1  הִנְנִי כֹתֵב אֲלֵיכֶם יְלָדִי כַּדְּבָרִים הָאֵלֶּה לְבִלְתִּי תֶחֱטָאוּ וְאִם־יֶחֱטָא אִישׁ יֵשׁ עָלָיו מַלְאָךְ מֵלִיץ לִפְנֵי אָבִינוּ הוּא יֵשׁוּעַ הַמָּשִׁיחַ הַצַּדִּיק׃ 2  וְהוּא כֹפֶר עַל־חַטֹּאתֵינוּ וְלֹא לְבַד עַל־חַטֹּאתֵינוּ כִּי אִם־גַּם עַל־כָּל־הָאָרֶץ׃ 3  וּבָזֹאת נַכִּיר כִּי יָדַעְנוּ אֹתוֹ אִם־נִשְׁמֹר אֶת־מִצְוֹתָיו׃ 4  הָאֹמֵר יָדַעְתִּי אֹתוֹ וְאֶת־מִצְוֹתָיו לֹא יִשְׁמֹר כֹּזֵב הוּא וְאֵין אֱמֶת בּוֹ׃ 5  אַךְ הַשֹּׁמֵר אֶת־דְּבָרוֹ אַהֲבַת אֱלֹהִים כְּלוּלָה בוֹ בֶּאֱמֶת וּבָזֹאת נַכִּיר כִּי־בוֹ נִתְלוֹנָן׃ 6  הָאֹמֵר כִּי הוּא מִתְלוֹנֵן בּוֹ יֶשׁ־לוֹ לָלֶכֶת גַּם־בְּעִקְּבוֹתָיו׃ 7  אַחַי לֹא מִצְוָה חֲדָשָׁה אֲנִי־כֹתֵב אֲלֵיכֶם מִצְוָה יְשָׁנָה הִיא אֲשֶׁר הָיְתָה לָכֶם מִקֶּדֶם וְהַמִּצְוָה הַיְשָׁנָה הִיא הַתּוֹרָה אֲשֶׁר שְׁמַעְתֶּם מִקֶּדֶם׃ 8  וְהִנְנִי מוֹסִיף וְכֹתֵב לָכֶם מִצְוָה חֲדָשָׁה וְנֶאֱמֶנֶת הִיא גַּם־בּוֹ גַּם־בָּכֶם כִּי הַחֹשֶׁךְ עָבַר וְאוֹר אֱמֶת זוֹרֵחַ׃ 9  הָאֹמֵר כִּי־בָאוֹר הִנֵּהוּ וְשׁנֵא אֶת־אָחִיו הוּא עוֹדֶנּוּ בַּחֲשֵׁכָה׃ 10  הָאֹהֵב אֶת־אָחִיו הוּא שֹׁכֵן בָּאוֹר וְאֵין לוֹ מִכְשׁוֹל׃ 11  וְהַשּׂנֵא הוּא ישֵׁב חשֶׁךְ וּבַחשֶׁךְ יֵלֵךְ וְלֹא־יֵדַע אָנָה הוּא הֹלֵךְ כִּי הַחשֶׁךְ עִוֵּר אֶת־עֵינָיו׃ 12  הִנְנִי כֹתֵב אֲלֵיכֶם יְלָדִים כִּי־נִסְלְחוּ לָכֶם חַטֹּאתֵיכֶם בַּעֲבוּר שְׁמוֹ׃ 13  כֹּתֵב אֲנִי אֲלֵיכֶם אָבוֹת כִּי־יְדַעְתֶּם אֹתוֹ אֲשֶׁר מוֹצָאֹתָיו מִקֶּדֶם כֹּתֵב אֲנִי אֲלֵיכֶם בַּחוּרִים כִּי־גְבַרְתֶּם עַל־הָרָע כָּתַבְתִי אֲלֵיכֶם יְלָדִים כִּי יְדַעְתֶּם אֶת־הָאָב׃ 14  כָּתַבְתִּי אֲלֵיכֶם אָבוֹת כִּי־יְדַעְתֶּם אֹתוֹ אֲשֶׁר מוֹצָאֹתָיו מִקֶּדֶם כָּתַבְתִּי אֲלֵיכֶם בַּחוּרִים כִּי־בְנֵי חַיִל אַתֶּם וּדְבַר אֱלֹהִים שֹׁכֵן בְּקִרְבְּכֶם וּגְבַרְתֶּם עַל־הָרָע׃ 15  לֹא תֶאֱהָבוּן אֶת־הָעוֹלָם וְלֹא אֶת־אֲשֶׁר לָעוֹלָם אִישׁ כִּי־יֶאֱהַב אֶת־הָעוֹלָם אֵין בְּקִרְבּוֹ אַהֲבַת הָאָב׃ 16  כִּי כָל־אֲשֶׁר בָּעוֹלָם חֶמְדַּת הַבָּשָׂר תַּאֲוַת הָעֵינַיִם וּגְאוֹן שָׁוְא אֲשֶׁר בְּחַיֵּי אָדָם אֵינָם מִן־הָאָב כִּי אִם־מִן־הָעוֹלָם׃ 17  וְהָעוֹלָם הַזֶּה כָּלִיל יַחֲלֹף עִם־תַּאֲוָתוֹ וְהָעֹשֶׂה רְצוֹן הָאֱלֹהִים יִשְׁכֹּן לָנֶצַח׃ 18  יְלָדַי הִנֵּה עֵת הַקֵּץ בָּאָה וְאַתֶּם שְׁמַעְתֶּם כִּי יָבֹא שׂוֹטֵן הַמָּשִׁיחַ וְאַחֲרֵי אֲשֶׁר רַבִּים עַתָּה שׁטְנֵי הַמָּשִׁיחַ נֵדַע בָּזֹאת כִּי עֵת הַקֵּץ הִיא׃ 19  וְהֵם יָצְאוּ מֵאִתָּנוּ אֶפֶס לֹא־מִשֶּׁלָּנוּ הָיוּ כִּי לוּ הָיוּ מִשֶּׁלָּנוּ אָז נִשְׁאֲרוּ עִמָּנוּ אַךְ יָצְאוּ לְבַעֲבוּר יִוָּדַע כִּי לֹא כֻלָּם מִשֶּׁלָּנוּ הֵם׃ 20  אֲבָל אַתֶּם שֶׁמֶן מִשְׁחַת הַקֹּדֶשׁ עֲלֵיכֶם וְאֶת־כֹּל יְדַעְתֶּם׃ 21  לֹא כָתַבְתִּי אֲלֵיכֶם עַל כִּי לֹא־יְדַעְתֶּם אֶת־הָאֱמֶת כִּי יְדַעְתֶּם אֹתָהּ וְכִי כָל־שֶׁקֶר אֵינֶנּוּ יְלִיד הָאֱמֶת׃ 22  מִי הוּא הַכֹּזֵב בִּלְתִּי הַמְכַחֵשׁ בְּיֵשׁוּעַ לֵאמֹר כִּי לֹא הַמָּשִׁיחַ הוּא זֶה הוּא שׂוֹטֵן הַמָּשִׁיחַ הַמְכַחֵשׁ בָּאָב וּבַבֵּן׃ 23  כָּל־הַמְכַחֵשׁ בַּבֵּן גַּם־הָאָב אֵין־לוֹ וְהַנֹּתֵן תּוֹדָה לַבֵּן לוֹ גַּם־הָאָב׃ 24  וְאַתֶּם שִׁמְרוּ בִלְבַבְכֶם אֶת־הַדָּבָר אֲשֶׁר שְׁמַעְתֶּם מֵרֹאשׁ כִּי אִם־תִּשְׁמְרוּ אֶת־הַדָּבָר אֲשֶׁר שְׁמַעְתֶּם מֵרֹאשׁ תִּתְלוֹנְנוּ גַּם־בַּבֵּן גַּם־בָּאָב׃ 25  וְאֵת אֲשֶׁר דִּבֶּר לָתֶת־לָּנוּ הוּא חַיֵּי עוֹלָם׃ 26  כָּזֹאת כָּתַבְתִּי אֲלֵיכֶם מִפְּנֵי הַחֲפֵצִים לְהַתְעוֹת אֶתְכֶם׃ 27  וְהִנֵּה הַמִּשְׁחָה אֲשֶׁר נִמְשַׁחְתֶּם מִיָּדוֹ נִשְׁאֶרֶת עֲלֵיכֶם וְאֵין מַחְסוֹר לָכֶם לְאַחַד הָאֲנָשִׁים לְלַמְּדְכֶם דָּבָר כִּי הַמִּשְׁחָה הַהִיא תּוֹרֶה אֶתְכֶם כָּל־דְּבַר אֱמֶת וּבָהּ אֵין שֶׁקֶר וְכַאֲשֶׁר תּוֹרֶה אֶתְכֶם כֵּן בּוֹ תִּתְלוֹנָנוּ׃ 28  וְעַתָּה יְלָדַי הִתְלוֹנְנוּ בְצִלּוֹ לְמַעַן נָגִילָה בְהִגָּלוֹתוֹ וְלֹא־נֵבוֹשׁ מִלְּפָנָיו בְּיוֹם בֹּאוֹ׃ 29  אִם־יְדַעְתֶּם כִּי־צַדִּיק הוּא הֲלֹא תֵדְעוּן כִּי גַם כָּל־פֹּעֵל צֶדֶק נוֹלָד מִמֶּנּוּ׃