22
Palun kuli man kil in nuli, nol kai ina man kil in nuli
1 Hidi na kon, ima-ii in deng sorga na tulu bel auk palun mesa, man uin na kil in nuli. Ui na niu-hilin el kaca ka. Un baa puit maa deng Ama Lamtua Allah, nol Lae-blai Ana ka del in prenta ka.✡Yeskial 47:1; Sakarias 14:8 2 Le baa lako el lalan tuan deng kota na ka. Se palun na halin-halin nas sam, muik kai ina mes man kil in nuli. Kai ina na taun mesa lam isin lalis hngul dua; bulan mesa lam, isin oe mesa. Un klehen na daid kai in tahi, le tao banan totoang bangsa-bangsa in se apan-kloma ki ngias.✡Dehet deng Apan-kloma ki in Dadi ka 2:9 3 Mo totoang man Ama Lamtua Allah hutun, nol bahang netas son nas, muik ne kota na pait lo. In muki ka, Ama Lamtua Allah, nol Lae-blai Ana man daad le kil bandu, se Oen del bandu la ka. Nol Oen atulin in loka-tadu man todan-lahing se One ngas.✡Sakarias 14:11
4 Oen totoang ngat net Ama Lamtua Allah sila ka. Nol Ama Lamtua ngala ka dulan ne oen hmangin nas. 5 Se na lam, muik duman lo. Tiata Ama Lamtua atulin nas parlu lelo, tamlom hadut lo, undeng Ama Lamtua Allah esa man laang kota na. Mam oen kon kil bandu leo-leo se na hidi nutus taan lo.✡Yesaya 60:19; Danial 7:18
In hida puis sa
6 Hidi na kon, ima-ii na tek auk noan, “Totoang man auk in tek ku son nias, meman baktebes ela. Totoang atuli li boel parsai auk in teka na. Hmunan nua, Ama Lamtua Allah nini Un Koo la, le tek Un Dasin na bel mee-baha las. Mo halas nia lam, Un pake Un ima-ii in deng sorga ngas son, le tek Un atulin nas deng dais nias totoang, man nesang lo ka kam, musti dadis.”
7 Hidi nam, Yesus tek pait noan, “Nangan ne! Nesang lo ka kam, Auk maang. Ne in dula ni dul totoang son, deng asa man mam le dadi ngas. Totoang atuil man muid buk ni in teka-teka ngas, mam oen man ulat dui.”
8 In dul buk nia ki, au, Yuhanis. Auk man ming nol net dais nias totoang son. Ming hidi ela kon, auk senet hai bukung nga se ima-ii in deng sorga ka sila ka, le noan todan-lahing una. Ta un man tulu bel auk dais nias totoang son. 9 Mo un kaing auk noan, “Eee! Ku tao ela deken! Ku musti todan-lahing se Ama Lamtua Allah sii. Boel todan-lahing auk deken. Ta auk niam kon Ama Lamtua atulin in loka-loka el ku, nol ku kaak-palim man daid Un mee-baha son nas, nol atuil didang man lako-daek muid asa man dulan son ne buk ni dalen nia ngas.
10 Ku boel buni buk ni isin nas deng atuil didang deken. Ta nesang lo ka kam, totoang man in dul ne buk ni dalen nias, taon elola ko dadi.
11 Totoang atuil in daek hmomos sas,
nang le oen daek hmomos napiut lako.
Mo totoang in nuil niu ka,
oen musti nuil niu napiut.
Totoang atuil in daek dadaat tas,
nang le oen daek dadaat napiut lako.
Mo totoang in daek babanan nas,
oen musti daek banan tutungus.”✡Danial 12:10
12 Hidi nam Yesus tek pait noan, “Nangan babanan! Ta nesang lo ka kam, Auk maang. Mam Auk balas bel totoang atuli lia, muding asa man oen in daek son na.✡Yesaya 40:10; 62:11; Buk in Naka-nahalit 28:4; Yermia 17:10
13 Auk niam,
Alfa lako pes Omega.
Auk niam,
A lako pes Z.
Totoang daid deng Au,
kilan deng hmunan hesa ku lako lius puis.✡Apan-kloma Hnika Balu 1:8; Yesaya 44:6; 48:12; Apan-kloma Hnika Balu 1:17; 2:8
14 Atuli-atuil man baes hidi oen kai-batu las le niu son nas, man ulat.
Ta mam oen man haup hak le taam muid hnita tene ka le lakos kota dalen.
Ulat bating atuil man in nuil niu son nas.
Ta mam oen man haup dola le kaa kai isin man tao atuli li le nuli tutungus sa.✡Dehet deng Apan-kloma ki in Dadi ka 2:9; 3:22
15 Mo atuil didang ngas, boel taam laok se na lo.
Man Ama Lamtua atulin lo kas, boel taam laok se na lo.
Nas, atuil man in parsai se Ama Lamtua lo ngas,* Alkitab dais Yunanin na dul noan, “ngot”. Atuil Yahudi las taom pake dais “ngot” le daid kleta man tulu atuil Yahudi lo kas, na atuil “man in parsai se Ama Lamtua lo” ngas. Se bango nia lam, Yuhanis aa deng buan man daid in taam laok se sorga lo ngas. Hmunan na, “atuil in parsai se Ama Lamtua lo ngas”. Ni aa deng ngot in taam laok sorga lo.
atuil in nong dadahut daat tas, in hui-langus tutungus,
keo atuil tutungus, in nodo-kit tutungus,
nol in nole-lilung daat tas.
Oen totoang nas, boel taam laok lo.
Nang soleng oen totoang se likun na tukun tia.
16 Auk niam, Yesus. Auk man tadu Auk ima-ii la maa deng sorga, le tek puting dais nias totoang, halin mam mi laok tek Auk in hida ki bel jemaat iut nas.
Auk nia mo laih Daud in hua-koet.
Auk nia mo Laih man in kil bandu.
Auk kaloen na, langa isi,
tuladang el Paplome ka.
Auk langa ka muun isi,
banansila el Duun Tuan Peke Langa ka.”✡Yesaya 11:1, 10
17 Ama Lamtua Allah Koo la nusi noan, “Maam se ni tia!”
Bihatang in le sapa ka kon haman noan, “Maam se ni tia!”
Totoang in ming ngas kon tek noan, “Maa tia!”
Nang le asii man meen tuu kam, maa le niun tia!
Asii man le niun ui man tao atuli li le nuli napiut ta,
maa le katan tia!
Atuli li boel kat ui na
nol mosa-mosa.
Atuli li boel niun ui na
nol pake in baen lo.✡Yesaya 55:1
Yuhanis in hida puis sa
18 Au, Yuhanis, tek nuting totoang atuli li pait deng asa man Ama Lamtua Allah sai meman son bel aun, se buk ni dalen, man mam mi ming hapun, elia: eta muik atuli tapnaeng dais se in dula nia lam, mam Ama Lamtua Allah hukung tapnaeng una, nini in daat iut man Un boho maa son se dale-dapa kia ka. 19 Nol eta muik atuli in kose soleng asa mes deng buk ni isin nia kam, mam Ama Lamtua Allah kat nuli un hak ka, le un taam lako nal el kota niu ka lo, nol un kaa haup kai isin man tao atuli li le nuli hidi nutus taan lo ka lo.✡Dehet Ulang deng Lalan in Nuli 4:2; 12:32
20 Yesus esa man tulu-balang dais nias totoang son. Un hid son noan, “Toman na! Nesang lo ka kam, Auk maang.”
Elam, Lamtua Yesus, maa tia!
21 Auk nodan le Lamtua Yesus tulu bel Un dalen banan na se Un atulin nas totoang. Amin!
Deng au,
Yuhanis
✡22:1 Yeskial 47:1; Sakarias 14:8
✡22:2 Dehet deng Apan-kloma ki in Dadi ka 2:9
✡22:3 Sakarias 14:11
✡22:5 Yesaya 60:19; Danial 7:18
✡22:11 Danial 12:10
✡22:12 Yesaya 40:10; 62:11; Buk in Naka-nahalit 28:4; Yermia 17:10
✡22:13 Apan-kloma Hnika Balu 1:8; Yesaya 44:6; 48:12; Apan-kloma Hnika Balu 1:17; 2:8
✡22:14 Dehet deng Apan-kloma ki in Dadi ka 2:9; 3:22
*22:15 Alkitab dais Yunanin na dul noan, “ngot”. Atuil Yahudi las taom pake dais “ngot” le daid kleta man tulu atuil Yahudi lo kas, na atuil “man in parsai se Ama Lamtua lo” ngas. Se bango nia lam, Yuhanis aa deng buan man daid in taam laok se sorga lo ngas. Hmunan na, “atuil in parsai se Ama Lamtua lo ngas”. Ni aa deng ngot in taam laok sorga lo.
✡22:16 Yesaya 11:1, 10
✡22:17 Yesaya 55:1
✡22:19 Dehet Ulang deng Lalan in Nuli 4:2; 12:32