Yuhanis surat tilu la
1
Yuhanis sai un surat ta
1 Kaka Gayus man auk in namnau baktetebes. Boa-blingin deng au, Yuhanis, man daid tulu in kil grija.✡Dehet deng Aan in Nutus sas 19:29; Roma 16:23; Korintus mesa la 1:14
2 Auk nodan le Ama Lamtua doh ku, le halin ku apam ma titu-tema, nol ku dalem ma banan. 3 Muik kaka-pali at ila lo maas dehet auk noan, ku muid Ama Lamtua Allah lalan in nuil toma ka tutungus. Ming ela kon, auk daleng ngi kolo isi. 4 Ta auk daleng kolo dudui ka, eta auk ming noan, auk anang ngas nuil muid lalan in toma ka.
Yuhanis naka Gayus, undeng Gayus lako-daek un osa la nol babanan
5 Kaka in namnau! Ku sium kaka-pail in laok papmes le bani-bating Kristus osa la ngas nol babanan son, molota ku taan oen lo bii. Tiata na tulu bel noan, ku lako-daek Ama Lamtua Allah osa la nol babanan son. 6 Atuil in pait maa son nas, nahdeh bel jemaat in se ia ngias noan, ku sium oen babanan nol namnau one. Auk nodan le halin ku daek napiut ela, ta na man tao Ama Lamtua Allah dalen kolo. 7 Atuil nas lakos papmes se ola-ola, le tui atuli li deng Yesus Kristus. Mo oen sium sa-saa in bele deng, atuil in parsai oen lo ngas lo. 8 Tiata, eta kit man musti hulung one lam, toma. Ta nini ela lam, kit lako-daek Ama Lamtua osa la leo-leo nol one.
Diotrefes nam, atuil in pangkos atuli
9 Hmunan nu, auk tunang surat bel jemaat in se ku mana lia ngas son, mo Diotrefes nikit apa ka el tuang nga. Nol un dai hii-ming auk lo. 10 Tiata eta auk tiang se la ngam, auk tek langa-langa deng asa man un in tao ngas. Ta un aa nole-lilung, le tao nahu kita. Dudui pait ta, un hutun soleng Ama Lamtua atulin in maa se la ngas. Hidim un kon hode-lokot kaak-pail in se la ngas, le halin oen sium atuil nas deken.
Demetrius lako-daek Ama Lamtua osa la nol babanan
11 Kaka in namnau! Ku musti not atuil in daek dais banan na. Mo boel not atuil in daek dais daat ta deken. Ta atuil in daek dais banan na, Ama Lamtua Allah atulin. Mo atuil in daek dais daat ta, taan Ama Lamtua Allah lo.
12 Tuladang el Demetrius. Totoang atuli li naka-naka una, undeng un muid Ama Lamtua Allah lalan in nuli, man in toma ka. Auk kon naka-naka una, nol ku tana noan auk niam aa kam nole lo.
Yuhanis hep un surat ta
13 Muik dasi mamo nabale, man auk le aa nol kus, mo auk kom in dulas se surat lo. 14 Ta auk in koma ka le nesang lo kam, kit tutnaal apa, le halin nam kit duat aa nol apa esan tuun.
15 Ela tuun tia. Kaka-pail in ne ia ngias tunang boa-blingin. Tulung tek kaak-pail in ne a ngas mesa-mesa noan, auk tunang boa-blingin.
Boa-blingin,
Yuhanis