1  הֵן דְּבַר אֱמֶת הוּא אִישׁ כִּי־יְבַקֵּשׁ מִשְׁמֶרֶת רֹאשׁ הָעֵדָה מְבַקֵּשׁ טוֹב׃ 2  אַךְ רֹאשׁ הָעֵדָה תָּמִים יִהְיֶה בְּלֹא שֶׁמֶץ דָּבָר בַּעַל־אִשָּׁה אַחַת שָׂם דֶּרֶךְ נְבוֹן דָּבָר וְרָצוּי לִבְנֵי אָדָם דְּלָתָיו לְאֹרֵחַ יִפְתַּח וְאִישׁ מַשְׂכִּיל לְלַמֵּד׃ 3  לֹא שֹׁתֶה שִׁכּוֹר וְלֹא בַעַל מַהֲלֻמּוֹת כִּי אִם־עֹשֶׂה רְצוֹן זוּלָתוֹ רֹדֵף שָׁלוֹם וּמֹאֵס בְּבֶצַע כָּסֶף׃ 4  וְגַם הוּא שׁרֵר בְּבֵיתוֹ וּבָנָיו נִכְנָעִים לְפָנָיו וּמוֹרָאוֹ עֲלֵיהֶם׃ 5  כִּי אִם־לֹא יֵדַע אִישׁ לִהְיוֹת שׁרֵר בְּבֵיתוֹ אֵיכָה יְכַלְכֵּל אֶת־עֲדַת אֱלֹהִים׃ 6  אַף לֹא תַלִמִיד חָדָשׁ פֶּן־יָרוּם לְבָבוֹ וְהַמַּשְׂטִין יַרְשִׁיעֶנּוּ בַּדִּין׃ 7  וְגַם־שֵׁם טוֹב נָחוּץ לוֹ מִפִּי הָעֹמְדִים מִחוּץ לְבִלְתִּי יְהִי לָבוּז וּלְבִלְתִּי יִפֹּל בְּפַח הַמַּשְׂטִין׃ 8  וְכֵן הַמְשָׁרְתִים מְכֻבָּדִים יִהְיוּ לֹא דֹבְרִים בְּלֵב וָלֵב לֹא סֹבְאֵי יַיִן וְלֹא נֹטִים אַחֲרֵי הַבָּצַע׃ 9  נֹצְרִים סוֹד הָאֱמוּנָה בְּלֵב טָהוֹר׃ 10  וְגַם־הֵם יִבָּחֲנוּ בָרִאשֹׁנָה וְאִם שֶׁמֶץ דָּבָר לֹא נִמְצָא בָם יִקְרְבוּ לְשָׁרֵת׃ 11  וּכְמוֹ כֵן גַּם־הַנָּשִׁים כְּבוּדוֹת תִּהְיֶינָה צוֹפִיּוֹת הֲלִיכוֹתֵיהֶן וְנֶאֱמָנוֹת בַּכֹּל וְלֹא שׁטְנוֹת בִּלְשׁוֹנָן׃ 12  וְהַמְשָׁרְתִים בַּעֲלֵי אִשָּׁה אַחַת יִהְיוּ הַמְכַלְכְּלִים בְּנֵיהֶם וּבָתֵּיהֶם כַּמִּשְׁפָּט׃ 13  כִּי אֵלֶּה אֲשֶׁר יְשָׁרְתוּן כַּמִּשְׁפָּט יִקְנוּ לָהֶם מַעֲלָה רָמָה וְיֶתֶר־עָז בֶּאֱמוּנָה בְּיֵשׁוּעַ הַמָּשִׁיחַ׃ 14  כָּזֹאת כָּתַבְתִּי לְךָ בְּתוֹחַלְתִּי כִּי אָחִישׁ לָבוֹא אֵלֶיךָ׃ 15  וְאִם־אֵחַר מִבּוֹא תֵּדַע בָּזֹאת אֵיךְ לְהִתְהַלֵּךְ בְּבֵית אֱלֹהִים הֲלֹא הִיא עֲדַת אֵל חַי עַמּוּד הָאֱמֶת וִיסוֹדָהּ׃ 16  אָמְנָם גָּדוֹל סוֹד הַחֲסִידוּת אֱלֹהִים נִגְלָה בַבָּשָׂר וְצִדְקָתוֹ נִגְלְתָה בָרוּחַ מַלְאָכִים רָאוּ פָנָיו וְגוֹיִם הִתְבַּשְּׂרוּ יְשׁוּעָתוֹ אֱמוּנָתוֹ מָלְאָה תֵבֵל וַיַּעַל לַמָּרוֹם בְּכָבוֹד׃