139
Teyuitɨwamete wa'ukiyari. Rawiri nɨawarieya.
1 Yawé, 'ekɨ pepɨnetsixeiya,
'ekɨ pepɨnetsimate.
2 Pepɨtimate kepauka 'anemayeixa meta kepauka nemanukukeka,
Tsepa kemeteewa kenemɨtiyɨkɨhɨawe pepɨtimate.
3 Pepɨtimate kepauka nemukuyeika meta kepauka nemu'uxipie,
naime pepɨtimate nitixaɨtɨ pepɨkatitɨmaiya.
4 Neniuki 'akuxi neteta kawayenewekaku
'ekɨ Yawé matsi, pekatinimaikari naime kenemɨtayɨni.
5 'Ekɨ naitsarie pepɨnetsi'ɨwiya,
'amamakɨ pepɨnetsi'anukanama.
6 Kepemɨtimaiwe pɨmariwe yemekɨ,
ne nepɨkayɨwe nemeitimaitɨyani.
7 'A'iyari hɨxie nemuyuti'awieta xaɨtsie nepɨkayɨwe.
Nemuyuta'una xaɨtsie 'ahɨxie nemɨka'uyeikanikɨ nepɨkayɨwe.
8 Muyuawitsie xɨka ne'anutiyanike,
mana pepeyeika 'ekɨ,
xɨka meukatewatsie neheukamieni,
muwatatsiere pepeyeika.
9 Xɨka neheyani tau manatineikatsie,
yatɨni haramara manu'axetsie,
10 muwapaitɨta 'atɨrɨkariya pɨnetsihekuwitɨneni,
meta nepayeniereni 'atɨrɨkariyakɨ.
11 Xɨka mɨpaɨ ne'utayɨni: «Yɨriya kenetsi'anukanani,
hekɨariya nehetsiemieme yɨriya xeikɨa kehayani»,
12 'ahetsiemieme yɨriya pɨkayɨriya,
tɨkarikɨ 'ahetsiemieme tukarikɨ hepaɨ pɨ'ane.
'Ahetsiemieme yɨriya meta hekɨariya yaxeikɨa pɨ'anene.
13 'Ekɨ pepɨtiutawewi naime netaɨta timieme,
nemaama hetsie pepɨnetsi'ayenuiwitɨa.
14 Kepemɨnetiutawewi mariwemekɨ pɨti'ane 'ayumieme nepɨmetsinɨawa.
'A'uximayatsika pɨnetsihɨxiyatsitɨa,
'ikɨ naime hepaɨtsita mɨpaɨ nepɨtimate.
15 Ne'umete pɨwawerekai 'ekɨ pe'ixeiyakaku
kepauka 'awie nemɨwewiyakaitsie
kwieta meukatewatsie,
nemuwipariekaitsie.
16 Pepɨnetsixeiyakai kepauka tewi hepaɨ nemɨyɨximekai:
'ana naitɨri 'axapatsie pɨraka'ukai nehetsie timieme,
netukari kemɨreuterekekai paka'ukairi,
'akuxi xeitukari tɨma neka'uyeikakaku.
17 Kakaɨyari, kepemɨtiku'eriwa nehetsiemieme witsipɨ'anene.
Naitɨ mɨkɨ yɨnɨtɨ yemekɨ pɨwaɨkawa.
18 Xɨka ne'iti'inɨatake,
xiekari kemɨpaɨme matsi mɨkɨ pɨwaɨkawa.
Xɨka ne'iti'inɨata ne'i'inɨatatɨ nepeukuwe,
kepauka nemayɨhɨtɨani ne'aurie 'akuxi 'ekɨ pepukani.
19 Kakaɨyari, xɨka 'axateyuruwamete pewarukwinike 'aixɨa pɨ'anenikeyu.
Teɨteri memɨteyumemiwa nehamatɨa memɨka'u'uwanikɨ yapetiuyurienike,
20 mɨkɨ 'ahetsiemieme 'axamemutiyuane
'itarikakɨ 'ahetsie memɨtehahɨpa.
21 Yawé, ne nepɨwaxani'erie kemɨ'ane memɨmetsixani'erie,
meta nepɨkawareuxeiyamɨkɨ kemɨ'ane memɨkametsinaki'erie.
22 Ne yuheyemekɨ nepɨwareuheka,
memɨmetsi'aye'unie neta nepɨwaraye'unie.
23 Kakaɨyari, ne'iyari keneuxeiya,
keneneuta'inɨata kenemɨtiyɨkɨhɨawe.
24 Keneneuxeiya xɨka huye 'axamɨ'ane 'utɨma ne'umieni,
matsi pɨta keneneuwitɨximeni tukari mɨkaxɨwe huyeyari 'utɨma.