7
Keyupaɨmetɨ memutseyumarie
1 Merikɨtsɨ 'ana niuki tuayamete yunaukame nekaniwaruxeiya, tatserieta, ta'utata, tahixɨapa, tatsutɨa naitsata 'etsikinatsie meti'utɨ 'eka mepɨkapitɨakai, naitsarie mɨka'uyeikanikɨ kwiepa, haramaratsie meta naime kɨyexitetsie. 2 Hikɨ xeime nekaniuxeiya niuki tuayame tau manatineika 'utimiekame, Kakaɨyari mayeniere tseyuya 'akwetɨ. Hikɨ karima kaniwarutahiwieni niuki tuayamete yunaukame, mɨkɨ mɨpaɨ memɨtepitɨariekai 'axamemiyurienikɨ kwiepa meta haramara: 3 «'Akuxi 'axaxepɨka'iyurieka kwie, haramara meta naime kɨyexite, tekawatitseyumawekaku takakaɨyari te'uximayatametemama wakanata». 4 Hikɨ 'inɨarite nekaniu'enieni, kememɨyupaɨmekai memutseyumarie: Xeitsienituyari heimana huta tewiyari heimana nauka miriyari (144.000) meyupaɨmetɨ mekaniutseyumarieni 'Ixaheri nuiwarimama. Xexuitɨ nuiwarite mepuxuawekai.
5 Kura nuiwarieyatsie miemete tamamata heimana huta miriyari mekaniutseyumarieni,
Xuweni nuiwarieyatsie miemete tamamata heimana huta miriyari,
Kari nuiwarieyatsie miemete tamamata heimana huta miriyari,
6 'Atseri nuiwarieyatsie miemete tamamata heimana huta miriyari,
Nepɨtahari nuiwarieyatsie miemete tamamata heimana huta miriyari,
Manatsexi nuiwarieyatsie miemete tamamata heimana huta miriyari,
7 Tsimiyuni nuiwarieyatsie miemete tamamata heimana huta miriyari,
Rewi nuiwarieyatsie miemete tamamata heimana huta miriyari,
'Itsakaxi nuiwarieyatsie miemete tamamata heimana huta miriyari,
8 Tsawuruni nuiwarieyatsie miemete tamamata heimana huta miriyari,
Kutse nuiwarieyatsie miemete tamamata heimana huta miriyari,
Wenikamini nuiwarieyatsie miemete tamamata heimana huta miriyari mekaniutseyumarieni.
Meyumɨiretɨ memanakatuxakai
9 Merikɨtsɨ 'ana nekaneutaniere, teɨteri yumɨireme nekaniwaruxeiya naitsarie kiekatari, nuiwarite, kiekari mukumanetsie meta kememɨte'uniukakai, tewi pɨkayɨwekai mɨwaruti'inɨatakɨ. Mana 'uweni hɨxie meta Muxa hɨxie mekaniti'ukaitɨni me'anakatuxatɨ, takɨ me'upitɨ. 10 Karima mɨpaɨ mekateniuhiwakaitɨni:
«Wikweitsitɨarika takakaɨyari hetsɨa kanayeneikani,
'uwenitsie maka,
meta Muxa».
11 Yunaitɨ niuki tuayamete mana mekaniti'ukaitɨni 'uweni 'aurie, 'ukirawetsixi wa'aurie, meta yunaukatɨ memayeneniere wa'aurie. Hikɨ mekaniutihɨxima'uni 'uweni hɨxie, Kakaɨyari nenewieri mekaniupitɨani 12 mɨpaɨ me'utiyuatɨ:
«Mɨpaɨ ketiuyɨni.
Witsiketikɨhɨawarɨwani, 'aixɨa ketikuxaxatsiwani,
timaiwetɨ kemariwani, pamɨpariyutsi kepitɨarieka,
mariwetɨ kexatsiwani, tɨrɨkaɨyetɨ yɨwetɨ kexatsiwani,
takakaɨyari tsepanetɨ xeitsienituyari wiyari manuyekɨka.
Mɨpaɨ ketiuyɨni».
13 Merikɨtsɨ xewitɨ 'ukiratsi mɨpaɨ kanetiniuta'iwawiya:
—Mɨkɨ memanakatuxa, ¿kehate mepɨyɨa, hakewa mepeyekɨ?
14 Ne mɨpaɨ nekatinita'eiya:
—Neuxei, matsi 'ekɨ yapepɨtimate.
Mɨkɨ mɨpaɨ kanetiniutahɨawe:
—Mɨkɨ mekanihɨkɨtɨni memu'axɨa waɨkawa metehekwineka.
Yu'ixuriki mekaniuti'ekwa, meta mekanitituriya Muxa Nunutsi mumierie xuriyayakɨ.
15 'Ayumieme Kakaɨyari 'uwenieya hɨxie mekaniti'uka,
tukarikɨ meta tɨkarikɨ hetsiena mieme tukitana mekateni'uximayaka,
meta kemɨ'ane 'uwenitsie maka,
pɨwateɨtani wa'ɨwiyatɨ yutukita.
16 Hatsuakuri mepɨkaheuhakakwikuni, mepɨkaheuharikuni.
Tau pɨkawaxɨrimɨtɨaka, xɨri pɨkawa'uximatɨaka.
17 Karikɨ Muxa yu'uwenitsie 'akaitɨ mɨkɨ pɨwa'ɨwiyani muxatsi wahɨweme hepaɨ yɨanetɨ,
pɨwarewitɨkɨni naitsarie haixa mukunenieretsie mana meharetɨ memayenenierenikɨ,
meta Kakaɨyari naime wa'ukai kana'itiexɨamɨkɨ wahɨxita.