10
Atuil Farisi las nuting lalan le tao nahu Lamtua Yesus nini dais in sapa-daiꞌ
(Matius 19:1-12; Lukas 16:18)
1 Hidi kon, Yesus nol Un ima-ii las lakos se propinsi Yudea, nol mana-maan didang in se palun Yordan halin leol-saken na ngas. Se ola-ol tuun kon atuli mamo maas nakbua nol Yesus. Tiata el in biasa ka, Un tui one.
2 Muik atuil Farisi deeh maas le noan tao nahu Yesus. Oen keket noan, “Muid kit atoran agama lia lam, eta biklobe mes saap son nam, un boel in dai tam lo ka?”
3 Yesus situs noan, “Nangan napat le! Atoran in sapa man upung Musa in bel kita ka elola la?”
4 Oen situn noan, “Upung Musa atorang nga tek noan, biklobe li bisa dai, sadi bel surat in dai se un sapa-bihatan na muna le.”✡Dehet Ulang deng Lalan in Nuli 24:1-4; Matius 5:31
5 Yesus situs noan, “Hoe! Hii ke! Undeng mi bon batu, tiata upung Musa dul ela! 6 Mo nadidingun dehet laih hmunan hesa ku Ama Lamtua Allah in koet apan-dapa kua, nol apan-kloma kia ka deken! Muik in dula noan,
‘Ama Lamtua Allah koet atuli li, biklobe nol bihata.✡Dehet deng Apan-kloma ki in Dadi ka 1:27; 5:2
7 Undeng na, le biklobe li nang un ina ka nol un ama ka,
le lako nuli koo-dalen mes nol un sapa-bihatan na,
8 lole oen duas daid mes son.’✡Dehet deng Apan-kloma ki in Dadi ka 2:24
9 Eta Ama Lamtua Allah esa taos le daid mes son nam, atuli li boel sis bating duas deken!”
10 Hidi nam, Yesus nol ima-ii las siis taam lakos se uma mesa. Se na, oen ketan Yesus in tui apin na.
11 Yesus situs noan, “Asii man dai soleng un sapa-bihatan na, hidim saap pait tam, na nong son na! 12 Bihata li kon ela! Eta un dai soleng un sapa-bikloben na, hidim un saap pait tam, na kon nong son na!”✡Matius 5:32; Korintus mesa la 7:10-11
Lamtua Yesus aa le bel hangun se tana-ana ngas
(Matius 19:13-15; Lukas 18:15-17)
13 Oe mesan na, atuli las kil nol oen anan nas laok bel Yesus, le nodan Un halin beles hangun. Mo Yesus ima-ii las kaing atuli las.
14 Nikit Yesus ngat net Un ima-ii las in tao ela ka kon, Un ngau one, noan, “Nang tana-ana ngas le maas el Au lia! Kaing oen deken! Ta atuil in banansila el tana-ana nia ngas sa, Ama Lamtua Allah nenan. 15 Mi nangan babanan! Atuil in kom le maa saol Ama Lamtua Allah ka, oen musti kom isi le net Una, banansila el tana-ana ngas in nangan isi le tutnaal nol oen ina-aman nas sa. Etan ela lo kam, oen haup in daid Ama Lamtua Allah atulin lo.”✡Matius 18:3 16 Hidi na kon, Yesus neok tana-ana ngas, le nene ima ka laok se oen mesa-mesa, hidim beles hangun.
Daid Ama Lamtua Allah atulin nam nangan noan kahan tuun deken
(Matius 19:16-30; Lukas 18:18-30)
17 Dedeng Yesus nol atuil in muid Una ngas mana le lakos deng maan na kon, muik atuil in muki mes lail maa tutnaal nol Yesus. Un hai buku ka se Yesus sila ka, hidim un keket noan, “Ama Guru man in todan dui! Auk le keket bubuit. Elia Ama, auk tao elol le halin nam auk taan baktetebes noan, auk tamang sorgang le nuling leo-leo nol Ama Lamtua Allah tutungus sa?”
18 Yesus situn noan, “Amo tasao le ku noken Auk noan, Ama Guru ‘man in todan dui’ kia? Muik atuil in todan dui mes lo kon, suma Ama Lamtua Allah sii. 19 Ku taan Ama Lamtua Allah atorang deng lolo hmunan nua ka son, man tek noan,
‘Keo atuil deken;
Nong deken;
Naok deken;
Daid saksi in nole-lilung deken;
Liun-leo nal atuil le kat lai-niin oen sa-saa las deken;
Nol todan ku ina ma nol ku ama ma.’ ”✡Dehet in Puit deng Dale Mesir 20:12-16; Dehet Ulang deng Lalan in Nuli 5:16-20
20 Atuling na situn noan, “Baktebes Ama Guru! Lolo muda bii kua, Auk daek muid atorang nas totoang son.”
21 Yesus kasiang atuling na. Kon Un tekan noan, “Toma! Mo muik dasi mes nabale. Ku pait lako tia, le hee nuli ku hmuki-nalan nas totoang. Hidim un duit ta, ku laok bating bel atuil in tuka-dabun nas. Hidi na halas-sam maa le muid Au. Ta mam Ama Lamtua Allah bel seda ku hmuki-nal didang se sorga.”
22 Nikit atuling na ming Yesus in tek ela ka kon, un dalen na daat meman. Hidim un pait nol dalen susa ana lo, undeng un muik isi.
23 Kon Yesus ngat pukiu, hidim tek Un ima-ii las noan, “Hii ke! Meman atuil in muki ngas sus isi in taam sorga!”
24 Ming Un aa ela kon, ima-ii las nangan hapun lo. Mo Yesus aa taplaeng pait noan, “Hii babanan! Kom le daid Ama Lamtua Allah atulin nam, susan ana lo! Boel nangan noan kahan tuun deken. 25 Ta atuil in muki ngas taam lakos sorga le daid Ama Lamtua Allah atulin nam, susan na banansila el hmukit unta tene mes taam lako un okat ta muid laung bolo.”
26 Yesus in teka na, tao oen totoang nangan hapun lo taplaeng. Kon oen keket apa noan, “Eta meman baktebes ela lam, asii man haup in nuli man hidi nutus taan lo ka le?”
27 Yesus ngat oen mesa-mesa, hidim tek noan, “Eta taung atuli lia lam, meman bisan lo. Mo nadidingun deken: ta taung Ama Lamtua Allah lam, totoang nas bisa dadi!”
28 Kon nam Petrus nikit in aa noan, “Papa. Kaim nang soleng kaim sa-saa las totoang son le muid Papa. Mo mam kaim haup saa la?”
29-30 Yesus tek noan, “Auk tek mi elia: atuil man in muid Au, nol nang soleng un ina-aman nas, un kaka-palin nas, un anan nas, un klapa la, un osa la, nol un uma isin nas totoang, le laok nahdeh Ama Lamtua Allah Dehet Dais Banan na se ola-ol tuun na, mam un sium pait oe ngatus. Totoang sa-saa man un in nang soleng son nas, mam un simus pait nol lai-lisi. Ela kon no, mam un haup in diku-puang, undeng un in muid Au ka. Mo etan apan-kloma ki kiamat tam, un nuli leo-leo nol Ama Lamtua Allah tutungus. Un in haup pait ta, ela! 31 Nangan ne! Asii man nikit-nikit apa ka le daid atuil tene, kam muid Ama Lamtua Allah in nangan na lam, mam un daid atuil ana dui. Mo asii man tao apa ka el atuil ana ka, muid Ama Lamtua Allah in nangan na lam, mam un daid atuil tene dui.”✡Matius 20:16; Lukas 13:30
Lamtua Yesus tek lalis tiul deng Un in mate ka
(Matius 20:17-19; Lukas 18:31-34)
32 Dedeng na Yesus nol atuil in muid Una ngas lakos bus el Yerusalem. Yesus laok muna se hmunan, hidim Un ima-ii las, halas-sam atuil tenga las laok muid deng klupu. Oen nangan net hmunan nu Un in tek noan, atuli le keo tele Un se Yerusalem ma, tiata Un ima-ii las dalen nas hutlulu, nol atuil in muid one ngas kon lii. Taan ela kon, Yesus haman nal Un ima-ii las siis, le tekas pait deng asa man atuli le tao saol Un se Yerusalem ma. 33 Un tekas noan, “Mi hii ke! Auk niam, Atuling Baktetebes sa. Kit le lakong el Yerusalem son niang, mo lius se ua ngam, oen hee Auk lakong bel tulu agama las tene-tenen nas nol guru-guru agama las. Hidim oen nutus, le hukung tele Au. Tiata oen sao Auk lakong se atuil man in taan Ama Lamtua Allah lo ngas. 34 Hidim oen aa le tao nahmaeng Au. Oen puut kapen nol Au. Nol oen kon diku-puang Auk apang ngi dudu-dudus. Hidi halas-sam oen pauk tele Au. Meman Auk mateng baktebes. Mo bingin dua ka lam, Auk nuling pait.”* Se dais Yunanin nam oen mulai kaih deng: leol neot nia (= 1), ola kam (= 2), bingin dua kam (= 3), bingin tilu kam (= 4). Tiata se dais Yunanin nam, τῃ τρίτῃ ἡμέρᾳ (tei tritei heimera) nahin na noan “leol tilu la” se dais Helong ngam, neot na nahi tom se “bingin dua ka”. Nangan ne, ta Lamtua Yesus mate se leol lima ka (kahin mesa). Ola ka, leol eneng (kahin dua), na Lamtua Yesus se bolo dalen nabale. Bingin dua ka, leol minggu (kahin tilu), na Lamtua Yesus in nuli pait ta. Tiata eta muid kit in kaih lelon nia lam, Un mate duman dua, halas-sam Un nuli pait.
Yakobus nol Yuhanis nodan le daid atuil tene
(Matius 20:20-28)
35 Hidi kon, Yakobus nol Yuhanis, Sabadeus anan nas maas se Yesus. Oen nodan Un noan, “Paap Guru! Kaim le parlu.”
36 Yesus keket oen noan, “Mi duam le parlu saa la?”
37 Oen siut noan, “Elia Papa! Eta Paap daad le kil bandu son nam, kaim nodan le Paap bel kaim duam maan in dada. Mes se Paap halin kanan na, mo mes pait se Paap halin kliu ka, le halin kaim kon kil bandu.”
38 Yesus situs noan, “Mi duam nangan taan asa man mi in nodan ni lo. Mam Auk haup in susa-daat mamo. Tiata elola? Mi bali le mi kon lepa-haal nal in susa-daat na leo-leo nol Auk didiin matem me?”✡Lukas 12:50
39 Oen duas situn noan, “Kaim bolen Papa!”
Yesus situs pait noan, “Meman mam mi kon haup in susa-daat banansila el Au. 40 Mo mam asii man daad se Auk halin kanan ni nol kliu kia lam, Auk man in nutus lo. Ta in muik hak le nutus ela ka, Ama Lamtua Allah. Un man nutus meman son, le asii man daad se maan nas.”
41 Nikit ima-ii tenga las, ming Yakobus duas Yuhanis in laok nodan ela ka kon, oen koon-mali isi. 42 Tiata Yesus haman oen totoang le tekas noan, “Elia! Mi tanan son ta lo? Atuil tene man in kil bandu ngas taom tudan-kida oen hutu-atan nas, didiin oen tao nal saa lo. Nol tulu-tulu deng ngala-ngaal man in taan Ama Lamtua Allah lo ngas, oen bel prenta lai-lisin, didiin oen hutu-atan nas nikit nal bon lo. 43 Mo mi tao ela deken! Eta asii deng mia la kom le daid atuil tene kam, un musti daid banansila el ata ka, le lii-lau atuil tenga las.✡Lukas 22:25-26 44 Nol asii man kom le daid tulu kam, un musti tao apa ka banansila el ata ka.✡Matius 23:11; Markus 9:35; Lukas 22:26 45 Ta Au, Atuling Baktetebes sia, maang le atuli li lii-lau Auk lo, molam Auk maang le lii-lau atuil hut mamo kas. Auk maang le bel Auk in nuli ki tetema, halin sui nal atuli mamo deng oen in kula-sala ngas.”
Lamtua Yesus tao banan atuling tedo mesa
(Matius 20:29-34; Lukas 18:35-43)
46 Kon nam Yesus nol Un ima-ii las, nol atuli hut mamo lakos lius se kota Yerikos. Oras oen in lakos sa, muik atuling tedo mes daad le nodan-nodan se lalan suut ta. Un ngala Bartimeos, ama Timeos ana. 47 Nikit un ming noan, in maa laok deng na ka, Yesus atuling Nasaret ta, kon un haman mumuun noan, “Yesus! Laih Daud in hua-koet te! Auk natang Paap blaan son! Bel ampong auk tia!”
48 Ming un haman ela kon, atuli las kaing un noan, “Hoe! Lobo deken!”
Mo un haman mumuun dui pait noan, “Yesus! Laih Daud in hua-koet! Bel ampong auk tia!”
49 Tiata Yesus tene. Kon Un tek noan, “Kil nol un maa se nia!”
Kon oen laok tek atuling tedo ka noan, “Ku lobo bakun na! Ta Paap Guru haman ku son nuan. Maa tia!”
50 Ming ela kon, Bartimeos pasang soleng un seman na, hidim un lalaba tuun hangu dili, ta oen pel nolan lako se Yesus.
51 Yesus keket un noan, “Ku kom saa le?”
Atuling tedo ka situn noan, “Papa! Auk nodan le auk ngat neta.”
52 Yesus tekan pait noan, “Undeng ku parsai noan Auk tao banan nal ku, tiata nol ni kon, ku banan tia! Lako tia!”
Kon Bartimeos mata ka banan meman. Hidi nam, un kon lako muid Yesus.
✡10:4 Dehet Ulang deng Lalan in Nuli 24:1-4; Matius 5:31
✡10:6 Dehet deng Apan-kloma ki in Dadi ka 1:27; 5:2
✡10:8 Dehet deng Apan-kloma ki in Dadi ka 2:24
✡10:12 Matius 5:32; Korintus mesa la 7:10-11
✡10:19 Dehet in Puit deng Dale Mesir 20:12-16; Dehet Ulang deng Lalan in Nuli 5:16-20
✡10:31 Matius 20:16; Lukas 13:30
*10:34 Se dais Yunanin nam oen mulai kaih deng: leol neot nia (= 1), ola kam (= 2), bingin dua kam (= 3), bingin tilu kam (= 4). Tiata se dais Yunanin nam, τῃ τρίτῃ ἡμέρᾳ (tei tritei heimera) nahin na noan “leol tilu la” se dais Helong ngam, neot na nahi tom se “bingin dua ka”. Nangan ne, ta Lamtua Yesus mate se leol lima ka (kahin mesa). Ola ka, leol eneng (kahin dua), na Lamtua Yesus se bolo dalen nabale. Bingin dua ka, leol minggu (kahin tilu), na Lamtua Yesus in nuli pait ta. Tiata eta muid kit in kaih lelon nia lam, Un mate duman dua, halas-sam Un nuli pait.
✡10:44 Matius 23:11; Markus 9:35; Lukas 22:26