1 Hidi kon, Yesus tupang Un dehet ta pait noan, “Mi musti mana-mana le sodo-sium Auk in pait maa kia, banansila el kleta nia: Duman mesan na, haat-ana at hngulu, putis kil oen hadut tas, le laok sodo-sium biklobeng in sapa ka se oen tapan nas mes uma. 2 Mo deng at hngul nas, at lima las ngengon, mo at lima las tana. 3 Lim in ngengo ngas nadidingun in kil tapnaeng min dale. 4 Mo lim in tana ngas kil meman son.✡Lukas 12:35

5 Lius se oen tapan na uma lam, biklobeng in sapa ka maa lo bii nababael tuun. Nesang-nesang kon, tana-bihaat nas matan tede, ta oen niin nalas.

6 Mo bingin-tai kon, oen ming atuli haman tek noan, ‘Hoe! Biklobeng in sapa ka maa son nuan! Maa le kit laok sodo-sium un tia!’ 7 Ming ela kon, tana-bihaat nas hangus leo-leo. Hidim oen lakos mana oen hadut tas. 8 Mo tana-bihaat ngengo kas, aa nol oen tapan nas noan, ‘Tulung bating bel kaim mina buit le, ta kaim hadut tias le mates son nian.’ 9 Mo tana-bihaat in tana ngas siut noan, ‘Idaah! Komali deken, ta bisa lo. Kaim mina kias nol taung in bating kit totoang lo! Banan dui ka, mi laok sos mina esan se kius suas tuun.’ 10 Kon oen lakos sos mina, mo oras oen puit lakos sa, biklobeng in sapa ka maa lisu. Ta tana-bihaat in tana ngas, taam lakos fesat ta dalen, leo-leo nol biklobeng in sapa ka nol haep pas totoang. Nikit oen tamas totoang son kon, atuli hkaen tele hnita ka.

11 Tana-bihaat ngengo kas pait maas lius kon, oen haman deng likun na, le nodan noan, ‘Tuang! Tulung sai bel kaim hnita ki le!’ 12 Mo um lamtua ka siut noan, ‘Eeh, auk tao lo. Ta auk taan mi lo kam!’✡Lukas 13:25

13 Tiata mi kon musti mana-mana, le doha-doh tutungus, ta mi tanan lo noan, Auk pait maang tom nol leol ila, tamlom diuk ila ka.”

14 Hidi kon, Yesus nahdeh kleta mes pait noan, “Eta Auk lakong nang mi son nam, mi musti daek babanan taung Au, banansila el kleta nia. Tuang mes le lako maan katang. Nikit un mana hidi le noan lako kon, un haman un atulin in loka-loka ngas le prentas noan, ‘Mi pake duit nias le daid peke. Eta auk pait maa ngam, mi musti maa tek au, le mi haup pait bunga bakun son na.’ 15 Kon un bel atuil in dake hmunan na, duit kadung lima,* Dais Yunanin in mo bango nia ki dul noan, τάλαντον (talanton) lima. Talanton mesa lam, tatai nol tukang mes gaji taun 15. Tiata talanton lima lam, gaji taun 75. halin nam un sepo-dakang le haup bunga. Ela kon un bel atuil in dake nomer dua nga, duit kadung dua, nol atuil in dake nomer tilung nga, duit kadung mesa, muding mesa-mesam in bole. Hidi nam, un boka lako maan katang.

16 Sium hidi duit nas kon, atuling in dake hmunan na puti lako le sepo-dakang. Nesang lo kon, un haup pait bunga kadung lima. 17 Ela kon nol atuling in dake nomer dua la. Un haup pait bunga kadung dua. 18 Mo atuling in dake nomer tilung man sium duit kadung mesa ka, lako kali bolo se dale ka, le buni un tuang nga duit tas.

19 Nesang ana lo, halas-sam oen tuang nga pait maa. Kon un haman nakbua oen tilus, le keket duit man un in bel oen son, le taung in sepo-dakang ngas. 20 Atuling in loka-loka hmunan na tama, hidim un bel duit kadung hngulu. Un tek noan, ‘Tuang! Tuang duit tas nian. Lelon na tuang bel auk duit kadung lima. Mo auk haup tapnaeng bunga kadung lim pait.’

21 Ming ela kon, tuang nga dalen kolo. Un tekan noan, ‘Banan! Ku niam atuil in loka-loka man in banan. Ta auk se iang lo kon no, ku daek nol in makoe son, hidim muid napiut auk in prenta ngas. Undeng ku daek nal os ana nia, ta mam auk nikit ku le kil os man in tene dui pait tas. Mam auk tao fesat, le kit kaa leo-leo nol dael kolo.’

22 Hidi kon, atuling in loka-loka nomer dua la tama lolen, un bel tuang nga duit kadung aat. Un tek noan, ‘Tuang! Hmunan nu tuang bel auk duit kadung dua. Mo auk haup tapnaeng bunga kadung dua pait son.’

23 Kon nam, tuang nga dalen kolo. Un tekan noan, ‘Banan! Ku niam kon atuil in loka-loka man in banan. Ta auk se iang lo kon no, ku daek nol in makoe son, hidim ku daek muid auk in prenta ngas tutungus. Undeng ku daek nal dais ana ni son, tiata mam auk nikit ku le kil dais man in tene dui pait tas. Mam auk tao fesat, le kit totoang kaa leo-leo nol dael kolo.’

24 Hidi nam, atuling in loka-loka nomer tilu la maa lolen. Kon un tek noan, ‘Tuang! Auk tana le tuang niam atuil in dalen didi. Ta tuang kat asa man atuil didang in dake, nol nui-noel asa man atuil didang in mula-hai. 25 Undeng na le, auk lii, tamlom duit nias ilang le tuang hukung au la. Tiata auk laok buni duit nias babanan. Nian tuang! Kat pait tia, ta duit kadung mes man tuang in bel auk son na, tetema nabale!’

26 Ming ela kon, tuang nga baet un noan, ‘Ku niam atuil loka-loka man daat, nol ku osam daat isi! Eta ku taan son noan, auk kat asa man atuil didang in dake, nol nui-noel asa man atuil didang in mula-hai kam, 27 tasao le ku laok pesang auk duit tas se bang tuun lo kia? Le halin eta auk pait maa ngam, auk haup un bunga ka, bubuit tuun kon banan!’

28 Hidi na kon, tuang nga tadu un atulin in loka-loka tenga las noan, ‘Kat duit tas deng una, le beles laok se atuling in haup tapnaeng bunga kadung lima ka. 29 Ta atuil man mana-koet babanan asa man un in kil son nas, mam un haup taplaeng mamo dui pait. Mo atuil in dai mana-koet asa man un in kil son nas lo ka, mam oen kat lai-niin totoang nas deng una.✡Matius 13:12; Markus 4:25; Lukas 8:18

30 Daek atuling in loka-loka man muik ambak lo nia. Pela-lakang le nikit soleng lako likun nua. Nang le un lilu-ahan nol susa-daat se maan mitang ngua!’ ”✡Lukas 19:11-27✡Matius 8:12; 22:13; Lukas 13:28

31 Hidi kon Yesus dehet napiut noan, “Au, Atuling Baktetebes nia, mam niu maang pait, nini Auk Amang ngu in kuasa man loe-liliman na, leo-leo nol Un ima-ii las deng sorga. Hidim Auk daad se Auk del in prenta man muun dudui ka, le pres totoang atuli li dasi las, muding asa man oen in lako-daek son nas.✡Matius 16:27; 19:28 32 Mam totoang atuil in nuil net se apan-kloma ki ngias, maa situ-taal se Au. Hidim Auk soel bakisan one, banansila el atuil in lolo-poa soel bakisan lae-blai las deng lae-tutu las, le dadi bua dua ka. 33 Atuli-atuil man lako-daek muid Ama Lamtua Allah in koma ngas, Auk taos se Auk halin kanan na. Mo atuil in lako-daek muid Ama Lamtua Allah in koma ka lo ngas, Auk taos se Auk halin kliu ka. 34 Oras na lam, Auk kil prenta son banansila el Lahi ka. Mam Auk tek atuli-atuil in se Auk halin kanan na ngas noan, ‘Mi man sium hangun deng Auk Amang ngu son nas, maa, le tamam se Un uma lia, se maan Un in mana taung mi son lolo hmunan nua ka. 35 Auk tek mi ela, undeng hmunan nu, eta Auk lubung ngam, mi man bel Auk in kaa. Auk meeng tuu kam, mi bel Auk in ninu. Auk maang tuladang el atuil balu ka lam, mi man sium Auk le daad tahang se mi uma. 36 Auk muik kai-baut lo kam, mi man bel Auk kai-baut le pake. Auk hedang ngam, mi man maa meo Au. Auk se bui daleng ngam, mi man maa tulung Au.’

37 Ming ela kon, atuil dael lolo in se Auk halin kanan na ngas, siut noan, ‘Lamtua, lam na elol na la? Lamtua tek noan lubu, ta kaim bel Ku in kaa. Lamtua meen tuu kam, kaim bel Ku ui in ninu. 38 Lamtua maa banansila el atuil balu ka lam, kaim sium tamang se kaim uma. Lamtua muik kai-baut in pake lo kam, kaim belen. 39 Lamtua heda kam, kaim laok meon. Lamtua se bui dalen nam, kaim laok tulung. Kaim tao dasi-dais in ela ngas, blingan na?’

40 Lam mam Auk siut oen noan, ‘Auk in tek mia ni tom baktetebes! Ta se oras mi tao dasi-dais in ela ngas, bel Auk atulin in ana dudui ngas kon no, na mi tao taung Auk son na!’

41 Hidim Auk tek atuli-atuil in se Auk halin kliu ka ngas noan, ‘Hoe atuil daat me! Ama Lamtua Allah bahang mi son. Lakom nodat deng nia! Mam Auk tadu atuli le laok pasang tamang mi se ai naraka man in kaloe hidi nutus taan lo kua. Ta Ama Lamtua Allah mana pesang maan in susa-daat na son, bel uikjale kas nol oen laih tuan na. 42 Auk nulut soleng mia, undeng dedeng Auk lubung ngam, mi bel Auk in kaa lo. Auk meeng tuu kam, mi bel Auk in ninu lo. 43 Auk maang banansila el atuil balu ka, mo mi dai sium tahang Auk se mi uma las lo. Auk muik kai-baut in pake lo, mo mi bel Auk lo. Auk hedang, mo mi maa meo Auk lo. Auk se bui ku daleng, mo mi maa le tulung Auk lo.’

44 Ming ela kon, atuil daat tas siut noan, ‘Lamtua, na elol son na la? Lamtua tek noan lubu, mo kaim bel in kaa lo. Lamtua meen tuu, mo kaim bel in ninu lo. Lamtua maa banansila el atuil balu ka, mo kaim sium tahang se kaim uma las lo. Lamtua muik kai-baut in pake lo, mo kaim bel lo. Lamtua heda, mo kaim laok meo lo. Lamtua se bui ku dale, mo kaim laok tulung lo. Tiata kaim tao saol Lamtua ela blingan son na?’

45 Mam Auk situs noan, ‘Auk in tek mia ni tom baktetebes! Ta dedeng mi dai tulung atuil anang dudui las lo ka, na banansila el mi dai tulung Auk lo.’ 46 Hidi nam atuil daat nas haup in susa-daat napiut didiin hidi nutus taan lo. Molam atuil man dalen na lolo ngas, haup in nuli napiut nol Ama Lamtua didiin son na.”✡Danial 12:2