Surat bel atuil
Ibrani las
man halas-sam nang oen upu kia-kaon nas agama la
le parsai se Yesus Kristus
1
Ama Lamtua Allah bel Un Ana ka maa son, man uhu dui deng Un mee-baah hmunan nuas
1 Hmunan nu, Ama Lamtua Allah nini Un mee-baha las, le aa nol kit upu kia-kaon atuil Ibrani las.* a: Ibrani la na mo ngaal didang taung bangsa Yahudi. Atuil Yahudi man in parsai se Yesus Kristus sas, atuli las noken noan “atuil Kristen Ibrani”, undeng oen kisa son deng oen pail-kakan Yahudi man in kil atorang agama Yahudi blaan na nabale ngas. Un nini lalan bili-ngala le aa nolas oe-oe.† b: Ama Lamtua Allah tek Un in hida ngas nini lalan bili-ngala. Tuladang el: Un tek Abraham nini in hida, bel Musa nini atorang agama, bel Daud nini dain in naka-nahalit, nol Yeremia nini kleta. 2 Mo halas ni, Un bel Un Ana ka maa, le aa esa nol kita.
Lolo hmunan hesa kua, Ama Lamtua Allah huil nal Un Ana ka son,
le prenta leo-leo nol Una.
Dedeng Un koet apan-dapa kua nol apan-kloma ki nol un isin nas totoang nga,
Un Ana ka kon koet leo-leo nol Una.
3 Ama Lamtua Ana ka tulu Un Ama ka in muun-tes sa,
banansila el lelo la kaloen na in tal pait deng hdidan na ka.
Ta Un nam hnika mes parsis el Un Ama ka.
Nol deng Un in Teka-teka man muik uhu isi ka,
Un lako-daek totoang in ne apan-dapa kua nol apan-kloma kia ngas.
Un kon sai lalan,
le kose soleng atuli in kula-sala ngas,
le halin oen daid niu.
Hidim Un pait lako sorga,
le daad se Ama Lamtua Allah halin kanan na,
se maan in todan-lahing dudui ka.
Ama Lamtua Allah Ana ka uhu dui, deng totoang ima-ii in ne sorga nguas
4 Ama Lamtua Allah ima-ii in ne sorga nguas meman uhu, mo Un Ana ka uhu dui hihidi deng oen totoang. Ama Lamtua Allah pangkat ta man lapa dui hihidi. Nol Un esa bel Un pangkat ta son bel Un Ana ka. Undeng na le, Un Ana ka uhu dui deng Un ima-ii in ne sorga nguas.
5 Ama Lamtua Allah tek net Un Ana ka noan,
“Leol neot ni, Auk nikit Ku le kil prenta.”✡Buk in Naka-nahalit 2:7
Ama Lamtua Allah kon tek noan,
“Auk niam, Un Ama.
Nol Un nia mo, Auk Anang.”✡Samuel dua la 7:14; Dehet deng Bangsa Israel nol Bangsa Yahuda lalis mesa la 17:13
Ama Lamtua Allah aa ela meman deng Un Ana ka, mo Un aa net ela lo nol Un ima-ii in ne sorga nguas.
6 Dedeng Ama Lamtua Allah bel Un Ana in uhu isi na maa ka, Un kon prenta Un ima-ii in se sorga nguas noan,
“Hoe! Ima-ii me!
Mi musti laok todan-lahing
Auk Anang nga!”✡Dehet Ulang deng Lalan in Nuli 32:43; Lukas 2:13-14
7 Ama Lamtua Allah kon aa deng Un ima-ii in ne sorga nguas noan,
“Auk tao Auk ima-ii in ne sorga nguas le dake lam hlapat,
banansila el angin na.
Auk tao Auk ata kas le daid muun,
banansila el ai ka.”✡Buk in Naka-nahalit 104:4
Ama Lamtua Allah aa ela, undeng oen nam mo, suma ima-ii in loka-loka tuun.
8 Mo Un aa didang pait deng Un Ana esa ka, noan,
“Ku niam, Ama Lamtua Allah.
Mam Ku daad se del in kil bandu ka didiin son na.
Mam Ku kil kuasa le prenta nol dael lolo.
9 Ku dalem kolo in ngat atuil man nuil nol lolo ngas.
Mo Ku dalem iil nol in ngat atuil man nuil nol tom lo ngas.
Tiata Auk daleng kolo,
le Auk doan mina se Ku bom ma,
halin nikit Ku daid Lahi, man uhu dui deng totoang lahi las.”✡Buk in Naka-nahalit 45:7-8
10 Ama Lamtua Allah kon aa nol Un Ana ka, noan,
“Auk anang nge!
Ku niam, Tuang man in prenta meman son, deng lolo hmunan nua.
Ku man prenta le apan-dapa ku dadi meman.
Ku kon man prenta le apan-kloma ki dadi meman.
11-12 Mam apan-dapa ku nol apan-kloma ki daat.
Hidim apan-dapa ku nol apan-kloma ki kon ilang.
Mo Ku sii man nuli napiut.
Mam Ku nikit soleng apan-dapa ku nol apan-kloma kia,
banansila el atuli in kat soleng kai-baut blaan na.
Mam Ku seda apan-dapa ku nol apan-kloma kia,
banansila el atuli in silu seda kai-baut balu ka.
Mo Ku sii man ela lo.
Undeng Ku nuli napiut hidi nutus taan lo.”✡Buk in Naka-nahalit 102:26-28
13 Ama Lamtua Allah kon aa nol Un Ana ka, noan,
“Auk Anang nge!
Maa daad se nia, se maan in todan dudui kia,
se Auk halin kanan nia.
Mam Auk tao Ku musu las,
didiin oen suda le muid se Ku.”✡Buk in Naka-nahalit 110:1
Ama Lamtua Allah aa ela meman son deng Un Ana ka, mo Un aa net ela lo, nol Un ima-ii in ne sorga nguas. 14 Mo Un ima-ii las meman muik nahin dui. Lole Un man nutus one, le laok urus totoang atuil man mam Un beles boa-blingin deng oen in kula-sala ngas. Mo ela kon no, Ama Lamtua Allah Ana ka, muun dui deng oen totoang nabale.
*1:1 a: Ibrani la na mo ngaal didang taung bangsa Yahudi. Atuil Yahudi man in parsai se Yesus Kristus sas, atuli las noken noan “atuil Kristen Ibrani”, undeng oen kisa son deng oen pail-kakan Yahudi man in kil atorang agama Yahudi blaan na nabale ngas.
†1:1 b: Ama Lamtua Allah tek Un in hida ngas nini lalan bili-ngala. Tuladang el: Un tek Abraham nini in hida, bel Musa nini atorang agama, bel Daud nini dain in naka-nahalit, nol Yeremia nini kleta.
✡1:5 Buk in Naka-nahalit 2:7
✡1:5 Samuel dua la 7:14; Dehet deng Bangsa Israel nol Bangsa Yahuda lalis mesa la 17:13
✡1:6 Dehet Ulang deng Lalan in Nuli 32:43; Lukas 2:13-14
✡1:7 Buk in Naka-nahalit 104:4
✡1:9 Buk in Naka-nahalit 45:7-8
✡1:11-12 Buk in Naka-nahalit 102:26-28
✡1:13 Buk in Naka-nahalit 110:1