1-6 Mi atuil in muki ngas! Tidi mi hngilan nas le hii babanan ne! Mi tahang atuil in daek hiti-late bel mia ngas gaji la. Mo halas ni oen dala-lating ngas haman tek mi in daek nol toma lo na. Taon elola ko, Ama Lamtua man Muun Dui Hihidi ka, ngat net atuil in dakeng nas in susa ka son.

Mi in daek ne apan-kloma kia ka, suma kaa le lena-len tuun, nol tao kolo mi dalen nas siis. Halas ni mi banansila el aus-saip apa banan, man le lolat tele ka. Mi hukung nol keo tele atuil banan, man siut puting nal apan se mi sila-matan lo ngas son.

Atuil in muki ngas! Lilu le bisat mumuun tia! Ta mam in susa-daat bili-ngala saek tom mia. Mi hmuki-nalan nas le daat sisakes son nia. Nol mi kai-baut in pake man leko-leko ngas, naen soel didaas. Mi lil-mea nol lil-muti kas muik osa lo son. Nol mam lil-mea nol lil-muti nas kaa bali mia, tuladang el ai in kaa nuli kai tuu ka. Taon elola le apan-kloma ki le kiamat, mo mi kukaum nol in tao nakbuan hmuki-nal hmate nas sia? Mi hmuki-nalan nas esan, man mam daid tada, noan, mi nangan taan ol man muik osa ne Ama Lamtua sila-mata ka lo!✡Dehet Ulang deng Lalan in Nuli 24:14-15✡Matius 6:19

7 Kaka-pali me! Mi musti kehe, le natang Ama Lamtua in pait maa kia. Ngat tuun se atuil in daek klapa ka, un keeh le natang klapa la isin nas. Ulan laih hmunan na maa kam, un soko-hai. Hidim un keeh le natang ulan pait, halin maa tao in soko-haing nas le nulis nol babanan. Ti nesang-nesang kon, oen isin. Oras sa maa lisu lam, atuling na lako le nui-noel un in soko-hai ngas isin nas. 8 Mi kon musti keeh ela. Tao teken mi apan nas, ta nesang lo ka kam, Ama Lamtua pait maa son na!

9 Kaka-pali me! Muhmemen deken. Ta muhmemen tutungus sam mam Ama Lamtua nutus hukung bel mia! Ngat tuun, ta In Nutus Dasi man ne apan-dapa kua ka, dil son ne mi sila-matan nas.

10 Kaka-pali me! Muid in not deng Ama Lamtua mee-baha las. Oen haup susa-daat bili-ngala kon no, oen keeh napiut se in susa nas dalen. 11 Eta muik atuli in keeh nal se susa dalen nam, kit kom in nikit-nikit atuling na ngala ka. Tuladang el upung Ayub. Un haup susa-daat bili-ngala, mo un tahang nala. Kon nam Ama Lamtua namnau una, hidim daek banan nas totoang bel Ayub. Ama Lamtua daek ela, undeng Un dalen na banan, hidim inu nol in namnau.✡Ayub 1:21-22; 2:10; Buk in Naka-nahalit 103:8; Yakobus 1:2-3, 12

12 Kaka-pali me! In muun dui ka, mi nikit in sumpa deken. Eta le aa noan “iya”, lam siut tuun noan, “iya”. Nol eta le tek noan “lo” kam, siut noan “lo”. Ta ela tuun kon nola! Tao lail-lisin nini lalan in nikit sumpa le busun atuil hmate, man ne apan-kloma ki ngias deken. Salolen nol sumpa le “nini Ama Lamtua” man nuli ne apan-dapa kua ka la. Muik nahin lo, eta nikit in sumpa bili-ngala. Ta eta ela lam, ku sium ku hukung nga meman, undeng ku in sumpa ngas.✡Matius 5:34-37

13 Eta se mia la muik in haup susa kam, banan dui ka un kohe-kanas. Nol eta muik in dalen kolo kam, banan dui ka un tao dain le naka-nahalit Ama Lamtua. 14 Eta deng mia la muik in heda kam, banan dui ka haman blalan in lii-lau ne jemaat ta ngas* Blalan in lii-lau ne jemaat ta ngas, taom noken kon noan ‘blalan in kil sulu-ai’. Halas nia lam noken noan, ‘majelis’. le laok ngat. Nodan oen le halin nam oen nuh mina laok se atuling in heda ka, hidim kohe-kanas nini Ama Lamtua ngala ka, halin Ama Lamtua belen le banan.✡Markus 6:13 15 Eta mi kohe-kanas bel atuil ili, nol in parsai baktetebes se Ama Lamtua kam, mam Ama Lamtua tao banan atuling na. Nol eta atuling na daek kula neta lam, mam Ama Lamtua kose soleng un in kula-salang ngas. 16 Eta deng mia la muik in daek kula nol apa kam, mi musti hao mi in kulang nas. Nini ela lam, mi kohe-kanas bel apa mes nol mesa, le halin mi haup in banan.

Atuil man dalen niu ka, un in kohe-kanas sa inu nol in kuasa, nol haup isin banan. 17 Kit kat kleta deng upung Elia. Un nam mo atuil biaas el kit kon. Mo dedeng un kohe-kanas le nodan halin ulan nauh deken na, ulan na nauh lo meman didiin taun tiul tailuang.✡Lahi-lahi las Buk laih hmunan na 17:1; 18:1 18 Hidi kon un kohe-kanas le nodan ulan na nauh pait, ta ulan na nauh maa meman. Bluan nas nulis daid kunis pait, nol klapa las puting isin banan pait.✡Lahi-lahi las Buk laih hmunan na 18:42-45

19 Kaka-pali me! Eta deng mia la muik in tao kula, le laok nang soleng asa man in toma ka, hidim muik atuli in tulung una, le pel nolan pait lako el Ama Lamtua lalan lolo ka lam, banan isi. 20 Nangan ni babanan ne! Eta mi tulung atuil in daek kula ka, le un daek kula pait lo, hidim pait maa bus el Ama Lamtua lam, mi man tao slamat atuling na, le halin un haup in nuli napiut nol Ama Lamtua. Nini ela lam, Ama Lamtua kose soleng un in kula-sala ngas totoang.✡Dasi-dais Lila 10:12; Petrus mesa la 4:8

Ela tuun tia!