8
1 Xɨka ne'iwa pehɨkɨtɨnike,
nemaama tsitsieyatsie pemutawerixɨ.
Kepauka nemɨmatsi'anukunake kiekaritsie nepɨmatsiku'itsewenikeyu,
xewitɨ pɨkayɨwenikeyu kename 'axaneyɨane mɨnerahɨaweni.
2 'Amamatsie nekawietɨ,
nemaamakie nepɨmatsi'atɨanikeyu,
pemɨnetita'ɨkitɨanikɨ naki'eriya hepaɨtsita.
Winu nepɨmatsi'anu'itɨanikeyu naitɨ tinɨkame,
meta 'ikwaxi neharaweritamieme hayari.
3 Mɨtiniyɨweniketɨ nemu'u
'utatana nemɨniuka'uxipitɨani.
Mɨtiniyɨweniketɨ yutseriekɨ mɨneniuwiya.
'Uki mɨnaki'eriwa
4 Ne nepɨxewawirie, 'ukarawetsixi Kerutsareme kiekatari,
xepɨka'ihɨtɨaka meta xepɨka'i'uximatɨaka 'uka neminaki'erie,
mɨkɨ yɨkɨmana kepaukake manutaniere.
'Ataxewiriekamieme Kwikari
Yunaitɨ kwikarɨwame
5 ¿Kemɨ'ane pɨyɨane makumawetsie matimie
'uki minaki'erie hetsie rawiyatɨ?
'Uki mɨnaki'eriwa
Xikɨti hetɨa nepɨmatsi'anutahɨtɨa,
mana 'amaamatsie pepɨkaya,
meta manatsiere pɨmatsi'utiniwexɨ.
'Uka mɨnaki'eriwa
6 Kenena'utɨaka 'a'iyaritsie tseyu hepaɨ,
tepɨa hepaɨ 'amamatsie kenena'utɨaka.
Waɨkawa pɨtɨrɨkaɨye naki'eriya, mɨki hepaɨ,
kaniyuritɨni naki'eriya, mɨki teukiya hepaɨ.
Naki'eriya taiyari
Kakaɨyari taiyaya hepaɨ kani'aneni.
7 Tsepa haa muwaɨkawa pɨkayɨwe mitɨnikɨ,
meta haa hatɨa mieme mikumaweriya tɨma pɨkayɨwe.
Xewitɨ xɨka tita naime mɨrexeiya
tipatamɨkɨni naki'eriyakɨ,
'axamɨtikɨhɨawarɨwanikɨ xeikɨa katinikaxeiyamɨkɨ.
Yunaitɨ kwikarɨwame
8 Kwinimieme yemekɨ 'etsipuyumate tataru 'uka
'akuxi tsitsiteya pɨkahanexɨawawe.
¿Keteteyurieni xɨka ta'iwa
'uta'iwaurieni?
9 Xɨka kiekari kuraruyaritɨnike,
heimana tepetayatsakeyu pɨrata.
Xɨkata 'itupari hɨkɨtɨnike,
heimana tepikamanikeyu kariuxa mexayari.
'Uka mɨnaki'eriwa
10 Ne kiekari kuraruyari nekanihɨkɨtɨni,
meta netsitsite huta tuxiyuyari pɨhɨkɨ.
'Ayumieme kepauka 'uki neminaki'erie mɨnetsikuxexeiyatsie
kayuwatɨ nemukaxeiya hepaɨ nekatiniyumaika.
11 Tsarumuni kaxie haraweriyari kanexeiyakaitɨni Wahari-Kamuni paitɨ,
hipame te'uximayatamete kaniwarehɨritɨani.
Mɨkɨ yuxexuitɨ mekaniyetuiriwakaitɨni 'ikwaxi mekaxuxuawerekai,
xeimiriyari pɨrata tuminiyari.
12 Tsarumuni xeimiriyari tumini kena'ɨtɨ,
xemeta te'uximayatamete huta tsienituyari,
peru nekaxie haraweriyari nexeikɨa pɨtinepiini.
'Uki mɨnaki'eriwa
13 'Ekɨ, tuturi muwa'etsietɨkatsie pemɨti'aita,
'aniuki xeikɨa mekanita'enieka tahamikuma,
kenetaniu kuta tepi'enieni.
'Uka mɨnaki'eriwa
14 Xeiya keneumietɨ, 'uki nemɨmatsinaki'erie.
Keneunautsarɨmetɨ maxa hepaɨ, maxa 'etsimupe hepaɨ,
hɨritetsie waritsamukɨ muwiriyarietɨkatsie.