneniere,
17 mepunaka, peru mepɨkaheu'enana,
nitɨma 'eka mepɨkahexeiya yuteta.
18 Kemɨ'ane memɨwatiwewiwa, mɨkɨ wahepaɨ mepɨ'anene,
meta yunaitɨ kemɨ'ane wahetsie yuri memɨte'erie.
19 'Ixaheritsixi, Yawé hetsie 'aixɨa xekenaitɨkani,
'Aruni xiɨyarimama, Yawé hetsie 'aixɨa xekenaitɨkani,
20 Rewi nuiwarimama, Yawé hetsie 'aixɨa xekenaitɨkani,
kemɨ'ane xemeyemakaxe, Yawé hetsie 'aixɨa xekenaitɨkani.
21 Tsiyuni paitɨ Yawé 'aixɨa xeketenahɨaweni,
Kerutsaremetsie mɨkie.
Yawé kenɨawarieka.