1 Tiata mi musti tui in tui man muun dudui ngas, undeng mi in tui deng Kristus sa nesang buit son. Tiata halas ni mi tui ulang in tui hmunan nas deken tia, man tek noan: atuli li musti nang soleng oen in kula-sala ngas; tui deng atuli li in parsai se Ama Lamtua Allah; 2 tui deng in sarani; tui deng in totong iman le sium Ama Lamtua Koo Niu ka; tui deng mam Ama Lamtua Allah tao atuil in mate ngas le nulis pait; nol tui deng mam atuli li laok situ-tal se Ama Lamtua, le sium Un in nutus sa noan, asii man haup in nuli napiut nol Una, mo asii man lo ka. 3 Mo eta Ama Lamtua bel dola kam, maa le kit tui taplaeng pait. Ta auk le tui mi dais man in muun dudui ngas.

4-6 Molota, muik atuli nangan taan deng Kristus in tui ngas son, nol oen kon haup net Ama Lamtua Allah dalen banan na son, didiin Un niung Un Koo Niu ka maa bel one. Oen taan Ama Lamtua in Teka-teka ngas son, nol oen kon taan Un in kuasa, man mam Un pake eta apan-kloma ki le kiamat ta son. Mo ela kon no, oen soleng oen in parsai ka son, hidim bali kudi le nang soleng Kristus. Undeng na, bet muik lalan pait le oen haup in nodan ampong, halin nulis babanan pait nol Ama Lamtua Allah lo. Ta etan atuli li pesang baktetebes lo kam, na banansila el oen esan man pauk tele Ama Lamtua Ana ka pait se kai sangsuli dapa, hidim bilu-aa Un se atuil hut mamo silan.

7 Atuil tuladang ela ka, banansila el dale man puting isin banan lo ka. Molota, eta ulan na maa son nam, dale banan na nam puting nal isin man muik ambak taung atuil in daek klapa ngas. Hidim Ama Lamtua Allah niung hangun banan, le tao dale na isin mamo taplaeng. 8 Mo atuling in bali kudi Kristus sa, banansila el dale man in puting duli tuun na. Nol duli na muik ambak lo. Nesang lo kon, Ama Lamtua Allah maa le nahu hukung se dale na. Hidim Un loe soleng isin man muik ambak saa lo na.✡Dehet deng Apan-kloma ki in Dadi ka 3:17-18

9 Kaka-pail in namnau me! Auk aa mumuun buit ela, mo auk kon tana noan, mi bali kudi Kristus lo. Lole mi parsai se Un son, nol mi in nuli ka kon muik isin banan. 10 Tiata nangan, ta Ama Lamtua Allah dalen na lolo, nol Un kon nadidingun mi lating ngas lo. Ta mi daek mumuun son le tulung Un atulin nas, nol namnau one. Lolo hmunan nua, meman mi lako-daek Un osa la son. Nol mi daek ela nabale. 11 Mo halas ni, auk in koma ka le mi totoang daek mumuun dui pait, le tao muid ela napiut didiin hidi. Nini ela lam, mam mi sium nal totoang dais banan, man mi in nahlae se Ama Lamtua Allah kas. 12 Sadi mi daid osan daat deken! Mi musti not muid atuil in parsai Ama Lamtua Allah nesang son nas. Ta oen nahlae tutungus se Una, didiin oen sium nal asa man Un in hid son na.

13-16 Tuladang el kit upun Abraham. Hmunan nu Ama Lamtua Allah butu-kil in hida nini sumpa. Eta atuli li nikit in sumpa kam, taom un nini Ama Lamtua Allah ngala ka, le halin Ama Lamtua daid un saksin, undeng Ama Lamtua nam, dui deng una. Nol eta muik dasi lam, totoang atuli li tana noan, atuling na in aa ka, meman toma, undeng un sumpa nini Ama Lamtua Allah ngala ka son. Na meman lalan deng atuli li tuun. Mo dedeng Ama Lamtua Allah nikit sumpa nol kit upun Abraham ma, Un nini Un ngala ka esa, undeng muik in dui deng Una lo. Un hid noan,

Ama Lamtua Allah hid ela, mo nesang halas-sam kit upun Abraham sium asa man Ama Lamtua in hid son na, molam un parsai nol nahlae napiut se Ama Lamtua. 17 Nini ela lam, kit tana noan, eta Ama Lamtua tao in hida nol Un atulin nas sam, Un butu-kil in hida na nini sumpa, le halin tulu bel noan, asa man Un in hid son na, meman toma nol seda lo. 18 Ta muik dasi dua man seda boles lo. Mesa la, mo Ama Lamtua in hida ka. Nol dua la, mo Un in sumpa ka, man Un pake le daid in kila, deng Un in hida na ka. Tiata eta Ama Lamtua hid dasi mes son nam, taon elola ko Un daek mudin, undeng Un nam aa kam nole lo. Tiata kit lii-tiud nol Un in hida ka deken. Kit lail laok nuting le haup boa-blingin se Un son, tiata halas ni kit natang nol nahlae napiut se Un tuun. 19 Nini ela lam, kit dalen ni hutluul lo son, banansila el lui mes man puti nal son deng len na, le lako nahlae se maan in nahu ka. Ta kit nahlae se Yesus Kristus man daid kit tulu agama in lapa dudui ka. Hmunan nu, tom nol atuil Yahudi las leol banan na, tulu agama in lapa dudui ka tama muid kitu tene in loen kele Kamar in Niu Dudui ka, le taam lako saol Ama Lamtua Allah se la.✡Atorang deng Tulu Agama las 16:2 20 Mo halas ni Yesus taam lako muna son, le sai lalan bel kita. Ta Un kon nam tulu agama in lapa dudui, man hnika mes el Melkisedek hmunan nua. Mo Yesus uhu dui deng tulu agama tuladang blaan nas, undeng Un teen tatahan in lako-daek Un osa la lo.✡Buk in Naka-nahalit 110:4