18
Wawiruniya kemɨtiuka'unarie
1 Merikɨtsɨ xeimeta niuki tuayame nekaniuxeiya muyuawitsie 'akamieme. Waɨkawa tɨrɨkariya hexeiyatɨ, meta kwiepa yuhekɨariyakɨ kaniuhekɨariwieni. 2 Hikɨ karima kaniutahiwa mɨpaɨ 'utaitɨ:
«Kaniuka'une. Kaniuka'une Wawiruniya mɨmariwe.
Kakaɨyarixi 'axamemɨ'anene wakie kanayani,
meta yunaitɨ 'iyarite 'axamɨ'anene waterɨta kanayani,
yunaitɨ wikixi memɨka'itiyatɨka wa'itua kanayani, meta 'aixɨa mɨkatixeiyarie.
3 Yunaitɨ nuiwarite memuti'ikɨ memikumaɨwanikɨ kawa'ɨyatɨkaku,
mana kiekatari te'aitamete yunaitɨ mɨkɨ mekanikumaɨwakaitɨni,
meta tetuayamete mana kiekatari,
xikutsixi mekanakɨne
witsi'aneme muyupitɨakaikɨ 'anayuhayewamekɨ».
4 Hikɨ xeimeta nekaniu'enieni muyuawitsie mɨpaɨ hetaineme:
«Kiekaritsie xekenewayekɨni neteɨterima,
wahepaɨ xemɨkayɨakakɨ mɨkɨ 'axakememɨteyurie,
'uximatɨarika xehetsie mɨkatinakenikɨ,
5 tita 'axamemɨte'uyuri kaniukuxeɨriyani muyuawitsie paitɨ,
meta Kakaɨyari pɨkahetɨmai heitseriemekɨ kememɨkate'uyuri.
6 Tuminieyakɨ xeketenakapitɨa,
tawarita matsi hepaɨna paɨmemekɨ ke'axamɨtiuyurikɨ,
meta tekɨxita yuwinu hakewa meikatu'akai
tawarita hepaɨna paɨmeme xekeneukawewiri.
7 Mariwetɨ kemɨrayuyeitɨakai meta witsimɨtikuhɨawarɨwanikɨ,
yaxeikɨata 'uximatɨarika heiwerika xekenepitɨaka.
Yu'iyaritsie mɨpaɨ paine:
“'Ena nepaka neti'aitatɨ,
wiura nepɨkahɨkɨ, hatsuaku nepɨkatikwine”.
8 'Ayumieme kwiniya xeitukaritsie hetsiena kaninuamɨkɨ:
mɨyakɨ, kwiniyakɨ meta hakakɨ pɨpitɨarieni.
Taikɨ kanitataiyariemɨkɨ,
kanitɨrɨkaɨyeni kemɨ'ane mitamari'itɨani Ti'aitame Kakaɨyaritɨtɨ».
9 Kepauka kwiepa te'aitamete memikumaɨwakai kawa'ɨyatɨkaku meta witsiti'aneme memɨte'iyetuiriwakai, mɨkɨ mekaniutitsuanakuni me'ixeiyatɨ kwauni 'atineikame tai 'itaxɨtsitɨaximekaku. 10 Waɨkawa memamatɨ kemɨtikwinitɨariekai, 'ateewa paitɨ mekaniti'uikuni meta mɨpaɨ mekatenihiwakuni:
«Xɨa'ui, xɨa'ui, kiekari mɨmariwe,
Wawiruniya, kiekari mɨtɨrɨkaɨye,
xeihurayaritsie 'a'uximatɨarika munuakɨ».
11 Tetuayamete kwiepa memɨtama mekaniutitsuanakuni meta mehe'eriwatɨ mepuyuhiwerieka, mɨpaɨ metemaitɨ, xewitɨ tawariri mɨkatiwananairienikekaikɨ: 12 huru, pɨrata, tete witsimɨ'anene, meta perɨra, rinu 'ixurikiyari, 'ixuriki mɨyɨtsikimaɨye, tsera 'ixurikiyari, meta 'ixuriki mɨxeta, naime kɨye witsimu'ɨa, naitɨ mutiwewiya herepanite tameyarikɨ, naitɨ mutiwewiya kɨye witsimɨ'anene, wurunitse tepɨayari, tepɨa mɨmerɨkawi, meta marɨmuri teteyari, 13 kanera witsimu'ɨatɨka, witsimɨtiu'ɨatɨka, 'ɨkwa witsimu'ɨa, mixaxi, meta witsimu'ɨa, winu meta hatseiti, harina 'aixɨa mɨ'ane meta tɨriku, wakaitsixi meta muxatsi, kawayutsixi meta kaxetate metatsiere teɨteri, waɨriyarika te'uximayatamete.
14 Meta mɨpaɨ mepɨte'ikuhɨaweni: «Tita pemɨtiheiwe'eriekai naimekɨ 'a'iyaritsie, 'ahetsɨa kaniumaweniri. Naimeri pekatineuyehɨani 'apiinite mɨraye'atɨka meta witsimɨti'anene, meta hatsuakuri pepɨkatikaxeiya».
15 Tetuayamete mɨyati'aneneme memɨtetuakai, mɨkɨ xikutsixi memayuyeitɨakai kɨmana, yunaitɨ 'ateewa paitɨ mekaniti'uikuni, waɨkawa memamatɨ kemɨtikwinitɨarieka. Mekaniutitsuanakuni meta meyuheiwerietɨ 16 mɨpaɨ me'utiyuatɨ:
«Xɨa'ui, xɨa'ui, pumaweri kiekari mɨmariwe.
Rinu 'ixurikiyari witsimɨ'anene, mɨyɨtsikimaɨye meta mɨxeta manakatɨkɨkai,
meta hurukɨ, tetexi witsimɨ'anene meta perɨra kaneukayatsakaitɨni.
17 Xeihurayaritsie katiniukumawere naitɨ 'apiinite mɨraye'atɨka».
Yunaitɨ kanuwa 'amɨpa nɨ'awamete, 'ateewa kɨkamete, kanuwa wekemete, keyupaɨmetɨ haramaratsie memɨte'iwakai, mɨkɨ meta 'ateewa paitɨ mekaniyuhayewakuni. 18 Tai kɨtsiyari mexeiyatɨ taiyariekaku, mɨpaɨ mekateniuhiwakaitɨni: «¿Pumawekai kiekari hepaɨna 'anetɨ, 'ikɨ kiekari kemɨtimariwekai hepaɨ?» 19 Tumuanari yumu'utsie mekaneutiwiwiwakaitɨni me'utitsuatɨ meta meyuheiwerietɨ mekaniutihiwakuni:
«Xɨa'ui, xɨa'ui, kiekari mɨmariwekai.
Mana xikutsixi memayuyeitɨa
yunaitɨ kanuwa 'amɨpapa wakutsiyarima,
mɨkɨ xeihurayaritsie katiniukumaweriyarieni.
20 Kene'atemawieka muyuawi, mɨyamɨtiuyɨkɨ.
Xekeneyutemamawieka xemeta Kakaɨyari teɨterimama, nɨ'ariekate, Kakaɨyari niukametemama.
Kakaɨyari miyetuakɨ
xeme pɨta heitserie xemexeiyanikɨ».
21 Hikɨ niuki tuayame mɨtɨrɨkaɨye tete murinayari xikɨraɨyeme kananuku'ɨni, haramaratsie kaneikahɨani mɨpaɨ 'utaitɨ:
«Yaxeikɨata 'ekɨ, Wawiruniya, kiekari mɨmariwe,
pekatinikwinitɨariemɨkɨ,
meta mɨpaɨ pekatinakumaweriyariemɨkɨ 'ena kwiepa.
22 Hatsuakuri kanariwiwamete
haripakɨ, kɨrautakɨ meta kuxinetakɨ
mepɨka'enierieni 'ahetsie.
Hatsuakuri tewewiwamete 'ahetsɨa mepɨkaxuaweni.
Hatsuakuri tɨxɨme mɨxikɨraɨye pɨka'enierieni 'ahetsɨa.
23 Hatsuaku kɨxeme 'ahetsɨa pɨkahekɨariwieni.
Hatsuaku pɨka'enierieni neneɨkeme meta wikiwame
watemawierika 'ahetsie.
'Ahetsɨa kiekatari memɨtetuakai
kwiepa memɨtama wa'itsɨkate mekanihɨkɨtɨkaitɨni.
Pewakewaiyatɨ kepemɨtiwa'itaiyakai
yunaime nuiwarite.
24 'Ahetsie Kakaɨyari niukametemama meta Kakaɨyari teɨterimama waxuriya pemutayeurikɨ,
meta yunaitɨ kwiepa memukwi'iwaxɨ».