1 Surat ni deng au, Paulus. Auk tapang Timutius kon tunang boa-blingin bel mia. Kaim duam niam, Yesus Kristus atulin in loka-loka.

Kaim tunang surat ni bel totoang atuil man in parsai Yesus Kristus, se kota Filipi ngas. Nol kaim kon, kom le totoang tulu in kil jemaat nol atuil in hulung tulu in kil jemaat tas, nangan taan baab surat ni isin na nol babanan.

2 Ama Lamtua Allah na mo, kit Aman. Nol Yesus Kristus na mo, kit Lamtuan. Tiata kaim nodan le Oen tulu Oen dalen banan na bel mia, le halin mi in nuli ka titu-tema nol dame.

3 Auk net mi lo blaan son kon no, auk nadidingun mi lo! Taom auk nangan net mia lam, auk nodan mamo se Ama Lamtua, undeng mi parsai tutungus se Una. 4 Eta auk kohe-kanas bel mia lam, auk daleng kolo, 5 undeng oras mi sium Ama Lamtua Dehet Dais Banan na ka, mi lako-daek napiut Un osa la leo-leo nol au. 6 Na tulu bel noan, Ama Lamtua Allah daek son ne mi dalen nas. Nol auk taan baktetebes noan, Un daek napiut Un os man in banan na, didiin hidi totoang, tom nol oras Yesus Kristus in pait maa ka.

7 Meman eta auk namnau mia lam toma, undeng auk daleng ngi butu-kil nol mi son lolo hmunan nua. Oras auk tek atuli las deng Ama Lamtua Dehet Dais Banan na, nol oras auk siut bali atuil in labang Dehet Dais Banan na ngas, mi daek napiut leo-leo nol au. Auk tamang bui kon no, mi lail nang soleng auk lo. 8 Ama Lamtua Allah esa tana noan, auk daleng ngi kom isi le tutnaal nol mia. Ta auk in namnau mia ka, banansila el Yesus Kristus in namnau mia ka.

9-10 Tiata, auk kohe-kanas bel mi elia: auk nodan le mi in namnau bali apa ka taplaeng napiut, didiin atuli neta. Auk kon nodan le Ama Lamtua Allah tao mi le nangan taan baktetebes dais ol man banan dui ka, le halin mi in nuli ka daid niu. Le halin se oras Kristus in nutus bel atuli li dasi las totoang nga, Un tek noan, mi muik kula-sala mes lo kon, 11 undeng Un esa man tao mi dalen nas niu son, le mi haup in nuil lolo-lolo. Nini mi in nuil lolo ela ka, atuil tenga las kon nikit sakeng Ama Lamtua Allah ngala ka lapa-lapa, nol naka-naka Una.

12 Kaka-pail in namnau me! Auk in koma ka le mi tana noan, muik atuli in tao sus au, didiin oen tamang auk se bui. Mo Ama Lamtua Dehet Dais Banan na holhising tapnaeng, 13 didiin tentara in doh se um lahi la ngas, nol totoang atuil tenga las kon tana noan, auk tamang bui undeng auk in muid Yesus Kristus sa.✡Dehet deng Aan in Nutus sas 28:30 14 Hidim Ama Lamtua Allah atulin in se nia ngias net noan, Ama Lamtua tao ela, se dedeng auk in se bui ni dalen nia. Tiata muik atuil in parsai mamo brain tapnaeng le aa langa-langa deng Ama Lamtua Dehet-dasin na se ola-ola, nol in lii-tidu lo.

15-17 Se ni muik atuli tuladang dua, man makoe in tui deng Kristus. Muik in daek nol dalen lolo-lolo nol muik in daek nol dalen lolo lo. In daek nol dalen lolo ngas, oen dalen nas banan nol au. Oen taan baktetebes noan, auk lepa-haal auk in susa nia, undeng auk lako-daek auk osa la, nol hoen-nodat bubuit lo kon.

Mo in daek nol dalen lolo lo ngas, idus apa, nol nuting ngala. Oen tao bakisan atuil in parsai ngas, le sadi muik atuli in muid one. Ta oen nuting lalan le nikit-nikit apan nas noan, oen nam banan dui deng au. Oen bali le, eta muik atuli in muid one kam, na man tao ngele taplaeng auk in sus se bui ni dalen nia.

18 Mo nang tuun tia! Atuli tui nol dalen lolo, tamlom lo ko, auk toe mudin lo. Sadi, eta oen tui deng Kristus sam, na man tao auk daleng ngi kolo.

Nol auk daleng ngi kolo baktetebes, 19 undeng auk tana noan, mi kohe-kanas bel au, nol Yesus Kristus Koo Niu ka tulung au. Tiata mam auk musu las tao dudus nal auk lo. 20 Auk nuling tam, auk mateng kon no, sa-saa lo. Sadi Ama Lamtua Allah pake auk le nikit sakeng Lamtua Yesus ngala ka lapa-lapa, nol tui langa-langa deng Una, didiin muik sa-saa mes lo kon man tao auk le mae. Nias totoang man auk parsais tutungus deng hmunan nua maa lius halas nia.

21-23 Ta auk muik in nangan elia: eta auk nuling ngam, nang le auk nuling butu-kil nol Kristus, le halin auk lako-daek napiut Un osa la nol babanan. Mo eta auk mateng ngam, auk ulat dui pait. Undeng auk nang soleng nal apan-kloma kia, nol nuling pait le daad se sorgang leo-leo nol Kristus. Undeng na le, auk daleng ngi hduan, nol taan le ol man banan dui ka lo! 24 Tiata, eli tukun! Undeng mi parlu auk nabael se nia, tiata in banan dui ka auk daad leo-leo nol mi se apan-kloma ki tuun tia. 25 Auk parsai noan auk umur ri blatas nabale, le auk haup in daad leo-leo nol mia. Ta Ama Lamtua in koma ka, auk tao teken mi dalen nas, le halin mi parsai se Una ka taplaeng nol dael kolo. 26 Tiata, mam mi nikit sakeng nal Yesus Kristus ngala ka lapa-lapa, undeng Un sai lalan son le auk haup in tia meo mia pait.

27-28 Mo taon elol kon, mi in nuli ka musti toma, ta mi niam, Ama Lamtua atulin. Tiata mi musti nuil toma, nol tao muid asa man Kristus Dehet Dais Banan na in tek mi son na. Hidim, eta auk daid in pait tia meo mia, tamlom suma ming deng atuil tuun noan, mi nuil babanan nam, auk daleng kolo. Ta auk tana noan, mi in nuli ka koo-dalen mesa, undeng mi butu-kil se Koo mesa. Nol auk kon tana noan, mi dil dididi nol nukleka, le lako-daek Lamtua Yesus Dehet Dais Banan na leo-leo, didiin atuil didang ngas kon parsai. Nol atuli li labang nol mi kon no, mi lii lo. Na daid taad bel mi musu las noan, Ama Lamtua Allah le kat soleng one. Nol daid taad kon noan, Un bel mi boa-blingin, le halin mam mi nulim napiut nol Una. 29 Ta Ama Lamtua Allah sai lalan son, le mi parsai nal se Kristus, nol daid Un atulin. Molam suma parsai tuun lo, ta in dudui pait ta, Un kon bel dola le mi haup in susa, undeng mi muid Una. 30 Ta auk ming noan, muik atuli ne na labang nol mia, undeng mi in lako-daek Kristus Dehet Dais Banan na ka. Nangan ne, ta hmunan nu oen kon labang nol auk ela. Nol halas ni kon oen labang nabael ela tutungus.✡Dehet deng Aan in Nutus sas 16:19-40