Dehet Dais Banan deng Yesus Kristus
muding
Markus
1
Ni dehet banan deng Ama Lamtua Allah Ana ka.* Dais ‘Ama Lamtua Allah Ana’ ka muik ne in dula hmunan tenga las lo. Un ngala, Yesus Kristus, man Ama Lamtua Allah tulu meman son deng lolo hmunan nua. Un dehet ta elia:
Yuhanis in Sarain Atuli ka, sai lalan bel Lamtua Yesus
(Matius 3:1-12; Lukas 3:1-18; Yuhanis 1:19-28)
Yesus daek Un osa la lo bii kam, Ama Lamtua Allah nutus atuli mesa, ngala Yuhanis. Yuhanis musti lako le sai lalan bel Yesus in maa ka. Hmunan nua, Ama Lamtua Allah pake Un mee-baha mesa, ngala Yesaya, le dul meman son elia:
“Hii ke! Auk tadu Auk atulin mesa, le lako sai lalan bel Ku. Meliaki 3:1
Mam atuling na lako se epe man in muik atuil loꞌ, le haman tek mumuun noan:
‘Totoang atuli li mana-mana le daek babanan lalan na, halin sium Ama Lamtua in maa kia!
Daek titu lalan na, le sodo-sium Una.’ ” Yesaya 40:3
4-6 Taom atuli las noken Yuhanis noan, Atuil In Sarain Atuli. Un daad se epe man in muik atuil loꞌ. Un kitu-kado las dakes deng hmukit unta bulu. Un bota la daken nini hmukit bulang. Un in kaa ka, klamat nol uin pani. [Yuhanis in nuli ka, banansila el upung Elia hmunan nua.] Lahi-lahi las Buk nomer dua la 1:8
Dedeng na, atuli hut mamo deng kota Yerusalem nol propinsi Yudea dalen na totoang, puit maas le tutnaal Yuhanis se un mana la. Oen maas le ngat Yuhanis, nol hii un in tui-tikang ngas. Un tekas noan, “Mi musti haoꞌ nol nang soleng mi in kula-sala ngas totoang, le halin nam Ama Lamtua Allah kose soleng mi in kula-sala ngas. Hidim mi musti sarani, le halin daid tada, noan, mi babanan nol Ama Lamtua Allah son.”
Hidi na tuun nam, oen haoꞌ oen in kula-sala ngas, tiata un sarain oen totoang se palun Yordan na.
Un tekas pait noan, “Mam atuling mes le maa, Un uhu dui deng au. Suma daid Un atulin in loka-loka tuun kon no, auk tatai nolan loꞌ. In dula dais Yunanin esa ka tek noan, ‘suda le sas-loat un nahan na talin na tuun kon, auk tatai lo’. Un nahin na noan, Yuhanis suma atuil ana tukun, tiata un daid Lamtua Yesus atulin in loka-loka tuun kon no, tatai loꞌ. Auk suma sarain mi nini ui tukun, mo mam Un in dake ka muun dui deng au, undeng Un le tao inu mi dalen nas nini Ama Lamtua Koo Niu ka.”
Yuhanis sarain Lamtua Yesus
(Matius 3:13-17; Lukas 3:21-22)
Dedeng na, Yesus maa deng iung Nasaret ne propinsi Galilea, le tutnaal Yuhanis. Kon Yuhanis sarain Un se palun Yordan na. 10 Nikit Yesus puti deng ui la tukun nam, Un ngat net apan nu holsai. Hidim Ama Lamtua Allah Koo la niu maa se Una, banansila el korkifi ka. 11 Kon nam oen ming Ama Lamtua Allah fala ka deng apan nu tek noan,
“Ku niam, Auk Anang in namnau ka.
Ku tao Auk daleng ngi kolo tutungus.” Dehet deng Apan-kloma ki in Dadi ka 22:2; Buk in Naka-nahalit 2:7; Yesaya 42:1; Matius 3:17; 12:18; Markus 9:7; Lukas 3:22
Uikjale kas laih tuan na, sob Lamtua Yesus se maan atuli in aseꞌ
(Matius 4:1-11; Lukas 4:1-13)
12 Hidi deng na kon, Ama Lamtua Koo la pel nol Yesus lako se epe mesa, man muik atuil lo. 13 Hmukit huin muik mamo ne maan na. Un daad se maan na dedeng buk aat, lelo buk aat. Se na uikjale kas laih tuan na, maa sob Yesus le halin muid se una, mo nalan loꞌ. Hidi kon, Ama Lamtua Allah ima-ii las deng sorga maa lii-lau Yesus.
Lamtua Yesus lako se Galilea, le tek deng Ama Lamtua Allah Dehet Dais Banan na
(Matius 4:12-22; Lukas 4:14-15; 5:1-11)
14 Se dedeng oen tamang Yuhanis in Sarain Atuli ka lako se bui dalen na, Yesus lako se propinsi Galilea, le nahdeh deng Ama Lamtua Allah Dehet Dais Banan na se la. 15 Un tek noan,
“Hii ke! Halas ni Ama Lamtua Allah oras sa maa lius son!
Totoang atuli li halas ni tana noan, Ama Lamtua Allah man kil prenta.
Tiata mi musti tenem tia, deng mi in nole-lilung daat ta,
le bali muid se Ama Lamtua.
Hidim parsai se Un Dehet Dais Banan na!” Matius 3:2
Lamtua Yesus haman atuil in nuting ikan nas le muid Una
16 Neot mesan na, Yesus laok muid tubu Galilea la suut ta. Kon Un ngat net atuli mesa, ngala Simun, nol un palin na, ngala Anderias. Oen duas saal ikan. Oen in dake lelon-lelon na ela. 17 Yesus haman oen noan, “Maa, le muid Au! Lelon-lelon nam mi nuting ikan, mo deng leol neot nia, Auk le tao mi daid atuil in nuting atuli.” 18 Ming ela kon, oen duas nang soleng oen sala la, le lakos muid Yesus meman.
19 Hidi nam, Yesus lako bubuit pait, kon Un ngat net Sabadeus anan nas. Kaka la ngala Yakobus, nol pali la, ngala Yuhanis. Oen duas mana babanan pukat ta se lui la dalen. 20 Yesus haman oen duas noan, “Maa, le muid Au!” Tukun nam oen duas nang soleng oen aman na, nol oen atulin in dake ngas se lui dapas. Le lakos muid Una.
Lamtua Yesus nulut puting uikjale deng atuli mesa, se kota Kapernaum
(Lukas 4:31-37)
21 Hidi kon, Yesus nol atuil at aat man in muid Una ngas, lakos lius se kota Kapernaum. Se atuil Yahudi las leol in kohe-kanas sa, Atuil Yahudi las leol in kohe-kanas sa, leol teen deng in dake, man oen noken noan, ‘Leol Sabat’. Yesus taam lako se um in kohe-kanas sa, le tui atuli las se na. 22 Totoang atuli las ngaa-bahan nol in hii-ming Un in dehet ta, lole Un taan baktetebes in tui-tikang ngas isin na. Bakisan deng guru-guru agama Yahudi las. Matius 7:28-29
23 Dedeng na, muik atuli mes tom uikjale. Un kon tama muid se um in kohe-kanas sa, hidim uikjale ka tao atuling na le ahan mumuun noan, 24 “Hoeh! Yesus atuil Nasaret! Ku le tao saa kami la! Ku le maa tao didaan kami le? Kaim taan Ku! Ku niam mo, Atuling man hmunan nu Ama Lamtua Allah in hid son, le belen maa ka. Ku niam, Ama Lamtua Atulin Niuꞌ, man muik kula-sala lo!”
25 Mo Yesus baet un noan, “Eteꞌ! Lobo deken! Puti deng atuling na tia!”
26 Kon uikjale ka tao atuli nga apa ka pepeten mumuun. Hidim un puti deng atuling na nol ahan la-lalan. 27 Tiata, totoang atuil in se um in kohe-kanas sa hera-herang. Hidim oen totoang tek apa noan, “Awii! Asa nia le? Un prenta uikjale kas le putis, kon oen muid Un in koma ka. Ni in tui baluꞌ te? Atuling ni in aa ki uhu isi mo!”
28 Hidi deng na la, atuli las dehet apa baha laok baha, didiin lako papmes totoang ingu-iung in se propinsi Galilea ngas.
Lamtua Yesus tao banan Petrus been na, nol atuli hut mamoꞌ
(Matius 8:14-17; Lukas 4:38-41)
29 Nikit oen putis deng um in kohe-kanas sa kon, Yesus lako se Simun nol Anderias uma. Yakobus nol Yuhanis kon lakos leo-leo nol one. 30 Simun been na hed otot, un nini tuun se hadang dapa. Tiata nikit Yesus nol Un ima-ii las taam lakos uma la dalen kon nam, atuli maa tek noan, “Blalan bihatang hed otot.”
31 Kon Yesus laok ngat blalan bihata nga, hidim kilan se ima ka le, hulung hangu dili. Kon nam un in hed otot ta ilang meman. Hidi nam blalan bihatang na puti lako tutan-lau one.
32 Lelo lako dadaen, kon atuli las kil atuil ili koed-ngasing ngas, nol atuil in tom uikjale kas laok bel Yesus, le nodan Un tao banan one. 33 Didiin atuli se kota mes isin maas nakbua se uma la hnitan na. 34 Atuli las in ili ka bili-ngalaꞌ, mo Yesus taih banan oen totoang. Nol Un nulut soleng uikjale mamo koseꞌ. Mo undeng uikjale kas taan Una, tiata Un beles aa saa lo.
Lamtua Yesus laok papmes ingu-iung tenga las, le tek deng Ama Lamtua Allah Dehet Dais Banan na
(Lukas 4:42-44)
35 Ola ka oskaong bii, hbabut nabale, mo Yesus hangu, le puti lako deng um na. Un lako se maan in ete mesa, le kohe-kanas se Ama Lamtua Allah. 36 Simun nol un tapan nas hangus kon oen net Yesus lo, tiata oen nuting Una. 37 Nikit oen laok tutnalan kon, oen tekan noan, “Papa! Atuli mamo maa nuting Papa.”
38 Mo Un situs noan, “Ela kon banan. Mo in banan dui ka, kit laok ingu-iung man in dadani mo ni ngias lolen. Ta Auk le tek oen deng Dehet Dais Banan ni kon. Undeng Auk osa la ela.”
39 Hidi na kon Un laok papmes propinsi Galilea, le nahdeh deng Ama Lamtua Allah Dehet Dais Banan na, se uma-um in kohe-kanas sas. Nol Un kon nulut puting uikjale kas deng atuli las. Matius 4:23; 9:35
Lamtua Yesus tao banan atuling in iil baih-bluku ka
(Matius 8:1-4; Lukas 5:12-16)
40 Dedeng na, muik atuli mes iil baih-bluku§ Iil baih-bluku la, banansila el iil kusta ka. maa tutnaal Yesus. Un hai buku ka le nodan Yesus noan, “Ee Papa! Tulung auk le! Ta auk tana noan, Paap bisa tao ilang nal auk ili lia, le halin nam atuli nikis auk bakun tia. Sadi Paap tade.”
41 Yesus namnau atuling na, tiata Un doong ima ka le kapas atuling na, le tekan noan, “Auk tade! Tiata ku banan tia!” 42 Nol na kon, atuling na ili la ilang, le un banan meman. 43 Hidi nam Yesus tadu atuling na le pait, nol Un hidan 44 noan, “Nangan babanan ne! Ku banan son, mo boel tek atuil deken le! Ku musti daek muid upung Musa prenta la munaꞌ. Tiata, ku lako se tulu agama lu munaꞌ, le un tinang ku apam ma, halin un net noan ku ili la ilang baktetebes son, tam bii ka. Hidim ku musti bel nasar le nodan mamo, halin nam totoang atuli li tana noan, ku banan baktetebes son.” Atorang deng Tulu Agama las 14:1-32
45 Mo atuling na puti kon, un lako nahdeh pukiu se ola-ola. Kon nam, atuli hut mamo kom le tutnaal nol Yesus, didiin Un taam laok nal bus el kota la dalen na lo. Tiata, Un daad se mana-maan in muik atuil lo ngas, se kota likun na. Mo atuli li baa maa tutungus deng ola-ola, le tutnaal nol Una.

*1:1 Dais ‘Ama Lamtua Allah Ana’ ka muik ne in dula hmunan tenga las lo.

1:2 Meliaki 3:1

1:3 Yesaya 40:3

1:4-6 Lahi-lahi las Buk nomer dua la 1:8

1:7 In dula dais Yunanin esa ka tek noan, ‘suda le sas-loat un nahan na talin na tuun kon, auk tatai lo’. Un nahin na noan, Yuhanis suma atuil ana tukun, tiata un daid Lamtua Yesus atulin in loka-loka tuun kon no, tatai loꞌ.

1:11 Dehet deng Apan-kloma ki in Dadi ka 22:2; Buk in Naka-nahalit 2:7; Yesaya 42:1; Matius 3:17; 12:18; Markus 9:7; Lukas 3:22

1:15 Matius 3:2

1:21 Atuil Yahudi las leol in kohe-kanas sa, leol teen deng in dake, man oen noken noan, ‘Leol Sabat’.

1:22 Matius 7:28-29

1:39 Matius 4:23; 9:35

§1:40 Iil baih-bluku la, banansila el iil kusta ka.

1:44 Atorang deng Tulu Agama las 14:1-32