4
Xuti meta Wuhutsi kememɨteyutiwitɨ
1 Hikɨ Wuhutsi heyaka, kiekari kitenie kanayerɨni. Mana puyetɨa 'iwaya mɨhɨritɨariekai hetsiena mieme mɨraxaxatakai.
Wuhutsi mɨpaɨ katinitahɨawe:
―Kenaye'a ne'iwa, 'ena kenayexi.
Mɨkɨ tewi mana 'uyaka mana kanayerɨni.
2 Hikɨ Wuhutsi 'ukirawetsixi tamamata kaniwaruta'inieni kiekaritsie, mɨpaɨta katiniwarutahɨawe:
―'Ena xekenayaxi.
Mɨkɨ mana mekanayaxe. 3 Wuhutsi yu'iwa mɨhɨritɨarie mɨpaɨ katinitahɨawe:
―Nuhemi, Muhawi kwieyaritsie heyeyaka, kwie ta'iwa miku'eiri 'Erimereki kanituamɨkɨni. 4 Mɨpaɨ netimaitɨ kename heuyewetse, nematitaxatɨanikɨ 'ikɨ hepaɨtsita, nemetsi'aitɨatɨ peminanenikɨ, 'ikɨ yunaime wahɨxie 'ukirawetsixi kiekatari, meta hipame wahɨxie. Xɨka 'ikɨ kwie penanaimɨkɨ, yaketineuyuri. Mexɨka 'ekɨ yapekatikayeimɨkɨ 'ikɨ kwie hepaɨtsita, yakeneutayɨki, mɨpaɨ ne nemɨtimaikakɨ. Xewitɨ tawariri pumawe heitserie mexeiya piinieya mayanikɨ, 'ekɨ xeikɨa. Neta 'a'utɨma heitserie nepexeiya.
Mɨkɨ kanita'eiya:
―Ne nepɨyɨaneni nemɨrayukatuani.
5 Matsi Wuhutsi naime katinitahekɨatɨani:
―Kepauka Nuhemi kwieya 'apiini pemayeitɨani, 'anata Xuti pepɨtanaki'erieni Muhawi tewiyari, wiura ta'iwa miku'eiri mɨkwieyatɨkai, para temɨkahetɨtɨmaiyanikɨ kename ta'iwa tipinieyatɨkai mɨkɨ kwie.
6 'Iwaya mɨpaɨ kaniutayɨni:
―Kamɨtsɨ nepɨkayɨwe mɨpaɨ nemɨtiyurienikɨ. Xɨka mɨpaɨ netiuyurieni, nepiinite naime nepɨreuyehɨani tita nemɨrexeiya neniwema wahetsiemieme. 'Ekɨtsɨari katini'ahetsietɨni, ne mɨpaɨ nemɨtiuyurieni. Nepɨkayɨwe.
7 Hikɨ 'ana tukaritsie 'ixaheritsixi mɨpaɨ mekateniuhukaitɨni, kepauka yupiini yukwie 'uku'eirieme tawarita minanenikɨ, yatɨni hekwamekɨ minanenikɨ, 'ana tinaweme yukakai xeitapamieme mepɨyukukweitɨwakai, mɨpaɨ mɨtimatsiɨkɨnikɨ kename 'ana 'inanai. 8 'Ayumieme 'iwaya mɨhɨritɨariekai kwie hepaɨtsita mɨpaɨ yu'iwa Wuhutsi katiniutahɨawe:
―'Ekɨ keneunanai.
Yukakai panuyehɨnaxɨ.
9 Hikɨ Wuhutsi mɨpaɨ kaniutayɨni 'ukirawetsixi yunaime kiekatari wahɨxie, mɨpaɨ 'utaitɨ:
―'Ikɨ tukaritsie xeme xepɨhɨkɨ xemunenierixɨ, kename Nuhemi netiunanairi naime 'Erimereki tita mɨtipinieyatɨkai, Kirihuni meta Makiruni, 10 hikɨri mɨpaɨ xepɨtemaika kename ne'itiwitɨ Xuti Muhawi tewiyari Makiruni mɨ'ɨyayatɨkai, mɨkaheuyewautsenikɨ Makiruni ta'iwa kemɨtihɨkɨtɨkai, yaxeikɨata piiniteya, xemɨkahetɨtɨmaiyanikɨ yunaitɨ 'iwamama, yaxeikɨata kiekaritsie mɨkaheuyewautsenikɨ kemɨtitewakai. Xemeri hikɨ xemunenierixɨ xepɨhɨkɨ.
11 'Ukirawetsixi meta yunaitɨ mana kiekari kitenie memukutekai, mɨpaɨ mekaniutiyuani:
―Tame temunenierixɨ tepɨhɨkɨ.
»Yawé yaxeikɨa yaketiuyurieni mɨkɨ 'ukaratsi pemɨtiwitɨni hetsiemieme, kemɨtiwaruparewi Xakeri meta Reya nuiwari memukama wahepaɨ, 'ixaheritsixi teɨteriyari kememɨte'akɨ.
»'Ekɨta pematsiɨkɨtɨ peke'ayani 'Epɨrata mɨtiyetewatsie, meta waɨkawa pemariwatɨ peke'ayani Wereni kiekariyaritsie.
12 »Yawé 'ikɨ 'uka hetsie kematsiyetuirieni 'anuiwarima Paretsi nuiwarimama hepaɨ me'anekame, Tamaxi nu'aya Kura hetsiemieme meyexei».
Rawiri nuiwarimama
(Xut 4:18-22 – 1Kem 2:5-15, Mat 1:3-6, Ruk 3:31-33)
13 Hikɨ Wuhutsi Xuti kaniutiwitɨni. Kepauka memuyutiwitɨ, Yawé pɨwarupitɨa nunutsi memayexeiyakɨ, hikɨ 'utihukataka 'ukitɨme kaniutiniweni. 14 'Ukarawetsixi Nuhemi mɨpaɨ mekatenikɨhɨawekaitɨni: «Yawé 'aixɨa ketikuxaxatsiwani, 'axaɨtame mɨkamatsi'uku'eirikɨ, xeime matsiparewiwame pemexeiyakɨ. Xeime mayexeiyakɨ 'Ixaheri manukuhanakɨ. 15 'Ikɨ nunutsikɨ 'aixɨa pepɨ'itɨarieka waɨkawa, hetsiena petiwiyatɨ, 'amu'e mutiniwexɨkɨ. 'Amu'e waɨkawa mɨmatsinaki'erie, matsi ke'aniwema me'atahutatɨ».
16 Nuhemi nunutsi kananutuni, kaneikukweni, kaniyɨhɨritɨani mitaweriyakɨ. 17 'Ahurawatari mɨpaɨ mekaniutiyuanekaitɨni: «Nuhemi nunutsi kanexeiyani». 'Uweri mekateniterɨwa. 'Ikɨ 'Itsahi paapaya kanayani, Rawiri paapaya.
18 'Ikɨ Paretsi pɨnuiwarieya:
Paretsi, Ketsiruni pɨpaapayatɨkai.
19 Ketsiruni, Xamɨ pɨpaapayatɨkai.
Xamɨ, 'Aminarawi pɨpaapayatɨkai.
20 'Aminarawi, Nahatsuni pɨpaapayatɨkai.
Nahatsuni, Tsarimuni pɨpaapayatɨkai.
21 Tsarimuni, Wuhutsi pɨpaapayatɨkai.
Wuhutsi, 'Uweri pɨpaapayatɨkai.
22 'Uweri, 'Itsahi pɨpaapayatɨkai.
'Itsahi, Rawiri pɨpaapayatɨkai.